ވެންކޯއިން ގަސްތުގައި ނުނެގި ކުނި، މާލޭ ސިޓީ ކައުންސިލުން ނަގަމުންދާ ކަމަށާ، މިވީހާތަނަށް 100 އަށްވުރެ ގިނަ ޓަނުގެ ކުނި ނަގާފައީވާ ކަމަށް މާލެ ސިޓީ ކައުންސިލްގެ މޭޔަރު ޑރ މުހައްމަދު މުޢިއްޒު ވިދާޅުވެއްޖެއެވެ.

ފާއިތުވި ދެތިން ދުވަހުގެ ތެރޭގައި މާލެ ސިޓީގެ މަގުތަކާއި އާންމު ތަންތަނުގައި ގިނަ އަދަދަކަށް ކުނިވާ ޒާތުގެ ކުންޏާއި އެހެނިހެން ކުނިތައް ޖަމާވެ އާންމުންގެ ޝަކުވާތައް ގިނަވެފައިވާ ކަމަށާ، އަދި އާންމު ސިއްހަތަށް ނުރައްކާ ވެދާނެ ފަދަ ހާލަތަކަށް ހިނގައިދާނެ ކަމުގެ ބިރު އޮތުމާއި ގުޅިގެން، މިނިސްޓްރީ އޮފް އެންވައިރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީގެ އިރުޝާދުގެ ދަށުން ވެމްކޯއިން މާލޭގެ މަގުތަކާއި އާންމު ސަރަހައްދުތައް ސާފު ކުރުމުގެ މަސައްކަތް އިއްޔެ ފަށާފައިވާ ކަމަށް ވެމްކޯއިން ބުނެފައި ވެއެވެ.

މިކަމާއި ގުޅިގެން މުޢިއްޒު ވިދާޅުވީ، ވެމްކޯއަށް ފައިސާ ދައްކާ އެތައް ސަތޭކަ ގެއަކުން ވެމްކޯއިން ބުނެގެން ކުނި ނެރެމުންދަނީ ގޭގެ ދޮރުމައްޗަށް ނުވަތަ މަގުގެ ވަކި ތަނަކަށް ކަމަށެވެ. 

"ދެން އެ ކުނި މީގެ ދެދުވަސް ކުރިން ނެގުން ހުއްޓާލައި އަނެއްކާ ނަގަން ފަށާފައި އެއީ ސިޓީ ކައުންސިލްގެ މަސައްކަތް ސިޓީ ކައުންސިލަށް ނުވެގެން ކުރާ ކަމެކޭ ބުނީމާ، އަދި ސަރުކާރުން ސްޕޮންސާ ކޮށްގެން އެއް ޚަބަރެއް ހުރިހާ ނޫހެއްގައި އެއްފަހަރާ ޖެހީމާ، ވިސްނާލައިފި ކޮންމެ މީހަކަށް މިވީ ގޮތް ވަރަށް ރަނގަޅަށް ސާފުވެގެން އެބަދޭ." މުޢިއްޒު ވިދާޅުވިއެވެ. 

މުޢިއްޒު އިތުރަށް ވިދާޅުވީ، ކައުންސިލްގެ ޒިންމާ، ފަސްޖެހުމެއްނެތި ކައުންސިލުން އަދާ ކުރަމުންދާނެ ކަމަށާ، ވެމްކޯއިން ގަސްތުގައި ނުނެގި ކުނި ކައުންސިލުން ނަގަމުންދާ ކަމަށެވެ. 

އެގޮތުން ވޭތުވެދިޔަ 24 ގަޑިއިރު ތެރޭގައި 100 ޓަނުގެ ކުނި ނަގާފައިވާ ކަމަށްވެސް މުޢިއްޒު ވިދާޅުވިއެވެ