ޕްރޮގްރެސިވް ކޮންގްރެސް ކޯލިޝަނުން "ފެލާލައިފި" މި ނަމުގައި ޚާއްސަ ޖަލްސާއެއް ބޭއްވުމަށް ހަމަޖެހިއްޖެއެވެ.
އިދިކޮޅުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕީޕީއެމްގެ ތަރުޖަމާނު ހީނާ ވަލީދު ވިދާޅުވީ، މި ޖަލްސާ އޮންނާނީ 23 ޑިސެމްބަރު 2022 ވާ ހުކުރު ދުވަހުގެ ރޭ 2030 ގައި ކާނިވަލުގައި ކަމަށެވެ.
އަދި މިޖަލްސާއަކީ މި ސަރުކާރުން ރައްޔިތުންނަށް ވެފައިވާ ވައުދުތައް ނުފުއްދާ ރައްޔިތުންގެ އަތުން ނަގަމުންދާ ޓެކްސް ބޮޑުކޮށް، ތަކެތީގެ އަގު އުފުލި، ޚިދުމަތްތަކުގެ އަގު ބޮޑުވެ، އެކި ނަންނަމުގައި ރައްޔިތުން ޖޫރިމަނާކޮށް ރައްޔިތުން "ފެލަމުންދާތީ" އެކަންކަމާއި ދެކޮޅަށް އަޑުއުފުލުމަށް ބާއްވާ ޖަލްސާއެއް ކަމަށްވެސް އޭނާ ވިދާޅުވިއެވެ.
"މި ނަން ހާއްސަވާ ސަބަބަކީ މިހާރު އޮތް ދިވެހި ސަރުކާރަކީ ރައްޔިތުން 'ފެލާލައިގެން' ވެރިކަން ކުރާ ސަރުކާރަކަށް ވާތީ. މިހެން މި ދަންނަވަން މި ޖެހެނީ ޑޮލަރުގެ އަގު ވަރަށް ބޮޑަށް މަތިވެއްޖެ. ތަކެތީގެ އަގު ބޮޑުވެއްޖެ. އަދި ހަމަ އެހެންމެ އަންނަ އަހަރުގެ ޖަނަވަރީ މަހުގެ ފުރަތަމަ ދުވަހުން ފެށިގެން އަނެއްކާވެސް ރައްޔިތުންގެ އަތުން ފައިސާ ނަގަން ޓެކްސް ބޮޑުކުރަން ބިލެއް މި ވަނީ ފާސްކޮށްފައި. އަދި ރައީސުލްޖުމްހޫރިއްޔާ މި ވަނީ މި ބިލް ތަސްދީގު ކުރައްވާފައި،" ހީނާ ވިދާޅުވިއެވެ.
އިދިކޮޅުން ވަނީ މި ޖަލްސާގެ ދައުވަތު ޕާޓީގެ ހުރިހާ މެންބަރުންނަށް އަދި ސަރުކާރާމެދު ހިތްހަމަނުޖެހޭ ހުރިހާ ރައްޔިތުންނަށް ފޮނުވާފައެވެ.
Advertisement
This content is created and paid for by advertisers and does not involve Voice Journalists
