އެމްޑީޕީގެ ރިޔާސީ ޕްރައިމަރީގައި ރައީސް އިބްރާހިމް މުހައްމަދު ސޯލިހުގެ ކެމްޕެއިން މެނޭޖަރަކަށް ކިނބިދޫ ދާއިރާގެ މެންބަރު މުޙައްމަދު ނާޝިޒް ހަމަޖައްސަން ނިންމަވައިފިއެވެ.
ދެވަނަ ދައުރެއް ހޯއްދެވުމަށް އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން ރައީސް ސޯލިހު ވަނީ އިއުލާނު ކުރައްވާފައެވެ. އަދި އެކަމަށްޓަކައި ވާން ޖެހޭ ހުރިހާ ތައްޔާރީތައް އެމަނިކުފާނު ދަނީ ވަމުންނެވެ.
އެމްޑީޕީގެ ރިޔާސީގެ ޕްރައިމަރީގައި ކާމިޔާބު ކުރެއްވުމަށް ރައީސް ސޯލިހު ވަނީ ކެމްޕެއިން އޮފީހެއްވެސް ހުޅުވާފައެވެ. އެމަނިކުފާނުގެ އޮފީސް ހުޅުވާފައިވަނީ ސޯލްޓް ކެފޭގައެވެ.
އެމަނިކުފާނުގެ ކެމްޕެއިން މެނޭޖަރަކަށް ނާޝިޒް އައްޔަންކޮށްފައި ވާއިރު، ނާޝިޒް އަކީ ރައްޔިތުންގެ މަޖިލީހުގެ މީދޫ ދާއިރާގެ މެމްބަރު ރޮޒޭނާ އާދަމްގެ ފިރިކަލުންނެވެ.
ރޮޒެނާއަކީ ރައީސް ސޯލިހާއި މި ސަރުކާރު ދިފާއުކުރައްވާ މިފަހުން އެންމެ ގިނައިން ވަކާލާތު ކުރައްވަމުން އަންނަ އެއް މެމްބަރެވެ. އަދި ރައީސް މުހައްމަދު ނަޝީދަށް ތާއީދުކުރައްވާ މެމްބަރުން އެންމެ ނަފްރަތު ކުރާ އެއް ފަރާތްވެސް މެއެވެ.
އެމްޑީޕީގެ ރިޔާސީ ޕްރައިމަރީއަށް ރައީސް ސޯލިހު ތައްޔާރުވާން ފައްޓަވާފައިވާއިރު، މި އިންތިޚާބުގައި ރައީސް ސޯލިހާއި ވާދަކުރައްވަން ނިކުންނަވާނީ، މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދެވެ.
އެހެން ނަމަވެސް ޕްރައިމަރީ ބޭއްވުމާއި މެދު ނަޝީދުގެ ވިސްނުންފުޅު ގެންގުޅުއްވާގޮތް އަދި މުޅިން ސާފެއް ނޫނެވެ.
Advertisement
This content is created and paid for by advertisers and does not involve Voice Journalists
