އިލެކްޝަންސް ކޮމިޝަން (އީސީ) ގެ ސެކިއުރިޓީ ރޫމުގެ އިތުރުން ގުދަނަކުން ވެސް ވައްކަން ކޮށްފައިވާ ކަމަށާއި އެހެންނަމަވެސް އިންތިހާބަކާ ގުޅޭ އެއްވެސް ލިޔެކިޔުމެއް ގެއްލިފައިވާ ނުވާ ކަމަށް އެ ކޮމިޝަނުން ބުނެފި އެވެ.

އީސީގެ ސެކިއުރިޓީ ރޫމު ފަޅާލުމަށް ފަހު ވައްކަން ކޮށްފައިވާ މައްސަލައެއް މިއަދު މީޑިއާތަކަށް ތިލަ ވުމާއި ގުޅިގެން އީސީން ނެރުނު ނޫސްބަޔާނެއްގަައި ބުނީ، މިދިޔަ މަހުގެ 30 ވަނަ ދުވަހު އިލެކްޝަންސް ކޮމިޝަންގެ ސެކިއުރިޓީ ރޫމް ފަޅާލާފައިވާ ކަމަށާ، އަދި އޭގެ ފަހުން މި މަހުގެ 10 ވަނަ ދުވަހު ވެސް ބާ އަރަބިއްޔާގައި ހުންނަ އީސީގެ ގުދަނެއް ފަޅާލައި ވައްކަން ކޮށްފައިވާ ކަމަށެވެ. އަދި އެ މައްސަލަ ވެސް ފުލުހުންނަށް ރިޕޯޓް ކޮށްފައިވާ ކަމަށް އެ ކޮމިޝަނުން ބުނެފައިވެއެވެ.

މީގެ އިތުރުން އީސީން ބުނީ، ސެކިއުރިޓީ ރޫމް ފަޅައިލި އިރު އިންތިހާބަކާ ގުޅުން ހުރި ލިޔުމެއް އަދި އެކަމާ ބެހޭ އެއްވެސް މަސައްކަތެއް ކުރިޔަށް ނުގެންދާ ކަމަށެވެ. ނަމަވެސް ކައުންސިލް އިންތިހާބުގައި ބޭނުންކުރި ފަސް ނެޓްބުކް ގެއްލިފައިވުމުގެ އިތުރުން އެތަނުގައި އެއްވެސް އެއްޗެއް އަޅާފައި ނެތް ތިޖޫރީއަކަށް ގެއްލުން ދީފައިވާ ކަމަށް އީސީން ބުނެ އެވެ. އަދި، ގުދަނުގައި ހުރި 11 ޔޫޕީއެސްއާއި 65 އިންޗީގެ ދެ ޓީވީއާއި ދެ ސްޕީކަރު ސެޓާއި 10 މީޓަރުގެ ކަރަންޓު އެކްސްޓެންޝަން ބޯޑެއް ވަގަށް ގެންގޮސްފައިވާ ކަމަށްވެސް ބުނެފައިވެއެވެ.

Advertisement

އީސީއިން ބުނީ މި ދެ ހާދިސާ އާ ގުޅިގެން މިހާރު ބޭއްވުމަށް ހަމަޖެހިފައިވާ ބައި އިލެކްޝަންތަކަށް އެއްވެސް އަސަރެއް ނުކުރާނެ ކަމަށާއި އެފަދަ ވައްކަންތައް ތަކުރާރު ނުވާނެ ގޮތަށް އަޅަން ޖެހޭ ފިޔަވަޅު އެޅުމުގެ މަސައްކަތް ފުލުހުންގެ މަޝްވަރާގެ މަތިން ކުރަމުން އަންނަ ކަމަށެވެ.