މިއަހަރުގެ ޖެނުއަރީމަހު ޕޯޯޓޯއިން 45 މިލިއަން ޕައުންޑްގެ ޓްރާންސްފާ ފީއެއްގައި ލިވަޕޫލަށް ބަދަލުވި ކޮލަމްބިއާގެ ފޯވާޑް ލުއިސް ޑިއާޒްގެ ކަކުލަށް ލިބުނު އަނިޔާ ސީރިއަސް ކަމަށާއި އޭނާއަށް އެބުރި ކުޅުމުގެތެރެއަށް އައުމަށް މަދުވެގެން ތިން މަސް ދުވަސް ބޭނުންވާނެކަމަށް ލިވަޕޫލްގެ ޖަރުމަނުގެ ކޯޗު ޔާގެން ކްލޮޕް ބުނެފިއެވެ.

އަނިޔާގެ ސަބަބުން ކުޅުމާއި ދުރުގައި ދެމަހެންހާ ދުވަހު ހުރުމަށްފަހު ޓީމުގެ ފަރިތަކުރުންތަކުގައި ޑިއާޒް ބައިވެރިވާން ފެށީ ވެސް ވަރަށް ފަހުންނެވެ. ނަމަވެސް ދުބާއީގައި ލިވަޕޫލުން ކުރިއަށްގެންދިޔަ ޓްރެއިނިން ކޭމްޕްގައި އަނެއްކާވެސް ކުރިންް އަނިޔާވި ކަކުލަށް މިވަނީ އަނިޔާވެ ތިން މަހަށް ކުޅުމާއި ދުރަށްދާން މަޖުބޫރުވެފައެވެ. މިއާއެކު ޗެންޕިއަންސް ލީގުގެ ގަދަ 16 ގައި ރެއާލް މެޑްރިޑާއި ދެކޮޅަށް ލިވަޕޫލް ކުޅޭ ފުރަތަމަ މެޗުގައި އޭނާއަށް ނުކުޅެވޭނެއެވެ.

ލުއިސް ޑިއާޒަށް ދަނޑުމަތީގައި ފަރުވާ ދެނީ، އަނިޔާގެ ސަބަބުން ޗެންޕިއަންސް ލީގުގައި ރެއާލް މެޑްރިޑައި ދެކޮޅަށް ނުކުޅެވޭނެ

ޗެމްޕިއަންސް ލީގުގެ ފައިނަލުގައި އެންމެ ފަހުން ކުޅުނު ދެ ޓީމު މުބަރާތުގެ ދެވަނަބުރުގެ ފުރަތަމަ ލެގު ފެބްރުއަރީ މަހުގެ 21 ވަނަ ދުވަހު ލިވަޕޫލްގެ އެންފީލްޑްގައި ކުޅުމަށް ހަމަޖެހިފައިވާއިރު، ދެވަނަ ލެގު ކުޅުމަށް ހަމަޖެހިފައިވަނީ ގާތްގަނޑަކަށް މަހެއްހާ ދުވަސް ފަހުން، މާޗް މަހުގެ 15 ވަނަ ދުވަހު މެޑްރިޑްގެ ސެންޓިއާގޯ ބާނަބެއުގައެވެ.

ޑިއާޒް ލިވަޕޫލް އާއި ގުޅުނު ފަހުން އެޓީމަށް ކުޅެދިން 38 މެޗުގައި 10 ގޯލް ކާމިޔާބުކޮށްދީފައިވާއިރު، މި ވަގުތު އަނިޔާއާއި ފޯމުގެ މައްސަލަ ދިމާވެފައިވާ ލިވަޕޫލުގެ ފޯވާޑް ލައިނުގައި ޑިއާޒް ނެތުމަކީ މިވަގުތު ޕްރެމިއަރ ލިގް ތާވަލުގެ ހަ ވަނާގައި އޮތް ލިވަޕޫލަށް އަންނަ ސީޒަނުގައި ޗެންޕިއަންސް ލިގުން ޖާގައެއް ހޯދުމަށް އެޓީމުން ކުރަމުން އަންނަ މަސައްކަތަށް އެޅޭނެ ވަރަށް ބޮޑު ހުރަހެކެވެ.