އިދިކޮޅު ޕީޕީއެމްގެ ރިޔާސީ ކެނޑިޑޭޓު އަދި ކުރީގެ ރައީސް، ޔާމީން އަބްދުލް ޤައްޔޫމް އަށް 11 އަހަރުގެ ޖަލު ހުކުމެއް އިއްވައި ހުކުމް ތަންފީޒް ކުރުމަށް މާފުށީ ޖަލަށް ގެންދިޔުމާއި ގުޅިގެން އިދިކޮޅުގެ ލީޑަރުންގެ ޓީމް މޯލްޑިވްސް ކަރެކްޝަނަލް ސަރވިސަސްއަށް ވަޑައިގެންފިއެވެ. 

ޔާމީނުގެ މައްޗަށް ދައުވާކޮށްފައިވާ އާރަށް މައްސަލާގައި ރިޝްވަތު ގަބޫލުކުރުމުގެ ކުށާއި، މަނީ ލޯންޑަރިންގެ ކުށް އެމަނިކުފާނުގެ މައްޗަށް ސާބިތުވާ ކަމަށް ކަނޑައަޅައި އެމަނިކުފާނުގެ މައްޗަށް 11 އަހަރުގެ ޖަލު ހުކުމެއް އިއްވާފައި ވަނީ އިއްޔެއެވެ.

އަދި، އެ ހުކުމް ތަންފީޒުކުރުމަށް ރައީސް ޔާމީން އިއްޔެގެ ވަގުތެއްގައި ޖަލަށް ގެންގޮސްފައިވާއިރު، އެމަނިކުފާނު ޖަލުގައި ހުންނަވާއިރު، ސަލާމަތާއި ރައްކާތެރިކަން ކަށަވަރު ކޮށް ހަމަ ޖައްސަންޖެހޭ ބައެއް ކަންކަން ހަމަޖެއްސުމަށް އިދިކޮޅު ޕީޕީއެމް/ޕީއެންސީގެ ލީޑަރުން މިވަގުތު ތިއްބެވީ ކަރެކްޝަންސްގެ އިސްވެރިންނާއި ބައްދަލު ކުރެއްވުމަށް އެ އިދާރާގައެވެ. 

Advertisement

އެގޮތުން ރައީސް ޔާމީން ނަންގަވާ ފިޒިއޮތެރަޕީ ސެޝަންތައް ކުރިއަށް ގެންދެވޭނެ ގޮތެއް ހަމަ ޖެއްސުމާއި ބެހޭގޮތުން މި ބައްދަލުވުމުގައި ވާހަކަދެކެވޭނެ ކަމަށް އިދިކޮޅުން ބުނެއެވެ. 

ކަރެކްޝަނަށް ވަޑައިގެންނެވުމުގެ ކުރިން، ރައީސް ޔާމީނަށް އިއްވި ހުކުމް އަދިވެސް ނުލިބޭތީއާއި ހުކުމްގެ ވީޑިއޯ، ކްރިމިނަލް ކޯޓުގެ ޔޫޓިއުބް ޗެނަލްއިން ޑިލިޓްކޮށްލާފައި ވާތީ ޔާމީންގެ ލޯޔަރުންގެ ޓީމާއެކު ލީޑަރޝިޕް ކްރިމިނަލް ކޯޓު ސަރަހައްދުގައި ވެސް ހަރަކާތްތެރިވެފައެވެ.