ވޯލްޑް ކަޕް ފުޓްބޯޅަ މުބާރާތަށް ފަހު ރެއާލް މެޑްރިޑް ކުޅުނު ފުރަތަމަ މެޗުގައި، މިރޭ ރަށުން ބޭރުގައި ވަލަޑޮލިޑް އާއި ވާދަކޮށް 2-0 އިން މޮޅުވެ ވަގުތީ ގޮތުން ސްޕެނިޝް ލަލީގާ ތާވަލުގެ އެއްވަނަ އަށް އެޓީމު ޖެހިލައިފިއެވެ.

ބެންޒެމާ ލަނޑުޖެހުމަށް ފަހު ރޮޑްރިގޯ އާއި އެކު އުފާފާޅުކުރަނީ

މެޗުގެ ފުރަތަމަ ހާފުގައި ކަރީމް ބެންޒެމާ، ވިނީޝިއަސް އަދި އަސެންސިއޯއަށް ލަނޑުޖަހާނެ ރަގަޅު ހުސް ފުރުސަތުތަކެއް ލިބި ބޭނުން ނުހިފުނު އިރު ފުރަތަމަ ހާފުގެ ކުޅުން ނިމިފައިވަނީ 0-0 ން ދެޓީމު އެއްވަރުވެގެން ނެވެ. އަދި މެޗުގެ ދެވަނަ ހާފުގެ ފަހު 10 މިނެޓާއި ހަމައަށް ވެސް ވަލަޑޮލިޑް ކުޅުންތެރިން އާއީ ވަރަށް ރަގަޅަށް ޑިފެންސް ކުރަމުންނެވެ.

Advertisement

ރެއާލްގެ ފުރަތަމަ ލަނޑު ދެވަނަ ހާފުގެ 82 ވަނަ މިނެޓްގައި ލިބުނު ޕެނަލްޓީއަކުން ކާމިޔާބުކޮށްދިނީ އެޓީމުގެ ކެޕްޓަން ކަރީމް ބެންޒެމާ އެވެ. މިއީ ވަލަޑޮލިޑް ޕެނަލްޓީ އޭރިއާ ތެރެއިން އެޓީމުގެ ސްޕެނިޝް ޑިފެންޑަރ ހާވިއޭ ސަންޗޭޒް އަތުގައި ބޯޅަ ޖެހުމުގެ ސަބަބުން ރެފްރީ ދިން ޕެނަލްޓީއެކެވެ. އަދި މި ޕެނަލްޓީއާއި މެދު ހިތްހަމަނުޖެހިގެން އެޓީމުގެ ފޯވާޑް ސާޖިއޯ ލިއޯން ބަދަލު ރެފްރީ އާއި މުހާތަބުކޮށް ކުޅިވަރުގެ ރޫހާއި ޚިލާފުވެފައި ވާތީ ރެފްރީ ވަނީ އޭނާއަަށް ސީދާ ރަތް ކާޑެއް ދައްކައި ދަނޑުން ފޮނުވާލާފައެވެ.

މިއާއެކު ވަލަޑޮލިޑް އިން އެއް ކުޅުންތެރިއަކު މަދުވުމުގެ ފައިދާ ނަގައި ރެއާލް މެޑްރިޑުން ވަނީ އެޓީމުގެ ދެ ވަނަ ލަނޑު ފަހުހާފުގެ 88 ވަނަ މިނެޓްގައި ކާމިޔާބުކޮއްފައެވެ. މި ލަނޑުވެސް އެޓީމަށް ކާމިޔާބުކޮށްދިނީ ފުރަތަމަ ލަނޑު ކާމިޔާބުކޮށްދިން ކަރީމް ބެންޒެމާ އެވެ.

މިއީ ފުރާންސްގެ ޒުވާން މިޑްފީލްޑަރ ކަމަވިންގާ ތަނަވަސްކޮށްދިން ފުރުސަތެއްގައި ބެންޒެމާ ކާމިޔާބު ކުރި ގޯލެކެވެ. މީރޭގެ މެޗުގައި ބެންޒީމާ ކާމިޔާބު ކުރި ދެ ލަނޑާއި އެކު ލީގުގައި ކާމިޔާބުކުރި ލަނޑުގެ އަދަދު މިސީޒަނުގައި ވަނީ 7 އަށް އަރާފައެވެ.

މިރޭގެ މެޗުން ލިބުނު ތިން ޕޮއިންޓާއި އެކު 15 މެޗުން 38 ޕޮއިންޓް ހަމަކޮށް ލަލީގާ ތާވަލުގެ އެއްވަނަ ވަގުތީ ގޮތުން މެޑްރިޑަށް ވަނީ ލިބިފައެވެ. ދެވަނާގައި ވާ ބާސެލޯނާ މީރޭ އަމިއްލަ ދަނޑުގައި އެސްޕަނިއޯލް އާއަި ވާދަކުރާ މެޗުން އެޓީމު މޮޅުވެއްޖެނަމަ ލީގު ތާވަލުގެ އެއްވަނަ އެޓީމަށް އަލުން ލިބޭނެއެވެ. މިވަގުތު ބާސާ ދެވަނާގައި އޮތީ 14 މެޗުން ލިބުނު 37 ޕޮއިންޓާއި އެކުއެވެ.

މިރޭގެ މެޗުން ބަލިވި ވަލަޑޮލިޑް އަށް 15 މެޗުން ލިބުނު 17 ޕޮއިންޓާއި އެކު އެޓީމު އޮތީ ލީގު ތާވަލުގެ 15 ވަނާގައެވެ.