ފިރިމީހާގެ ކިބައިން އެތައް އަނިޔާއެއް ލިބުނު ނަމަވެސް، އެ އަނިޔާއަށް ކެތް ކުރުމަކީ ދީނީ ވާޖިބެއް ކަމަށް ބައެއް އަނބިން ދެކޭ ކަމަށް ވިދާޅުވެ ދީނީ ޢިލްމުވެރިޔާ ޝެއިޚް ސައުދާން ކަންބޮޑުވުން ފާޅުކުރައްވައިފިއެވެ.
ގެވެށި އަނިޔާވެ ޝިކާރައަކަށް ވެފައިވާ އެތައް ބަޔަކު މި ކުޑަ މުޖުތަމައު ގައި ތިބި އިރު, ދާދި ފަހުން، ނޮޅިވަރަމްގައި ނިޔާވި، ނިޝާމާ މުހައްމަދު ވެސް ނިޔާވެފައިވަނީ އޭނާގެ ފިރިމީހާ ދިން އަނިޔާ ތަކުގެ ސަބަބުން ކަމަށް ޢާއިލާއިން ތުހުމަތުކުރެއެވެ.
އެކަމާއި ގުޅިގެން ކަންބޮޑުވުން ފާޅުކޮށް ޝެއިޚް ސައުދާން ކުރެއްވި ޓުވީޓެއްގައި ވިދާޅުވީ، ބައެއް އަނބިން ދެކޭ ގޮތުގައި ފިރިމީހާ ކުރާ އަނިޔާއަށް ކެތްކުރުމަކީ ދީނީ ވާޖިބެއް ކަމަށާ، އަދި އެއީ ކޮންމެ ދެމަފިރިއަކުވެސް އުޅޭ ގޮތް ކަމަށް ގަބޫލު ކުރާ އަނބިންވެސް އުޅޭ ކަމަށެވެ.
"އަނެއްބައި މީހުން ދަރިންނަށްޓަކައޭ ކިޔާފަ، އަނިޔާ ތަހަންމަލު ކުރަމުން މުޅިޙަޔާތް ހޭދަކުރަނީ ހިތާމަޔާއި ވޭނުގަ! މިއީ ދިރިއުޅުމެއްތޯ؟" ޝެއިޚް ސައުދާން ވިދާޅުވިއެވެ.
މީގެ އިތުރުން، ޝެއިޚް ސައުދާން ގެ އެ ޓުވީޓަށް ކޮމެންޓު ކުރި މީހަކު އަނބިމީހާ ގައިގައި ޖެހުމަކީ އަނިޔާ ކުރުން ކަމަށް ވާނެތޯ ކުރި ސުވާލަކަށް ޖަވާބު ދެއްވަމުން ޝެއިޚް ވަނީ އެއީވެސް އަނިޔާ ކުރުން ކަމަށް ވާނެ ކަމަށް ވިދާޅުވެފައެވެ. އަދި ނިސާ ސޫރަތުގައި ނުކިޔަމަންތެރި އަނބިންގައިގަ ޖެހުމަށް ކަމަށް އޮންނަނީ ތަދުވެސް ނުވާ ގޮތަށް، ހާނިއްކަވެސް ނުވާ ގޮތަށް ކަމަށް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
