މަސްތުވާތަކެތި ބޭނުންކޮށް އެތަކެތީގެ ވިޔަފާރިކުރާ ކަމުގެ ތުހުމަތުގައި ފުލުހުން ހައްޔަރު ކުރި މީހާގެ، ޖީބުގައި އޮތީ ރައްޓެއްސަކަށް ލަނޑެއް ދޭން ގެންގުޅުނު ގޮދަން ފުށް ޕެކެޓެއް ކަމަށް އޭނާ ބުނެފިއެވެ. 

އައްޑޫ މަރަދޫ އަށް ނިސްބަތްވާ އުމުރުން 32 އަހަރުގެ މި މީހާ ހައްޔަރުކޮށް، ކްރިމިނަލް ކޯޓަށް ހާޒިރުކުރުމުން އެ ކޯޓުން ވަނީ އޭނާ 5 ދުވަހަށް ބަންދުކޮށްފައެވެ. 

ކްރިމިނަލް ކޯޓުން އޭނާ ބަންދުކުރުމަށް ނެރެފައިވާ އަމުރުގައިވާ ގޮތުން، އޭނާ ލައިގެން ހުރި ޖިންސުގެ ވާތް ފަރާތު ކުރިމަތީ ޖީބުން މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި ރަބަރު ޕެކެޓެއް ފެނިފައިވެއެވެ.

Advertisement

ބަންދުގެ މުއްދަތު ޖެހުމަށް ކޯޓަށް ހާޒިރުކުރުމުން ދިފާއުގައި އޭނާ ބުނީ، ޖީބުން ފެނުނު ޕެކެޓަކީ އޭނާގެ ރައްޓެއްސަކަށް ލަނޑެއް ދިނުމަށް ގެންގުޅުނު ގޮދަން ފުށް ޕެކެޓެއް ކަމަށެވެ.

އަދި އެ މައްސަލައިގައި ފެނުނު މަސްތުވާތަކެއްޗެއް ކަަމަށް ޝައްކު ކުރެވޭ އެއްޗެއް ކަމަށް އޭނާ ބުނާތީ މަސްތުވާތަކެއްޗެއް ކަމަށް ޝައްކު ކުރެވޭ ތަކެތި އަވަހަށް ތަހުލީލު ކުރުން މުހިންމު ކަމަށް ބަންދު އަމުރުގައި ބުނެފައި ވެއެވެ. މީގެ އިތުރުން، އޭނާގެ މައްޗަށް ތުހުމަތުކުރެވޭ ކުށް ކުރި ކަމުގެ ހެކި ކޮންމެވެސް މިންވަރަކަށް ފުލުހުން ހުށަހަޅާފައިވާ ކަމަށް ވެސް އެ އަމުރުގައިވެއެވެ.

އޭނާ ވަކީލަކާ އެއްކޮށް ކުރިއަށް ދާން ބޭނުންވާ ކަމަށް ބުނުމުން، ގާޒީ ސަފްވަތު ހަބީބު ވަނީ ވަކީލަކު އައްޔަނުކުރުމަށް ފުރުސަތު ދިނުމަށް އޭނާ ފަސް ދުވަހަށް ބަންދުކުރުމަށް ނިންމައިފައެވެ.