މާލެ  އަދި ވިލިމާލޭ ގޭގެއިން ކުނި ނެގުމުގެ މަސައްކަތް ހަވާލުވެފައިވާ ވެމްކޯ އިން، ރައްޔިތުންގެ އަތުން  އެކަމަށް ފައިސާ ނެގި ނަމަވެސް ކުނި އުކައި ނުދޭ މައްސަލަ ފެންމަތިވެއްޖެއެވެ. 

މީގެ ކުރިން ގޭބީސީތަކުން ކޮތަޅުތަކަށް އަޅައިގެން ނެރޭ ކުނި ވެމްކޯއިން ނަގަމުންދިޔަ ނަމަވެސް ރޭ މަގުތަކަށް ކޮތަޅުތަކަށް އަޅާފައި ނެރުނު ކުނި އެ ކުންފުނިން ނުނަގައެވެ.

އެކަމާއި ގުޅިގެން މާލެ ސިޓީ ކައުންސިލްގެ މޭޔަރު ޑރ.މުހައްމަދު މުޢިިއްޒު ވިދާޅުވީ، އެ ކުންފުނިން އެފަދައިން ކަން ކުރީ ގަސްތުގައި ކަމަށެވެ.

Advertisement

އަދި އެ ގޮތުން ގޭގެއިން ނެރެފައިވާ ކުނީގެ 10 ޓަނު ކުނި މިހާރުވެސް މަގުތަކުން ނަގާފައިވާ ކަން ފާހަގަކޮށް މުއިއްޒު ވިދާޅުވީ، މާލޭގެ މަގުތައް ސާފުކޮށް ބެހެއްޓުމަށް ކުރަންޖެހޭ ހުރިހާ ކަމެއް އެ ކައުންސިލުން ކުރާނެ ކަމަށެވެ.

މިކަމާއި ގުޅިގެން ވެމްކޯގެ ބަހެއް ލިބޭތޯ ، ވެމްކޯގެ މީޑިއާ އޮފިޝަލް ގެ އަރިހުން ސުވާލު ކުރުމުން އޭނާ ވިދާޅުވީ ، މެނޭޖްމަންޓް ގެ ބަހެއް ނުލިބޭތީ އެއްޗެއް ދެންނެވެން ނެތް ކަމަށެވެ. 

މާލެއާއި ވިލިމާލޭގެ އާއްމު ތަންތަން ސާފުކުރުމާއި ކުނިނެގުމުގެ މަސައްކަތް ވެމްކޯއާ ހަވާލުކުރި އެއްބަސްވުން އާނުކޮށް ސިޓީ ކައުންސިލުން މިހާރު ވަނީ އެކަން  ކުރަން ފަށައިފަ އެވެ. އެ މަސައްކަތް ކުރިއަށް ގެންދާ ގޮތާ ބެހޭ ގޮތުން މައުލޫމާތުދޭން އިއްޔެ ބޭއްވި މީޑިއާ ބްރީފިން އެއްގައިވެސް  މުއިއްޒު ވިދާޅުވީ ގޭގެއިން ނަގާ ކުނި ވެމްކޯއިން އެއްކުރާ ތަންތަނުން ރޭ ކުނި ނުނަގާ ކަމަށެވެ. އެއީ "ސިޔާސީ ގޮތުން ޖެއްސުންކުރަން ކުރިކަމެއް" ކަމަށް އޭނާ ސިފަކުރެއްވި އެވެ.

އެގޮތަށް ކަންތައްް ކުރާ އިރު ވެމްކޯ އަކީ ދައުލަތުން ފައިސާދޭ ސަރުކާރު ކުންފުންޏެއް ކަމަށާއި ރައްޔިތުން ވެސް އެކުންފުންޏަށް ފައިސާ ދޭ ކަމަށް އޭނާ ވިދާޅުވި އެވެ.