އިދިކޮޅު ޕީޕީއެމް-ޕީއެންސީގެ ކޯލިޝަނުގެ ރިޔާސީ ކެންޑިޑޭޓް، ރައީސް ޔާމީން އަބްދުލްޤައްޔޫމު ޖަލުން މިނިވަންކޮށް އަލުން ވެރިކަމަށް ގެނައުމަށް އެ ކޯލިޝަނުގެ ސެނެޓުން ފާސްކުރައްވައިފިއެވެ.

މީރުމާ ހޮޓަލުގައި ޕީޕީއެމް-ޕީއެންސީގެ ޖޮއިންޓް ސެނެޓުން، ރޭ ބޭއްވި ކުއްލި ބައްދަލުވުމުގައި މި ޤަރާރު ފާސްކުރައްވައިފައިވަނީ ބައްދަލުވުމުގައި ބައިވެރިވެވަޑައިގެންނެވި 89 ސެނެޓަރުންގެ ތާއީދާ އެކުގައެވެ.

މި ޤަރާރުގައި ވާގޮތުން، ކްރިމިނަލް ކޯޓުން، ރައީސް ޔާމީންގެ މައްޗަށް 11 އަހަރުގެ ޖަލު ޙުކުމެއް އިއްވީ އިސްލާމީ ޝަރީޢަތާ ޤާނޫނުތަކާވެސް ޚިލާފަށެވެ. އަދި މިއީ އެމަނިކުފާނުގެ ޢަދާވާތްތެރި ފާސިގު ހެކިވެރިން ބޭނުންކޮށްގެން އިއްވި ފާސިޤު ހަރާމް ޙުކުމެއް ކަމަށްވެސް ޤަރާރުގައިވެއެވެ.

Advertisement

މިކަމާއި ގުޅިގެން ރައީސުލްޖުމުހުރިއްޔާ އިބްރާހިމް މުހައްމަދު ޞާލިހް އިސްތިއުފާދިނުމަށާއި ރައީސް ޔާމީން މިނިވަންކުރަން ބަޔާންތައް ނެރުމަށާއި މުޅި ރާއްޖޭގައި އިހްތިޖާޖްކުރަން އެ ގަރާރުގައި ގޮވާލާފައިވެއެވެ.

މި ހަފްތާގެ ހުކުރު ދުވަހުވެސް "ހަރާމް ޙުކުމް" މި ނަމުގައި، ރައީސް ޔާމީން މިނިވަން ކުރުމަށް ގޮވައިލައި މުޅި ރާއްޖޭގައި އަޑު އުފުލުމަށް އިދިކޮޅުން ވަނީ ނިންމައިފައެވެ.

އިދިކޮޅު ސެނެޓުން އެއްބަސްވި ގަރާރުގައި އިތުރަށް ބުނީ، ރައީސް ޔާމީން ޖަލަށްލީ އެމަނިކުފާނު ރައްޔިތުންގެ އުއްމީދުތައް ހަގީގަތަކަށް ހަދައިދޭން މަސައްކަތް ކުރައްވާތީ އިންތިހާބުގައި ވާދަކުރުމުގެ ފުރުސަތު ނުދިމަށެވެ.

ވ.އާރަށް ކުއްޔަށް ދިނުމުގެ މުއާމަލާތާ ގުޅިގެން ދައުލަތުން އިދިކޮޅު އިއްތިހާދުގެ ރިޔާސީ ކެންޑިޑޭޓް ރައީސް ޔާމީނުގެ މައްޗަށް ކުރި 2 ދައުވާ ސާބިތުވާކަމަށް ކަނޑައަޅައި އެމަނިކުފާނު 11 އަހަރަށް ޖަލަށްލުމަށް ކުރިމިނަލް ކޯޓުން ވަނީ ހުކުމް ކޮށްފަ އެވެ. 

މިއީ ހަރާމް ހުކުމެއް ކަމަށް އިދިކޮޅުން ބުނާއިރު، އެމަނިކުފާނުގެ ގާނޫނީ ވަކީލުންގެ ޓީމުން ވަނީ، އެ ހުކުމް އިސްތިއުނާފް ކުރާނެ ކަމަށާއި، އިސްތިއުނާފީ ކޯޓުން، އެމަނިކުފާނު މިިނިވަން ކުރެވޭނެ ކަމުގެ ފުރިހަމަ ޔަޤީންކަން އެބައޮތް ކަމަށް ވިިދާޅުވެފައެވެ.