އެކުވެރި ދައުލަތްތަކުގެ 15 ވަނަ ކްރައިމް ޕްރިވެންޝަން ކޮންގްރެސް މިއަދު އަބޫދާބީގައި ފެށޭއިރު ދިވެހިރާއްޖެ ތަމްސީލުކުރައްވައި ޕްރޮސިކިއުޓަރ ޖެނެރަލް ޖަސްޓިސް (ރިޓަޔަރޑް) އަލްއުސްތާޛް ޢައްބާސް ޝަރީފް ތިން ސެޝަނެއްގައި ތަޤުރީރުކުރެއްވުމަށް ހަމަޖައްސައިފިއެވެ.

އެކުވެރި ޢަރަބި އިމާރާތުގެ އަބޫދާބީ ނޭޝަނަލް އެގްޒިބިޝަން ސެންޓަރުގައި ކުރިއަށްދާ މި ކޮންގްރެސް ކުރިއަށްދާނީ މިއަދުން ފެށިގެން އަންނަ އޮކްޓޯބަރުމަހުގެ އެއްވަނަ ދުވަހުގެ ނިޔަލަށެވެ. ޕީޖީގެ އިތުރުން އެސިސްޓެންޓް ޕްރޮސިކިއުޓަރ ޖެނެރަލް އަލްއުސްތާޛް ޙުސައިން ސާމީ ވެސް ރާއްޖޭގެ ވަފުދުގައި ބައިވެރިވެވަޑައިގަންނަވައެވެ.

ޕީޖީ އޮފީހުން ބުނީ މި ކޮންގްރެސްގައި ޕީޖީ ތަޤުރީރުކުރެއްވުމަށް ހަމަޖެހިފައިވަނީ މިއަދު އަދި މާދަމާ ކުރިއަށްދާ މަތީ ފެންވަރުގެ ބައްދަލުވުމާއި، ސައުތު އީސްޓް އޭޝިއާ ޖަސްޓިސް ނެޓްވޯކް (ސީޖަސްޓް) ގެ ބައްދަލުވުމާއި ހަމަހަމަ ޢަދުލުއިންޞާފު ކަށަވަރުކުރުމާ ބެހޭ ގޮތުން ބާއްވާ ވޯކްޝޮޕެއްގައި ކަމަށެވެ.

މި ތިން ސެޝަންގައި ޕީޖީ އަލިއަޅުއްވައިލައްވާނީ ކުށާ ދެކޮޅަށް ރާއްޖެއިން ހާސިލުކޮށްފައިވާ ކާމިޔާބީތަކާއި ކުރިމަތިވާ ގޮންޖެހުންތަކާއި ޒަމާނީ ޓެކްނޮލޮޖީ އެ މަސައްކަތުގައި ބޭނުންކުރުމުގެ މުހިންމުކަމުގެ މައްޗަށެވެ. އޭގެ އިތުރުން ޕީޖީ އޮފީހުގެ ހުރިހާ ޚިދުމަތެއް އޮންލައިންކޮށް ލިބޭ ގޮތަށް ފަރުމާކޮށްފައިވާ "އީ-ދޮރޯށި" ޕޯޓަލާއި ޑިޖިޓަލް ޓްރާންސްފޮމޭޝަން މަޝްރޫޢު "ޕީޖީއޯ 2.0" ކޮންގްރެސްގެ މަންދޫބުންނަށް ތަޢާރަފްކޮށް ދެއްވާނެއެވެ.

މިއަހަރުގެ ކޮންގްރެސްގެ މައިގަނޑު އަމާޒަކީ ޑިޖިޓަލް ޒަމާނުގައި ކުށްކުރުން ހުއްޓުވުމާއި ޢަދުލުއިންޞާފުގެ ނިޒާމު ހަރުދަނާކުރުމާ ގުޅޭ ގޮތުން ޤައުމުތަކުގެ މެދުގައި ފުޅާ ދާއިރާއެއްގައި މަޝްވަރާކުރުމެވެ. މި ކޮންގްރެސްއަކީ ކޮންމެ ފަސް އަހަރަކުން އެއް ފަހަރު ބާއްވާ ބައިނަލްއަޤުވާމީ ފޯރަމެކެވެ.