ކުރީގެ ރައީސް އަދި އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް މިނިވަންކުރުމަށް ގޮވާލާ އިދިކޮޅުން މާދަމާ ކުރިއަށް ގެންދާ އިހްތިޖާޖް ކުރިއަށް ގެންދާނީ ފުލުހުންގެ ޗާޓާއި އެއްގޮތަށް ކަމަށް އެ ކޯލިޝަނުން ބުނެފިއެވެ.

މާދަމާގެ އިހްތިޖާޖާއި ގުޅޭ ގޮތުން ފުލުހުންނާއި ބައްދަލު ކުރެއްވުމަށް ފަހު، ބޭއްވި ނޫސްވެރިންގެ ބައްދަލުވުމުގެ ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވީ، އިދިކޮޅުން މާދަމާ ކުރިއަށް ގެންދާ މުޒާހަރާ ކުރިއަށް ގެންދާނީ ފުލުހުން ދައްކާ ފައިވާ ރޫޓަކުން، އެ އިދާރާއިން ހުއްދަދިން ގޮތަށް ކަމަށެވެ. 

އަދި އެ އިހްތިޖާޖް ވަރަށް ގާތުން މޮނިޓަރ ކޮށް ސެކިޔުރިޓީ ގެ ކަންކަންވެސް ބަލަހައްޓައި ދޭނެކަމަށް ފުލުހުން ވިދާޅުވެފައިވާ ކަން ފާހަގަކުރައްވައި ޝުޖާއު ވަނީ އެ އިހްތިޖާޖް ގައި ދިވެހި އެންމެހައި ރައްޔިތުން، ޚާއްސަކޮށް، ރައީސް ޔާމީނަށް ތާއިދުކުރާ ފަރާތްތަކުން ބައިވެރިވުމަށް އެދިލައްވާފައެވެ. 

ޝުޖާއުގެ އިތުރުން، އިދިކޮޅު ކޯލިޝަންގެ ހަރަކާތު ކޮމިޓީގެ ރައީސް މުހައްމަދު އިސްމާއިލް ވިދާޅުވީ، މާދަމާގެ އިހްތިޖާޖް ކުރިއަށް ދާނީ ފުލުހުން ދީފައިވާ ރޫޓާއި އެއްގޮތަށް ކަމަށާއި އެކަމުގެ ޔަގީންކަން ފުލުހުންނަށްވެސް ދީފައިވާނެ ކަމަށެވެ. 

"އަޅުގަނޑުމެން ފުލުހުންނަށް ވަރަށް ބޮޑަށް ޔަގީންކަން ދިނިން އަޅުގަނޑުމެން ފުލުހުން އެދިވަޑައިގަންނަވާ ގޮތުގެ މަތިން، ސުލްހަވެރިކަމާއި އެކީ، ދީފައި އޮތް ޗާޓުގެ ތެރެއިން އަޅުގަނޑުމެން މަސައްކަތް ކުރާނެ ކަމަށް."

"އަޅުގަނޑުމެން އެއްވެސް އިރެއްގައި، މަގުމަތީގައި ކޮންމެ ރެއަކު މިހާރު މި ކުރަމުންދާ މުޒާހަރާ ތަކުގައިވެސް އަދި ކުރިން އަޅުގަނޑުމެން ކޮށްފައިވާ މުޒާހަރާ ތަކުގައިވެސް، ފުލުހުން ގެ އަމުރަށް ނުކިޔަމަންތެރިވެފައެއް ނޯންނާނެ. ފުލުހުންގެ ގަޔަށް ބޮލަށް އަރާފައެއް ނޯންނާނެ. ހަޑި ބަހުން ވާހަކަ ދައްކާފައެއް ނޯންނާނެ. ޕީޕީއެމް އަކީ ކޮންމެ ކަމެއް ކުރިޔަސް އަބަދުވެސް އަޚްލާގީ މިންގަނޑު ތައް ހިފަހައްޓާ ބައެއް." މުހައްމަދު އިސްމާއިލް ވިދާޅުވި އެވެ.

މުހައްމަދު އިސްމާއިލް އިތުރަށް ވިދާޅުވީ، މާދަމާގެ އިހްތިޖާޖަކީ ފުލުހުންނާއި ގުޅިގެން ހިންގާ ސުލްހަވެރި އިހްތިޖާޖެއް ކަމަށާ، އެހެންކަމުން، ރައީސް ޔާމީނަށް ތާއީދު ކުރާ، އަދި އިންޑިޔާގެ އަޅުވެތި ކަމުން ރާއްޖެ ސަލާމަތް ކުރަން ބޭނުންވާ އެންމެހައި ފަރާތްތަކުން މާދަމާ 3:45 އަށް ޕީޕީއެމް އޮފީސް ދޮރުމައްޗަށް ނުކުތުމަށް އެދިލައްވާ ކަމަށެވެ.