ބައިނަލްއަގުވާމީ އެކުވެރިކަމުގެ މެޗެއްގަައި މިއަދު ސިންގަޕޫރު އާއި ވާދަކޮށް 3-1 ން ދިވެހި ރާއްޖެ ބަލިވެއްޖެ އެވެ. މިއީ މި ހަފުތާތެރޭ ރާއްޖެ ޓީމު ބަލިވި ދެވަނަ މެޗެވެ. ފުރަތަމަ މެޗުގައި މިދިޔަ ބުދަ ދުވަހު މެލޭޝިއާ އަތުން ރާއްޖެ ބަލީވީ 3-0 ންނެވެ.

މި މަހު ނެރުނު ފިފާ ރޭންކިންގައި ރާއްޖެއަށް ވުރެ ދެ ދަރަޖަ ފަަހަތުގައި، 160 ވަނާގައި ސިންގަޕޫރް އޮތް އިރު ތިން ދަރަޖައިގެ ވެއްޓުމަކާއެކު މިވަގުތު ފީފާ ރޭންކިންގައި ދިވެހި ރާއްޖެ އޮތީ 150 ވަނާގައެވެ. މިގެ ކުރިން މި ދެޓީމު ދެ ފަހަރެއްގެ މަތިން ވާދަކޮށްފައިވާއިރު ދެ މެޗުން ވެސް މޮޅުވެފައިވަނީ ސިންގަޕޫރެވެ. ފުރަތަމަ މެޗު 2011 ވަނަ އަހަރު ކުޅެވުނު އިރު އެމެޗު ސިންގަޕޫރް ކާމިޔާބު ކުރީ 4-0 ގެ ތަފާތުބޮޑު ނަތީއްޖާއަކުންނެވެ. އަދި ދެވަނަ މެޗު 2018 ވަނަ އަހަރު ކުޅެވުނު އިރު ވާދަވެރި ކުޅުމަކަށް ފަހު ދިވެހި ޓީމު ބަލިވީ 3-2 ން ނެވެ.

މިއަދު ސިންގަޕޫރުގައި ކުޅުނު މެޗުގެ ފުރަތަމަ 11 އަށް ގައުމީ ޓީމުގެ ކޯޗުގެ ފްރެންޗެސްކޯ މޮރިއޭރޯ ގެނައި އެންމެ ބަދަލެކެވެ. އެއީ މެލޭޝިއާ މެޗުގެ ފުރަތަމަ އެގާރައިގައި ހިމެނުނު މުހައްމަދު ޝަހާއުގެ ބަދަލުގައި ހަމްޒާ މުހައްމަދު ކުޅެން ނެރުމެވެ.

ސިންގަޕޫރާ ދެކޮޅަށް މިއަދު ނުކުތް ރާއްޖެ ޓީމުގެ ފުރަތަމަ އެގާރަ --- ފޮޓޯ: އެފްއޭއެމް

މެޗު ފެށިގެން 4 ވަނަ މިނެޓްގައި ސިންގަޕޫރުން ވަނީ ލީޑް ނަގައިފަ އެވެ. މި ލަނޑު އެ ޓީމަށް ކާމިޔާބުކޮށްދިނީ އިލްހާން ފަންޑީ އަހުމެދެވެ. އޭގެ ކުޑައިރުކޮޅެއްފަހުން ފޯވާޑް އިބްރާހިމް މަހުދީ ހުސައިން (ފޭދޫ އިއްބެ) ރާއްޖެ އަށް ނަތީޖާ ހަމަހަމަކޮށް ދިނެވެ. ފުރަތަމަ ހާފުގެ 17 ވަނަ މިނެޓްގައި ހަމްޒާ ނެގި ކޯނަރު ބޮލުން ގޯލުގެތެރެއަށް ފޮނުވާލައި އިއްބެ ވަނީ ރާއްޖެ އަށް ނަތީޖާ ހަމަހަމަކޮށް ދީފަ އެވެ. މިއާއެކު ފުރަތަމަ ހާފުގެ ކުޅުން ނިމިގެން ދިޔައީ 1-1 ން ދެޓީމު އެއްވަރުވެންނެވެ.

ލަނޑުޖެހުމަށް ފަހު އިބްރާހިމް މަހުދީ (17) އުފާފާޅު ކުރަނީ: އޭނާ ރާއްޖެ އަށް ލަނޑު ޖަހައިދިނީ ސިންގަޕޫރުން ފުރަތަމަ ލަނޑު ޖަހައިގެން ލީޑް ނަގައިފައިވަނިކޮށް --- ފޮޓޯ: އެފްއޭއެމް

މެޗުގެ ދެވަނަ ހާފުގައި ސިންގަޕޫރުން ވަނީ  ކުޅުން ރަގަޅުކޮށް އިތުރު ދެ ލަނޑު ކާމިޔާބުކޮއްފައެވެ. މި މެޗުގައި އެ ޓީމަށް ދެވަނަ ފަހަރަށް ލީޑް ނަގައިދީ ދެވަނަ ހާފުގެ މާގިނައިރުތަކެއް ނުވަނީސް މެޗު 50 ވަނަ މިނެޓްގައި ޝަވާލް އަނައުއާ އެވެ. ސިންގަޕޫރުގެ ތިންވަނަ ގޯލް މެޗުގެ 87 ވަނަ މިނެޓްގައި ކާމިޔާބުކޮށްދިނީ ވެސް ޝަވާލް އަނައުއާ އެވެ.