އެޗްޑީސީއިން ވިޔަފާރި އުސޫލުން ދޫކޮށްފައިވާ ކޮމާޝަލް ޔުނިޓުތަކުގެ ސިލްސިލާ ސާވޭތަކެއް ފަށައިފިއެވެ.
މި ސާވޭގެ ދަށުން، ޔުނިޓްތަކުގައި އެގްރިމަންޓާއި ހިލާފު އެއްވެސް މަސައްކަތެއް ކުރޭތޯއާއި އަދި ޔުނިޓު ހިންގަމުންދަނީ ދެވިފައިވާ ބޭނުަމަށްތޯ ބަލާނެ ކަމަށް އެޗްޑީސީން މައުލޫމާތުދިނެވެ.
އެޗްޑީސީގެ އެސިސްޓެންޓް އެސްޓޭޓް އޮފިސަރ އައިމިނަތު ޝަހާ މުހައްމަދު ވިދާޅުވީ، އެޗްޑީސީއިން ވިޔަފާރި އުސޫލުން ދެވިފައިވާ ހުރިހާ ޔުނިޓްތަކެއްގެ ސާވޭ ކުރިއަށް ގެންދާނެ ކަމަށާއި އެގޮތުން އެންމެ ފުރަތަމަ ސާވޭ ކުރިއަށް ގެންގޮސްފައި ވަނީ ރަށުމާރުކޭޓުޔައާއި ގަރާޖު ޔުނިޓްތަކުގައި ކަމަށެވެ.
"މި ސާވޭގެ މައިގަނޑު މަގުސަދަކީ އެ ޔުނިޓު ހަވާލު ކޮށްފައިވާ މައިގަނޑު މަގުސަދު ހާސިލުވޭތޯ ބެލުން. އެ ދެވިފާވާ ބޭނުމަށްތޯ ޔުނިޓް ބޭނުން ކުރެވެމުން ދަނީ. އަދި މަހުން މަހަށް ކުލި ދައްކާތޯ ބެލުން. ހަމަ އެގޮތަށް، ޔުނިޓް ދޫކުރެވިފައިވާ ފަރާތުން އެއްބަސްވުމާ ހިލާފަށް އެހެން ފަރާތަކަށް ކުއްޔަށް ދެވިފާ ވޭތޯ ބެލުން،" ޝަހާ ވިދާޅުވިއެވެ.
މީގެ އިތުރުން، އެއްބަސްވުމުގެ އިތުރުން ޔުނިޓް ބޭރުގައި އެއްޗެހި ބަހައްޓާތޯވެސް ބަލާނެ ކަމަށް ޝަހާ ވިދާޅުވިއެވެ.
މިއީ ތަކުރާރުކޮށް ކުރިއަށް ގެންދެވެމުންދާނެ ސާވޭއެއް ކަމަށް އެޗްޑީސީއިން މައުލޫމާތު ދިނެވެ. ސާވޭގައި ފާހަގަ ކުރެވޭ ކަންތައްތައް ރަނގަޅު ކުރުމަށް އެޗްޑީސީން އަންގާނެ ކަމަށާއި އެހެންކަމުން އެޗްޑީސީން ފާހަގަކުރި ކަންތައްތައް ހުރިހާ ޓެންޓެންޓުންވެސް ރަނގަޅު ކޮށްލުމަށް އެޗްޑީސީން ވަނީ އިލްތިމާސް ކޮށްފައެވެ.
Advertisement
This content is created and paid for by advertisers and does not involve Voice Journalists
