މި ސަރުކާރުގެ އެންމެ ބިޔަ މަޝްރޫއުކަމަށް ވާ ތިލަމާލެ ބްރިޖު އެޅުމަށް ރައްޔިތުންގެ ފައިސާއިން 12 ބިލިއަން ޚަރަދުކޮށްގެން ހައްގުވަނީ "ބަޅު" ކެރޭނެއްތޯ އައްސަވާ ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަދި ޕީޕީއެމްގެ ނައިބުރައީސް އަހުމަދު ޝިޔާމު ސުވާލުކުރައްވައިފި އެވެ. 

ޝިޔާމު މިފަދައިން ސުވާލު ކުރައްވާފައިވަނީ ތިލަމާލެ ބްރިޖުގެ މަސައްކަތަށް ބޭނުން ކުރަމުން ދިޔަ ކެރޭނެއް ބިންދައިގެން ގޮސް ކަނޑަށް ވެއްޓޭ މަންޒަރު ފެންނަމުންދާ ވީޑިއޯއެއް އާންމުވުމާއި ގުޅިގެން ކަންބޮޑުވުން ފާޅުކުރައްވާ ކުރެއްވި ޓްވީޓެއްގައެވެ. 

އެ ޓްވީޓުގައި ޝިޔާމު ވިދާޅުވީ ތިލަމާލެ ބްރިޖުގެ މަސައްކަތަށް ރައްޔިތުން އަތުން ބޮޑު ޚަރަދެއް ކޮށްފައިވާކަމަށެވެ. އެހެން ނަމަވެސް ރައްޔިތުންގެ އަތުން ކުރި ޚަރަދާއި އެކަށީގެންވާ ރަނގަޅު ފެންވަރެއްގައި އެ މަސައްކަތް ކުރިއަށް ނުދާކަމަށް ޝިޔާމު ވަނީ ވިދާޅުވެފައެވެ.

އޭގެ އިތުރުން ޝިޔާމް ވިދާޅުވީ ތިލަމާލެ ބްރިޖު އެޅުމުގެ ނަމުގައި ސަރުކާރުން ހިންގަމުންދަނީ ބޮޑު ވައްކަމެއް ކަމަށެވެ. 

ތިލަމާލެ ބްރިޖު އެޅުމުގެ މަސައްކަތަކީ އިންޑިއާގެ އެފްކޯންސް ކުންފުންޏާއި ހަވާލުކޮށްގެން ކުރިއަށް ގެންދާ މަޝްރޫއުއެކެވެ. 

ދައުރު ނިމެންވާއިރަށް ބްރިޖުގެ މަސައްކަތް ނިންމާލެވޭނެކަމަށް ގަބޫލު ނުކުރައްވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެފައިވާއިރު، އެފްކޯންސް ކުންފުނީގެ ގާބިލްކަމާމެދު އެތައް ބަޔަކު ދަނީ ސުވާލު އުފައްދަމުންނެވެ. 

ތިމަ ލާމެ ބްރިޖުއެޅުމަށް އެފްކޯންސް ކުންފުނިން ބޭނުން ކުރަމުން ދިޔަ ކެރޭނެއް ބިނދި ކަނޑަށް ވެއްޓިފައިވާއިރު، ބްރިޖުއެޅުމަށް އެފްކޯންސް ކުންފުނިން ހެދި ޕްލެޓްފޯމެއްވެސް ވަނީ ވިލިމާލެ ފަރަށް އަރާފައެވެ.

އެކަމުގެ ސަބަބުން އެ ފަރަށް އިޔާދަ ނުކުރެވޭވަރުގެ ބޮޑު ގެއްލުމެއް ލިބިފައިވާއިރު، ގެއްލުމުގެ ބަދަލު ދިނުމަށްވެސް އެފްކޯންސް ކުންފުނިން ވަނީ އެ ކުންފުނި ޖޫރިމަނާ ކުރި މައްސަލަ އިސްތިއުނާފުކޮށްފަ އެވެ.