މަރުކޮމިޝަންގައި އިންނަވާ ފަރީޝާ އަކީ ކުރީގެ ރައީސް ޔާމީން އަބްދުލްގައްޔޫމު އަވަހާރަކޮށްލުމަށް ލަންކާއިން ގެނައި ސްނައިޕަރުގެ ގާނޫނީ ވަކީލަށްވުމުން، ގޭންގުތަކޭ ކިޔައިގެން ވާހަކަދައްކަން ފަރީޝާ ލަދުގަންނަން ޖެހޭކަމަށް ކުރީގެ ނައިބުރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ. 

ޑރ ޖަމީލު މިފަދައިން ވިދާޅުވެފައިވަނީ ފަރީޝާގެ ނަޒާހަތްތެރިކަމާމެދު ސުވާލު އުފައްދަވާ ކުރެއްވި ޓްވީޓެއްގައެވެ. 

އެ ޓްވީޓުގައި ޑރ ޖަމީލު ވަނީ ރައީސް ޔާމީން އަވަހާރަކޮށްލުމަށް ލަންކާއިން ގެނައި ސްނައިޕަރާއެކު ފަރީޝާ ހުންނަވަނިކޮށް ފެންނަ ފޮޓޯއެއް ވެސް ހިއްސާ ކުރައްވާފައެވެ. 

Advertisement

މިނިވަން ނޫހުގެ ނޫސްވެރިޔާ ރިލްވާނު ގެއްލުވާލި ހާދިސާއާއި ގުޅިގެން މަރުކޮމިޝަނުން ނެރުނު ރިޕޯޓުގައި އެ މަރާއި ރައީސް ޔާމީން އާއި ގުޅުވައި ގިނަ ވާހަކަތަކެއް ވަނީ ހިމަނާފައެވެ. އަދި ރިލްވާނު ގެއްލުވާލި ހާދިސާގެ ބައިވެރިންނާއި ރައީސް ޔާމީންއާއި ގާތް ގުުމެއް އޮންނަކަމަށް ބުނެ، މަރުކޮމިޝަނުން ވަނީ ފޮޓޯއެއްވެސް ހިއްސާކޮށްފައެވެ. 

އެކަންކަމާއި ގުޅުވާ ރައީސް ޔާމީންގެ އިސް ގާނޫނި ވަކީލު ޑރ ޖަމީލު ވަނީ ރައީސް ޔާމީން އަވަހާރަކޮށްލަން ގެނައި ސްނައިޕަރުގެ ގާނޫނީ ވަކީލު ފަރީޝާ މަރުކޮމިޝަނުގައި އިންނެވުމުން، އެކަމުން ދޭހަވަނީ ކޮންއެއްޗެއްތޯ ސުވާލު ކުރައްވާފައެވެ. 

އޭގެ އިތުރުން ޑރ ޖަމީލު ވިދާޅުވީ، ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގަތުމާއެކު، ރައީސް ޔާމީން އަވަހާރަކޮށްލަން ގެނައި ޓެރަރިސްޓަކު މިނިވަންކުރުމުން، ސްނައިޕަރު ގެނައި ހާދިސާ ގުޅުވާލަން މާ ފަސޭހަ ނޫންތޯ އައްސަވާ ސުވާލު އުފައްދަވާފައެވެ.

އަދި ރައީސް ސޯލިހު ވެރިކަމަށް އައި ހިސާބުން، ފަރީޝާގެ ކްލައިންޓު މިނިވަން ވުމަކީ އިއްތިފާގެއްތޯވެސް ޑރ ޖަމީލު ސުވާލު އުފައްދަވާފައި ވެއެވެ. 

މަރުކޮމިޝަންގައި އިންނަވާ ރިލްވާނުގެ މަރާއި ރައީސް ޔާމީންއާއި ގުޅުވާ ފަރީޝާއާއި މިސްބާހު ދެކެވނީ ސިޔާސީ ވާހަކަތަކެއްކަމަށް ރައީސް ޔާމީންގެ ގާނޫނީ ވަކީލުންގެ ޓީމުން ވަނީ މީގެ ކުރިން ވިދާޅުވެފައެވެ. އެ ވާހަކަތާއި ގުޅިގެން މަރުކޮމިޝަނުގެ މެމްބަރުންނަށް އަބުރު ދައުވާ ކުރުމަށްވެސް ރައީސް ޔާމީން ވަނީ ނިންމަވާފައެވެ.