އަންނަ ޖެނުއަރީމަހު މުދަލާއި ޙިދުމަތުން ނެގޭ ޓެކްސް ނުވަތަ ޖީ.އެސްޓީ ރޭޓް %8 އަށް ބަދަލުވުމާއި ގުޅިގެން، ވިޔަފާރިތައް އަހުލުވެރިކުރުމަށް މޯލްޑިވްސް އިންލެންޑް ރެވެނިއު އޮތޯރިޓީ، މީރާއިން ގިނަ ތައްޔާރީތަކެއް ވަމުންދާކަމަށް ހާމަކޮށްފިއެވެ. 

ޖީ.އެސްޓީ ރޭޓް ބޮޑުކުރުމާއި ގުޅިގެން ވިޔަފާރިތައް އަހުލުވެރިކުރުމަށް، މި ކަމަށް ތައްޔާރުވުމުގެ ގޮތުން ވިޔަފާރިތަކުން ސަމާލުކަންދޭންޖެހޭ ކަންތައްތައް ހިމަނައިގެން 'ފެކްޓް ޝީޓް' އެއް ތައްޔާރުކޮށް މީރާގެ ވެބްސައިޓްގައި ވަނީ ޝާއިއުކޮށްފަ އެވެ.

މި 'ފެކްޓް ޝީޓް' ގައި ވާގޮތުގެ މަތިން، ރޭޓް ބަދަލުވުމާއި ގުޅިގެން 'ކަޓް-އޯފް ވަގުތު' ކަނޑައަޅައި، ޖީ.އެސް.ޓީ ނަގާނެ ރޭޓް ކަނޑައަޅާނެ ގޮތް ހިމަނައިފައިވެއެވެ.

Advertisement

އެގޮތުން، 24 ގަޑިއިރު ޚިދުމަތް ނުދޭ ކެފޭތަކާއި ރެސްޓޯރަންޓްތަކާއި 24 ގަޑިއިރު ޚިދުމަތް ނުދޭ އެހެން ވިޔަފާރިތަކުން، އައު ރޭޓުގައި ޖީ.އެސް.ޓީ ނަގަން ފަށާނީ، އަންނަ ޖެނުއަރީ މަހުގެ 1 ވަނަ ދުވަހުގައި އެފަދަ ތަންތަން ހުޅުވާ ވަގުތުން ފެށިގެންކަމަށް މިރާއިން ބުނެފައިވެއެވެ.  

އެ ނޫން ހުރިހާ ވިޔަފާރިތަކުން އަންނަ ޖެނުއަރީ މަހުގެ 1 ވަނަ ދުވަހުގެ 00:00 ފެށިގެން ޖީ.އެސް.ޓީ ނަގަންވާނީ އައު ރޭޓުތަކުގައިކަމަށް މިރާއިން ބުނެފައިވެއެވެ.

މިރާއިން ބުނީ، މިފެކްޓް ޝީޓުގައި ޝާއިއުކޮށްފައިވާ ޖީ.އެސް.ޓީގެ ރޭޓު ބަދަލުވުން ހިމެނޭ މުއާމަލާތްތަކުގައި 'ޖީ.އެސް.ޓީ ލާޒިމުވާ ވަގުތު' ކަނޑައަޅާނެ ގޮތުގެ ބައެއް މިސާލުތައް ހިމަނާފައިވާނެކަމަށެވެ.މީރާއިން މައުލޫމާތު ދޭ ގޮތުގައި، އަންނަ ޖެނުއަރީ މަހުގެ 1 ވަނަ ދުވަހުން ފެށިގެން މުދަލާއި ޚިދުމަތުގެ އަގު ޖަހައިފައި ހުންނަންވާނީ ޖީ.އެސް.ޓީގެ އައު ރޭޓު ހިމަނައިގެންނެވެ.

އެހެންނަމަވެސް، އެރެއިން އެރެއަށް އަގުތަކަށް ބަދަލުގެންނަން އުނދަގޫ ވާ ފަރާތްތަކުން، ޖެނުއަރީ މަހުގެ 1 ވަނަ ދުވަހުގެ ކުރިން ނަގާނެ އަގާއި ޖެނުއަރީ މަހުގެ 1 ވަނަ ދުވަހުން ފެށިގެން ނަގާނެ އަގު ސާފުކޮށް އެނގޭނެހެން އަގު ޖަހައިފައި ބެހެއްޓިދާނެކަމަށް މީރާއިން މައުލޫމާތުދެއެވެ.