ކުރިއަށް އޮތް 2023 ވަނަ އަހަރުގެ ރިޔާސީ އިންތިހާބާއި ގުޅޭގޮތުން، އެމްއެންޑީއެފްގެ އިސް ބޭފުޅުންނާއި އެކު އިލެކްޝަންސް ކޮމިޝަނުން މަޝްވަރާ ބައްދަލުވުމެއް ބާއްވައިފިއެވެ. 

އިއްޔެ މެންދުރު ފަހު ބޭއްވުނު މި ބައްދަލުވުމުގައ އިލެކްޝަންސް ކޮމިޝަންގެ ރައީސް ފުއާދު ތައުފީގުގެ އަރިހުގައި ކޮމިޝަނުގެ މެންބަރުން ބައިވެރިވަޑައިގެންނެވިއިރު، މިނިސްޓަރު އޮފް ޑިފެންސް މާރިއާ އަހުމަދު ދީދީއާއެކު ޗީފް އޮފް ޑިފެންސް ފޯސް ޝަމާލް އަދި އެހެން ބައެއް އިސް އޮފިސަރުން ބައިވެރިވެވަޑައިގެންނެވިއެވެ. 

މިއީ ރިޔާސީ އިންތިޚާބު 2023 އަށް ތައްޔާރުވުމުގެ ގޮތުގެ ފުރިހަމަކުރަންޖެހޭ ބައެއް އިންތިޒާމުތަކާ ގުޅޭގޮތުން މަޝްވަރާ ކުރަން ބޭއްވުނު ބައްދަލުވުމެއް ކަމުގައި އީސީން ބުނެއެވެ.  

Advertisement

އީސީން އެމްއެންޑީއެފާއި އެކު ބޭއްވި މި ބައްދަލްވުމުގެ އިތުރުން ރިޔާސީ އިންތިހާބުގެ ސެކިއުރިޓީ ކަންތައްތަކާބެހޭގޮތުން އީސީގެ ވެރިންނާއި ފުލުހުންގެ ވެރިންނާއި އެކުވެސް އިއްޔެ ވަނީ މަޝްވަރާ ބައްދަލުވުމެއް ބާއްވަވާފައެވެ. ފުލުހުންގެ މައި މަރުކަޒުގައި ބޭއްވި މި ބައްދަލުވުމުގައި ކޮމިޝަނާ އޮފް ޕޮލިސް މުހައްމަދު ހަމީދާއި އީސީގެ ރައީސް ފުއާދު ތައުފީގުގެ އިތުރުން އެ ދެ އިދާރާގެ އިސް ބައެއް އޮފިޝަލުން ވަނީ ބައިވެރިވެފަ އެވެ.