ވ.އާރަށް ކުއްޔަށް ދިނުމުގެ މުއާމަލާތާ ގުޅިގެން ދައުލަތުން އިދިކޮޅު އިއްތިހާދުގެ ރިޔާސީ ކެންޑިޑޭޓް ރައީސް ޔާމީނުގެ މައްޗަށް ކުރި 2 ދައުވާ ސާބިތުވާކަމަށް ކަނޑައަޅައި އެމަނިކުފާނު 11 އަހަރަށް ޖަލަށްލުމަށް ކުރި ހުކުމަކީ ހަރާމް ހުކުމެއް ކަމަށް ބުނެ އެމަނިކުފާނު މިނިވަންކުރަން ގޮވައިލާ މުޅި ރާއްޖޭގައި އިހުތިޖާޖުކުރަން އިދިކޮޅު އިއްތިހާދުން ނިންމައިފިއެވެ.
މިއަދު ޕީޕީއެމް އޮފީހުގައި އޮތް ނޫސްވެރިންގެ ބައްދަލުވުމެއްގައި އެ ޕާޓީންވަނީ އަންނަ ހުކުރުދުވަހު މި ބޮޑު ހަރަކާތް ބާއްވަން ނިންމާފައިވާކަން އިއުލާނުކޮށްފައެވެ. އެގޮތުން މާލެ އާއި އަތޮޅުތެރޭގެ ހުރިހާ ރަށެއްގައި ހުކުރު ދުވަހުގެ ހަވީރު ހަތަރެއް ޖަހާއިރު ރައީސް ޔާމީން މިނިވަން ކުރުމަށް ގޮވާލައި އިދިކޮޅުން މުޒާހަރާ ކުރަން ނިންމާފައިވާއިރު، އެ ކޯލިޝަނުން ވަނީ، އިދިކޮޅު ހުރިހާ މެންބަރުން ނާއި، ރައީސް ޔާމީނަށް ހެޔޮ އެދޭ ހުރިހާ ފަރާތެއްވެސް އެ މުޒާހަރާ ގައި ބައިވެރިވުމަށް އެދިފައެވެ.
މިއަދު އިދިކޮޅުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕީއެންސީގެ ރައީސް ޢަބްދުއްރަޙީމް (އަދުރޭ) ވަނީ ރައީސް ޔާމީނުގެ މަައްޗަށް ކުރިމިނަލް ކޯޓުން އިއްވި ހުކުމަކީ "ހަރާމް" ހުކުމެއްކަމަށާ، އެހެންކަމުން އެކަމާއި ދެކޮޅަށް މުޅި ރާއްޖޭގައި އިހްތިޖާޖް ކުރަން ނިންމަވާފައިވާ ކަމަށް ވިދާޅުވެފައެވެ.
އަދި ހުކުރު ދުވަހުގެ މުޒާހަރާ ރާވާ އެކަން ފުލުހުންނަށްވެސް އަންގާފައިވާ ކަން ފާހަގަކުރައްވައި އަދުރޭ ވަނީ އިހުތިޖާޖު ކުރުމާއި މުޒާހަރާ ކުރުމަކީ އަސާސީ ހައްގެއް ކަމުން އެ ހައްގަށް ފުލުހުން ފުރުސަތު ދޭނެ ކަމަށް އުންމީދު ކުރައްވާ ކަމަށް ވިދާޅުވިއެވެ.
"ނަމަވެސް ރައީސް ޔާމީންގެ ސަޕޯޓަރުން ތިބީ ފުލުހުން އެ ފުރުސަތު ނުދިނަސް އެކަން ނުކުރާ ގޮތަކަށް ނޫން. ކުރެވެން އޮތް ގޮތަކަށް ކުރާނެ. ކޮންމެ ރަށެއްގައިވެސް ކުރާނެ،" އަދުރޭ ވިދާޅުވި އެވެ.
މިއާއެކު އޭނާ، ވިދާޅުވީ ދަށުކޯޓުން ރައީސް ޔާމީން ޖަލަށް ލާން ހުކުމް ކުރި ނަމަވެސް މަތީ މަރުހަލާއިން އެމަނިކުފާނު ސަލާމަތްވާނެ ކަމުގެ ޔަގީންކަން އެބައޮތް ކަމަށެވެ.
އަދި ޖަލުން މިނިވަންވެވަޑައިގަތުމާއެކު ރައީސް ޔާމީން ޤައުމު ސަލާމަތްކުރެއްވުމަށް ފެއްޓެވި ހަރަކާތް ކުރިއަށް ގެންދާނެ ކަމަށާ، އެހެންކަމުން އެ މަސައްކަތުގައި ސާބިތުވެ ތިބުމަށް އިދިކޮޅު އިއްތިހާދަށް ތާއީދުކުރައްވާ އާންމުންގެ ކިބައިން އެމަނިކުފާނު އެދިވަޑައިގަންނަވާ ކަމަށްވެސް އަދުރޭ ވިދާޅުވި އެވެ.
ރައީސް ޔާމީނުގެ މައްޗަށް ކުރި މަނީލޯންޑަރިންގެ ދައުވާ އާއި ރިޝްވަތު ގަބޫލު ކުރެއްވުމުގެ ދައުވާ ސާބިތުވާކަމަށް ކަނޑައަޅައި ކުރިމިނަލް ކޯޓުން 11 އަހަރުގެ ޖަލު ހުކުމެއް އިއްވުމާ ގުޅިގެން ސިލްސިލާ ގޮތެއްގައި މާލޭގައި އިދިކޮޅު އިއްތިހާދުން އަންނަނީ އިހުތިޖާޖުކުރަމުންނެވެ.
Advertisement
This content is created and paid for by advertisers and does not involve Voice Journalists
