އިދިކޮޅުގެ ލީޑަރޝިޕާއި ބައްދަލުނުކުރަން ވަލު ދޮރާށީން ފިލައިގެން ނުދާކަމަށް ޕީއެސްއެމްގެ އެމްޑީ އަލީ ޚާލިދު ވިދާޅުވެއްޖެ އެވެ. 

ދައުލަތުގެ މީޑިއާ ޕީއެސްއެމްގައި ހިނގަމުންދާ ޖަރީމާތަކާއި ގުޅިގެން ރައްޔިތުންގެ ހުރި ކަންބޮޑުވުންތައް ޕީއެސްއެމްގެ އިސްވެރިންނާއި ހިއްސާކުރުމަށް އިދިކޮޅުގެ ލީޑަރޝިޕުން ވަނީ މީގެ ދެ ދުވަސް ކުރިން ޕީއެސްއެމްގެ މައި އޮފީހަށް ވަޑައިގެންފައެވެ. 

އެހެން ނަމަވެސް އެ ދުވަހު ޕީއެސްއެމްގެ ބޭފުޅަކާއި ބައްދަލުވެފައެއް ނުވެއެވެ. އެ ދުވަހު ޕީއެސްއަށް ވަޑައިގަތުމަށްފަހު މީޑިއާއަށް ދެއްވި އިންޓަރވިއުއެއްގައި އިދިކޮޅު އިއްތިހާދުގައި ހިމެނޭ ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ، އިދިކޮޅުގެ ލީޑަރޝިޕްގެ ބޭފުޅުން ޕީއެސްއެމް އޮފީހަށް ވަޑައިގަތްއިރު، އެތަނުގައި ޕީއެސްއެމްގެ އެމްޑީ ހުންނެވިކަމަށެވެ. 

އެހެން ނަމަވެސް، އެބޭފުޅުންނާއި ބައްދަލުނުކުރައްވަން އެމްޑީ ވަލުދޮރޯށިން ނިކުމެގެން ވަޑައިގެންނެވީކަމަށް އިދިކޮޅުން ވަނީ ބުނެފައެވެ. 

އިދިކޮޅުގެ އެ ތުހުމަތުތަށް އެފަހުން ޕީއެސްއެމްގެ އެމްޑީ އަލީ ޚާލިދު ވަނީ ދޮގުކުރައްވާފަ އެވެ. 

އެގޮތުން ޚާލިދު ވިދާޅުވީ، އިދިކޮޅުގެ ލީޑަރޝިޕާއި ބައްދަލު ނުކުރަން ވަލުދޮރޯށިން ވަޑައިނުގަންނަވާކަމަށެވެ. ނިކުމެ ވަޑައިގަތީ މައި ދޮރޯށިން ކަމަށާއި، އެތަން އިދިކޮޅުގެ މެމްބަރުންނަށް ފެނިވަޑައިގަންނަވާނެ ކަމަށް ޚާލިދު ވިދާޅުވިއެވެ. 

ޚާލިދު ވިދާޅުވީ، އެދުވަހު ޕީއެސްއެމްގެ އިސްވެރިންނާއި ބައްދަލުކުރައްވަން ވަޑައިގެން ވަފުދުގައި ކުރީގެ ދެ މިނިސްޓަރުން ތިއްބެވިކަމަށެވެ. އެފަދަ ބައްދަލުވުމަކަށް ވަޑައިގަތުމުގެ ކުރިން އިޝާރާތްކޮށްލުމަކީ ވެސް އޮތްކަމެއްކަމަށް އޭނާ ވިދާޅުވިއެވެ. 

އިދިކޮޅުގެ ލީޑަރޝިޕާއި ބައްދަލުނުކުރަން އެތަނުން ވަޑައިގެންނެވީކަމަށް ވިދާޅުވި ނަމަވެސް، އެދުވަހު ޕީއެސްއެމްގެ އެމްޑީ ވަޑައިގެންނެވީ މީޓިންއަކަށް ކަމަށް އެފަހުން ވަނީ ވިދާޅުވެފަ އެވެ.