ފީފާ ކުލަބް ވޯލްޑް ކަޕް 2025 ވަނަ އަހަރުން ފެށިގެން 32 ޓީމާއެކު، ޤައުމުތަކުގެ ވޯލްޑް ކަޕް ބާއްވާ ފޯމެޓަށް ބޭއްވުމަށް ނިންމައި އެކަން ފީފާއިން އިއުލާން ކޮއްފިއެވެ.

މިއަދު ބޭއްވި ނިއުސް ކޮންފަރެންސެއްގައި ފީފާގެ ރައީސް ޖިއާނީ އިންފަންޓީނޯ މިއަދު އިއުލާން ކޮށްފައި ވަނީ 2025 ވަނަ އަހަރު، އާ ފޯމެޓަކަށް ކްލަބު ވޯލްޑް ކަޕެއް ބާއްވަން ފީފާއިން ނިންމާފައިވާ ކަމަށާއި އެ މުބާރާތުގައި 32 ކްލަބެއް ފެންނާނެ ކަމަށެވެ.އަދި މީގެ އިތުރުން އަންހެން ކްލަބު ވޯލްޑް ކަޕެއްވެސް ބޭއްވުމުގެ ވިސްނުން ގެންގުޅޭ ކަމަށްވެސް އިންފަންޓީނޯ ވަނީ ވިދާޅުވެފައެވެ.

މީގެ އިތުރުން ފީފާއިން މިއަދު އިއުލާން ކުރިގޮތުގައި ކޮންމެ ދެ އަހަރުން އެއް އަހަރު މާޗު މަހުގެ ފީފާ ދުވަސްތަކުގައި ހަތަރު ގައުމު، ނޫނީ އެއަށްވުރެ އިތުރު ގައުމުތައް ވާދަކުރާ ކުދިކުދި މުބާރާތް ބާއްވަން ގަސްދުކޮށްފައިވާ ކަމަށްވެސް މިއަދު އިންފަންޓީނޯ އިއުލާން ކުރައްވާފައިވެއެވެ. އެއީ ފީފާ ކަލަންޑަރަށް ގެންނަން ގަސްދުކުރާ ބަދަލުތަކުގެ ތެރޭގައި އިންފަންޓީނޯ މިއަދު އިއުލާން ކުރައްވާފައިވާ ބަދަލެކެވެ.

Advertisement

އިންފަންޓީނޯ ވިދާޅުވީ ދެ މެޗުގެ ފީފާ ވިންޑޯގެ ބަދަލުގައި ކުޅުންތެރިންނަށް ރެސްޓް ކުރުމުގެ ފުރުސަތު ބޮޑުވާނެ ކަހަލަ ގޮތަކަށް ގައުމީ ޓީމުގެ މެޗުތަކަށް ފުރުސަތު ދޭން ޖެހޭ ކަމަށާއި ފުޓުބޯޅައިގައި އެންމެ މުހިއްމު ވާން ޖެހޭނެ ކަމަކީ ކުޅުންތެރިންގެ ސިއްހީ ހާލަތު ކަމަށެވެ.

މިއަދު ބޭއްވި ނިއުސް ކޮންފަރެންސެއްގައި ފީފާގެ ރައީސް ޖިއާނީ އިންފަންޓީނޯ

މިއަދުގެ ޕްރެސްގައި އިންފަންޓީނޯ ވަނީ ގަތަރު ވޯލްޑް ކަޕްގެ އިންތިޒާމްތަކަށް ތައުރީފުކޮށް ވާހަކަ ދައްކަވައިފައެވެ. އަދި މުބާރާތުގެ އިންތިޒާމްތައް ފުރިހަމަކުރުމަށް އެހީތެރިވެދިން ހުރިހާ ފަރާތްތަކަށް އިންފަންޓީނޯ ޝުކުރު އަދާކުރައްވައި ވިދާޅުވީ، މިއީ އެންމެ މަސްލަހަތު ރަނގަޅު ވޯލްޑް ކަޕް ކަމަށާއި އެއްވެސް ނުރައްކާތެރި ކަމެއް ނުހިނގާ ވޯލްޑް ކަޕް ނިންމާލުމަށް ގާތްވެފައިވާ ކަމަށެވެ.

މީގެ ކުރިން ކްލަބު ވޯލްޑް ކަޕް ބާއްވަމުން އައީ ބައްރުތަކުގެ ޗެމްޕިއަން ކުލަބުތަކުގެ މެދުގައެވެ. އެ މުބާރާތް ކޮންމެ އަހަރަކު މިހާރު ބާއްވަމުންދާ އިރު، އަލަށް 2025 ގައި ބާއްވާ ކްލަބު ވޯލްޑް ކަޕަށް ޓީމުތައް ކޮލިފައިވާ އުސޫލު އަދި އިއުލާން ކޮށްފައެއް ނުވެއެވެ. އިންފަންޓީނޯ ފާހަގަކުރެއްވީ ފުޓުބޯޅަައިގައި ދުނިޔޭގެ ޝާމިލުވުން ބޮޑުވަމުންދާކަން މި ވޯލްޑް ކަޕުންވެސް ފާހަގަވަމުންދާ ކަމަށާއި ކުރިއަށް އޮތް ތަނުގައި ހަމަހަމަ ފުރުސަތުތައް ދޭން އިތުރު މަސައްކަތްތަކެއް ކުރަމުން ގެންދާނެ ކަމަށެވެ.

ކުލަބް ވޯލްޑް ކަޕް ތާރީޚްގައި އެންމެ ކާމިޔާބު ކުލަބް ރެއާލް މެޑްރިޑް

ކްލަބް ވޯލްޑް ކަޕް ތާރިޚްގައި އެންމެ ކާމިޔާބު ކުލަބަކީ ސްޕެއިންގެ ރެއާލް މެޑްރިޑެވެ. އެޓީމު ވަނީ މި މުބާރާތުގެ ޗެންޕިއަންކަން 04 ފަހަރު 2014،2016،2017،2018 ހޯދާފައެވެ.