ވޯލްޑް ކަޕް ތަށި ލިބުމުގެ އުފާ އާޖެންޓިނާގެ ކުޅުންތެރިން ފާހަގަ ކުރަމުންދާއިރު އެޓީމުގެ ބައެއް ކުޅުންތެރިން ނާއި ސަޕޯޓަރުންގެ ފަރާތުން ފުރާންސްގެ ތަރި އެމްބާޕޭއަށް މަލާމާތްކޮށް ފުރައްސާރަކުރަމުން ދާއިރު އެޓީމުގެ ކެޕްޓަން ލިއޮނަލް މެސީ އެކަންހުއްޓުވަން މަސައްކަތް ނުކުރާތީ ގިނަބަޔަކު އަންނަނީ އެކަމަށް ފާޑުކިޔަމުންނެވެ.

ވޯލްޑް ކަޕް ފުޓްބޯޅަ މުބާރާތުގެ ކުރިން ވެސް އާޖެންޓީނާގެ ކީއްޕަރު މާޓީނޭޒް އާއި ދެމެދު ބަހުގެ ހަަމަލާތަކެއް ބަދަލުކުރެވުނެވެ. ފައިނަލް މެޗުގެ ކުރިން ނޫސްވެރިންނާއި ވާހަކަ ދަށްކަމުން އެމްބާޕޭ ބުނީ ދެކޮނު އެމެރިކާގެ ފުޓްބޯޅައަށް ވުރެ މިހާރު ޔޫރަޕްގެ ފުޓްބޯޅަ ކުރިއަރާފައި ވާކަމަށާއި އޭގެ ނަތީއްޖާ ފާއިތުވެދިޔަ ވިހިި އަހަރުތެރޭގައި ވޯލްޑްކަޕްގައި ޔޫރަޕްގެ ގައުމުތަކުން ނެރެމުން އަންނަ ނަތީޖާތަކުން ފެންނަކަށެވެ.

މެޗަށް ފަހު މާޓީނޭޒް އެމްބާޕޭއަށް ހިތްވަރުދެނީ

އަދި އޭގެ ސަބަބަކީ ދެކޮނު އެމެރިކާގެ ވަރުގަދަ ދެ ބާރު އާޖެންޓީނާ އަދި ބުރެޒިލްއަށް ވާދަވެރި މެޗުތައް ކުޅެންލިބޭލެއް މަދުވުން ކަމަށާއި ނަމަވެސް ޔޫރަޕުގެ ބޮޑެތި ބާރުތަކަށް ޔުއެފާ ނެޝަނަލް ލީގުގެ ސަބަބުން ވާދަވެރި ގިނަ މެޗުތަކެއް ކުޅުމުގެ ފުރުސަތު ލިބިގެންދާކަމަށެވެ.

އެމްބާޕޭގެ ވާހަކަތަކަށް ރައްދުދެމުން އަޖެންޓީނާގެ ކީއްޕަރު މާޓީނޭޒް ބުނީ އެމްބާޕޭއަށް އެސަރަހައްދުގެ ފުޓްބޯޅަ ނޭގެނީކަމަށެވެ. އަދި ފައިނަލް މެޗުގައި ފުރާންސްގެ ކުޅުންތެރިއަކަށް އޭނާ ދިރިހުއްޓާ ގޯލެއްޖެހިޔަކަނުދޭނެކަމަށް ބުނެ ފުރާންސްގެ ކުޅުންތެރިންނަށް ވަރުގަދަ ބަހުގެ ހަމަލާތަކެއް އޭނާގެ ފަރާތުން ވަނީ އަމާޒުކުރުވާފައެވެ.

ފޯރިގަދަ ކުޅުމެއް ފެނިގެންދިޔަ ފައިނަލް މެޗުގައި އެމްބާޕޭ ތިން ލަނޑުޖަހައި ހެޓްރިކްހެދިއެވެ. އަދި ޕެނަލްޓީ ޝޫޓްގައިވެސް އޭނާގެ ޕެނަލްޓީ ކާމިޔާބުކުރިއެވެ. ނަަމަވެސް ނަތީއްޖާ ހޯދަންޖެހި ޕެނަޓީގައި އެންމެ ފަހުގެ ޗެންޕިއަން ފުރާންސް ބަލިކޮށް އާޖެންޓީނާ ތަށި ހޯދިއެވެ. 

ފައިނަލް މެޗަށްފަހު ދަނޑުމަތީގައި މާޔޫސްވެފައި އިން އެމްބާޕޭއަށް މާޓީނޭޒް، ހިތްްވަރުދޭ މަންޒަރު ފެނުމުން ދެކުޅުންތެރިންގެ މެދުގައި މެޗުގެ ކުރިން ބަދަލުކުރެވުނު ބަހުގެ ހަމަލާތަކަށް ނިމުމެއްއައީކަމަށް ހީކުރެވުނެވެ. ނަމަވެސް އާޖެންޓީނާގެ ކުޅުންތެރިން ޗެންޖިންރޫމުގައި އުފާފާުކުރަމުން ދިޔަވަގުތު އަނެއްކާވެސް މާޓީނޭޒް އެމްބާޕޭއަށް މަލާމާތްކުރުމުގެ ގޮތުން ހިމޭން ސްކޫތެއް ގެނައުމަށް އޭނާގެ ޓީމުގެ ފަރާތުން އެދުނެވެ. އަދި މިހިމޭން ސްކޫތްގައި އެޓީމުގެ ކެޕްޓަން މެސީ ވެސް ބައިވެރިވާތަން ފެނެއެވެ.

ޗެންޖިންރޫމުގައި ހިގައިދިޔަ ކަންތައްތަކަށް ފަހު އާޖެންްޓީނާގެ ކުޅުންތެރިން އެބުރި ގައުމަށްދިޔައިރު އެގަުމުގެ ސަޕޯޓަރުން މަގުމަތީގައި އެމްބާޕޭގެ ބުދުތައްހަދައި އޭގައި އަލިފާންރޯކޮށް އުފާފާޅުކުރަނީއެވެ. އަދި އާޖެންޓީނާގެ ކުޅުންތެރިން ސަޕޯޓަރުންނާއި ބައްދަލުކުރަން ބަހުގައި ދިޔަ މަގުމަތީ އެޓީމުގެ ގޯލްކީއްޕަރު ހުރީ ކުޑަކުދިން ކުޅެން ގެންގުޅޭ ޑޯލްއެއްގައި އެމްބާޕޭގެ ފޭސް މާސްކެއް އަޅުވައި އެބުދު އުރާލައިގެންނެވެ. އެވަގުތު މެސީ އޭނާގެ ކައިރީ ހުރިނަމަވެސް މާޓީނޭޒް ހުއްޓުވަން އެއްވެސް މަސައްކަތެއްކުރާތަނެއް ނުފެނެއެވެ.

މެސީ އަކީ އެމްބާޕޭއާއި އެކު ފުރާންސްގެ ޕީއެސްޖީއަށް ކުޅެމުން އަންނަ ކުޅުންތެރިއަކަށްވެފައި އާޖެންޓީނާގެ ކެޕްޓަންގެ ހައިސިއްޔަތުން އެޓީމުގެ ކުޅުންތެރިން އިދިކޮޅު ވަކި ކުޅުންތެރިއަކަށް ޓާގެޓްކޮށް މަލާމާތާއި ފުރައްސާރަކުރަމުންދާއިރު އެކަން ނުހުއްޓުވުމުން ގިނަބަޔަކު އަންނަނީ އެކަމަށް ފާޑުކިޔަމުންނެވެ.