ކުރީގެ ރައީސް، އަދި އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް ޔާމީން ޖަލަށް ގެންދިޔަތާ ތިންވަނަ ދުވަހު އެމަނިކުފާނުގެ ވާހަކައިގެ ތެދުކަން ހާމަވެގެން ގޮސްފައިވާ ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެންބަރު މުހައްމަދު ސައީދު ވިދާޅުވެއްޖެއެވެ. 

ރޭގައި އޮތް އިދިކޮޅު ކޯލިޝަންގެ ޖޮއިންޓް ސެނެޓްގެ ބައްދަލުވުމުގައި ވާހަކަ ދައްކަވަމުން ސައީދު ވިދާޅުވީ، ރައީސް ޔާމީން ޖަލަށް ގެންދިޔުމުގެ ކުރިން، އެމަނިކުފާނުގެ ޢާއިލާއާއި ބައްދަލުކުރެއްވުމުގެ ފުރުސަތު ދެއްވުމަށް އެދިލެއްވި ކަމަށެވެ. އެހެން ނަމަވެސް، އެ ފުރުސަތު ވެސް އެމަނިކުފާނަށް ނުދެއްވުމުން މި ސަރުކާރުގެ އަނިޔާވެރިކަމާއި، އިންސާނިއްޔަތު ކަމެއް ނެތް ކަން ހާމަވެގެން ދޮޔަ ކަމަށެވެ.  

އަދި ރައީސް ޔާމިން އެދިލައްވާ ފަދައިން އެންމެ ފަހުވަގުތާއި ޖެހެންދެންވެސް އިދިކޮޅު ކޯލިޝަން އޮންނާނީ ފަހުވަގުތާއި ޖެހެންދެންވެސް އެކީ އެކަތިގަނޑަކަށް ކަމަށްވެސް ސައީދު ވިދާޅުވި އެވެ. 

Advertisement

ސައީދު ވިދާޅުވީ، ސަބަބު ވެރި އިންސާނެއްގެ ސިކުޑިން ވިސްނާލުމުން އެނގިގެން ދަނީ ރައީސް އިބްރާހިމް މުހައްމަދު ޞާލިހަކީ ވެރިކަން ކުރުމުގެ ގާބިލް ކަން ނެތް ބޭފުޅެއް ކަމަށެވެ. އަދި ހަމަ އެހެންމެ، އެފަދައިން ވިސްނާލުމުން އެމަނިކުފާނު އުތުރު ތިލަފަޅު އެއްބަސްވުމާއި ގުޅިގެން ދެއްކެވި ވާހަކައިގެ ތެދުކަންވެސް ހާމަވެގެން ގޮސްފައިވާ ކަމަށެވެ.  

"ރައީސް ޔާމީން ޖަލަށް ގެންދިޔަތާ ތިންވަނަ ދުވަހު ރައީސް ޔާމީން ވިދާޅުވި ވާހަކައިގެ ތެދުކަން ހާމަވެގެން އެ ދިޔައީ. މިއަދު އުތުރު ތިލަފަޅު އެ ހަވާލު ކުރީ އިންޑިއާގެ ރެއިލްވޭ ކުންފުންޏަކާ." ސައީދު ވިދާޅުވި އެވެ.

މީގެ އިތުރުން، ކުރިއަަށް އޮތް ތަނުގައި ރާއްޖޭގެ މައި ދޮރޯށިވެސް އިންޑިއާގެ ޕޯޓަށް ވިއްކާލާފާނެ ކަމަށް ސައީދު ވިދާޅުވި އެވެ.

އަދި ރައީސް ޔާމީން ޖަލަށް ލައިގެން، ދިވެހިރާއްޖެ ބޭރުގެ ބަޔަކަށް ވިއްކާލަން މަސައްކަތް ކުރާ ކުރުން، ސަބަބު ވެރި އިންސާނެއްގެ ސިކުޑިން ވިސްނާލުން ދިވެހިރާއްޖޭގެ ދިފާއީ ބާރަށް ނުވުސްނެނީ ކީއްވެތޯވެސް ސައީދު ވަނީ ސުވާލު ކުރައްވާފައެވެ. 

އުތުރު ތިލަފަޅުގައި ކޯސްޓްގާޑުގެ އުޅަނދުތައް ބެހެއްޓޭ ގޮތަށް ބަނދަރެއް ނުވަތަ ޑޮކްޔާޑެއް ހަދަން 186 މިލިއަން ޑޮލަރު (2.9 ބިލިއަން ރުފިޔާ) އަށް އިންޑިއާގެ ކުންފުންޏެއް ކަމަށްވާ ރެއިލް ވިކާސް ނިގަމް އާ ހަވާލު ކުރަން ސަރުކާރުން ނިންމާފައިވާ ކަމަށް އިންޑިއާގެ ނޫހަކުން ވަނީ ރިޕޯޓް ކޮށްފައެވެ. މިއީ އިންޑިއާގެ ރެއިލްވޭ މަޝްރޫއުތައް ހިންގާ ކުންފުންޏެކެވެ.