އެސްޓީއޯ ގައްދޫ ކައުންސިލް ފުޓްސަލް ޗެލެންޖުގައި ގްރޫޕު އޭގައި ކުޅުނު ތިން ވަނަ މެޗުގައި ކަނޑުހުޅުދޫ 2-1 ން ބަލިކޮށް އެފްސީ ލެޖުންޑުން ގުރޫޕް އޭ ގެ އެއްވަނާގައި ހަމަޖެހިލައިފިއެވެ.

މިރޭގެ މެޗުގައި ދެޓީމުގެ ފަރާތުން ވާދަވެރި މޮޅު ކުޅުމެއް ފެނިގެން ގޮސްފައިވާއިރު، މި މެޗުގައި ފުރަތަމަ ލަނޑުޖަހައި ލީޑް ހޯދީ އެފްސީ ލެޖެންޑުން ނެވެ. މި ލަނޑު އެޓީމަށް ކާމިޔާބުކޮށްދިނީ އަބްދުﷲ މުއާޒުއެވެ. މެޗުގެ ފުރަތަމަ ހާފު ނިމުމުގެ ކުރިން ކަނޑުހުޅުދޫ ޓީމަށް މެޗުގެ ނަތީއްޖާ ހަމަހަމަކޮށްދިނީ އައްޒާމް އަލި ދީދީ އެވެ.

ދެވަނަ ހާފު ފެށިގެން މާގިނަ އިރުތަކެއް ނުވަނީސް ލެޖެންޑު ޓީމުގެ އަލީ މުހައްމަދު ވަނީ ލަނޑެއް ކާމިޔާބުކޮށް މިރޭގެ މެޗުގައި ދެވަނަ ފަހަރަށް އެޓީމަށް ކުރިހޯދަދީފައެވެ. މި ހާފުގައި ނަތީޖާ ހަމަހަމަކުރުމަށް ކަނޑުހުޅުދޫއަށް ވަނީ ވަރަށް ހުސް 2 ފުރުސަތު ލިބިގެން ބޭނުންކުރެވޭގޮތް ނުވެފައެވެ. ނަތީއްޖާއެއްގެ ގޮތުން މެޗު ނިމިގެން ދިޔައީ 2-1 ގެ ނަޔީޖާއަކުން ލެޖެންޑު ކުރީގަ އޮވެއެވެ.

Advertisement

މިމެޗުގެ ކިންގ އޮފް ދަ މެޗަކަށް ހޮވިފައިވަނީ އެފްސީ ލެޖެންޑަށް ފުރަތަމަ ގޯލް ކާމިޔާބުކޮށްދިން އެޓީމުގެ (ޖ.10) އަބްދުﷲ މުއާޒު އެވެ.

މި މެޗުގެ ނަތީޖާއަށްފަހު ގްރޫޕު އޭގެ އެއްވަނައިގައި 6 ޕޮއިންޓާއި އެކު އޮތީ ލެޖެންޑެވެ. ދެވަނައިގައި ކަނޑުހުޅުދޫ އޮތީ 3 ޕޮއިންޓާއި އެކުގައެވެ. ކޮންމެ ގުރޫޕަކުން އެންމެ ރަގަޅު ނަތީއްޖާ ހޯދާ ދެ ޓީމަށް މުބާރާތުގެ ކުއާޓާ ފައިނުގެ ފުރުސަތު ލިބޭއިރު ކުއާޓާ ފައިނަލްގެ ފަހު ދެޖާގަ ލިބެނީ ތިން ވަނަޔަށް ދާ ޓީމުތަކުގެ ތެރެއިން އެންމެ ރަގަޅު ނަތީއްޖާ ހޯދާ ދެ ޓީމަށެވެ.