އެމްޑީޕީގެ މެންބަރުންގެ ތެރެއިން 40،000 މެންބަރުންނަށް އެންގުމަކާ ނުލާ ޕާޓީގެ ދަފްތަރުން ވަކިކޮށްފައިވާ ކަމަށް، ޕާޓީގެ ޕްރައިމަރީގައި ވާދަކުރައްވާ އެ ޕާޓީގެ ރައީސް މުހައްމަދު ނަޝީދާއި އެމަނިކުފާނުގެ ފެކްޝަނުން ވިދާޅުވަމުން އަންނަ ވާހަކަތަކަށް ޕާޓީގެ ޗެއާޕާސަން ފައްޔާޒް އިސްމާއީލް ރޭ ރައްދުދެއްވައިފި އެވެ.

ރޭ ކުރިއަށް ދިޔަ އެމްޑީޕީގެ ގައުމީ މަޖިލީހުގެ ޖަލްސާގައިވެސް ނަޝީދު ފެކްޝަންގެ މެންބަރުން ޕާޓީން، ޕާޓީގެ އަސްލު މެންބަރުން ވަކިކޮށްފައިވާ ކަމަށް ވިދާޅުވެފައި ވާއިރު، ޗެއާޕާސަން ވަނީ މެންބަރުން ވަކި ކުރި ސަބަބު ތަކާއި، އެ ވަކި ކުރި މެންބަރުން ނިސްބަތްވާ ޕާޓީ އާއި، އެ ޕާޓީ ތަކުގެ މެންބަރުންގެ ތެރެއިން އެމްޑީޕީގެ ދަފްތަރުގައި ތިބި މެންބަރުންގެ އަދަދުވެސް ހާމަކުރައްވާފައެވެ. 

ފައްޔާޒް ވިދާޅުވީ، މީގެ ކުރިން ވެސް ޕާޓީގެ އެތެރޭގެ އިންތިހާބުތަކުގައި އުފެދިފައި އޮތް އެންމެ ކަންބޮޑުވުމަކީ އެހެން ޕާޓީތަކުގެ މެންބަރުން ވޯޓު ލުން ކަމަށާ، ނަމަވެސް މިހާރު އެ ފުރުސަތު ބަންދުވެފައިވާ ކަމަަށެވެެ.ފާހަގަކުރައްވައި

އެގޮތުން ފައްޔާޒު ވިދާޅުވީ، އެމްޑީޕީގެ ދަފްތަރު ސާފުކުރުމުގެ ކުރިން އެމްޑީޕީ ދަފްތަރުގައި ތިބި 39911 މެންބަރުންނަކީ އީސީގެ ދަފްތަރުގައި ނެތް މީހުން ކަމަށެވެ. އަދި އޭގެ ތެރެއިން އެމްޑީޕީއަށް އަނބުރާ ގެނެވުނީ 5325 މެންބަރުން ކަމަށެވެ.

ޕީޕީއެމް - 6350

އެމްއެންޕީ -3845

ޖޭޕީ - 3788

އެމްޑީއޭ - 3087

އަދާލަތު ޕާޓީ - 1711

އެމްޓީޑީ - 1543

އެމްއާރްއެމް - 928

އެމްއެސްޑީޕީ - 875

ޕީއެންސީ - 668

ޑީއާރްޕީ - 389

މީގެ އިތުރުން ފައްޔާޒު ވިދާޅުވީ ދަފްތަރުން އުނި ކުރެވުނު 11114 މީހުންނަކީ އެއްވެސް ޕާޓީއަކަށް ރެޖިސްޓްރީ ވެފައިވާ ބައެއް ނޫން ކަމަށެވެ.

"އަޅުގަނޑު ވެސް ގަބޫލުކުރަން ބައިވަރު އެމްޑީޕީއަށް ކުރިއްސުރެ ނިސްބަތްވެފައި ތިބި މެންބަރުން ތަކަކަށް މިއަދު މި ވޯޓު ލުމުގެ ފުރުސަތު ގެއްލިގެން މިއޮތީ ގޮސްފައި، އެހެންނަމަވެސް އެއީ އަޅުގަނޑުމެންގެ އަސާސީ ގަވައިދާއި ސިޔާސީ ޕާޓީތަކުގެ ގަވައިދާއި މި ގައުމީ މަޖިލީހުން ނިންމި ނިންމުމަމަކާ ދެވުނު ތިން މަސް ދުވަހުގެ މުއްދަތަކާ މިއަދާ ހަމައަށް އައިރު އަށް މަސް ދުވަސް ވެފައި،" ފައްޔާޒް ވިދާޅުވި އެވެ.