އެމްޑީޕީގެ ރިޔާސީ ޕްރައިމަރީގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ވާދަކުރައްވަން ނިކުމެވަޑައިގެން ހުންނެވި މަޖިލީހުގެ ރައީސް މުހައްމަދު ނަޝީދާއި، އޭނާއަށް ތާއީދުކުރައްވާ މެމްބަރުންގެ މަގްސަދަކީ އެމްޑީޕީއަށް ވެރިކަން ގެއްލުވާލުންކަމަށް މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސެއިން) ވިދާޅުވެއްޖެއެވެ. 

އަނދުން ހުސެއިން ވިދާޅުވީ ރައީސް އިބްރާހިމް ސޯލިހު ވެރިކަމަށް ވަޑައިގަތުމަށްފަހު އެންމެ ބޮޑު އިސްކަމެއް ދެއްވީ ތަފާތުކުރުމެއް ނެތި ރައްޔިތުންގެ އަސާސީ ބޭނުންތައް ފުއްދަވާދެއްވުމަށް ކަމަށެވެ. އެގޮތުން އެމަނިކުފާނުގެ ފުރަތަމަ ދައުރު ނުމެންވާއިރަށް ރާއްޖޭގެ ހުރިހާ ރަށެއްގައި ފެނާއި ނަރުދަމާ ގާއިމުކުރަައްވާނެކަމަށް ވިދާޅުވެފައިވާކަމަށް އަނދުން ހުސެއިން ވިދާޅުވިއެވެ. 

އެއާއެކު އޭނާ ވިދާޅުވީ ރައީސް ނަޝީދު ގަބޫލުފުޅުކުރައްވަން ބޭނުންފުޅު ނުވި ނަމަވެސް، ރައީސް ސޯލިހު އަތޮޅުތެރެއަށް ތަރައްގީ ގެނެސްދެއްވާފައިވާކަމަށެވެ. އަދި ރައީސް ނަޝީދު ކެމްޕޭނަށް އަތޮޅުތެރެއަށް ވަޑައިގަތުމުން ރައީސް ސޯލިހުގެ ތަރައްގީ ފެނިވަޑައިގަންނަވާނެކަމަށް އޭނާ ވިދާޅުވިއެވެ. 

Advertisement

އެވާހަކަތަކާއި ގުޅުވާ އަނދުން ހުސެއިން ވިދާޅުވީ ނަޝީދާއި އޭނާގެ ފެކްޝަންގެ މަގްސަދަކީ އެމްޑީޕީއަށް ވެރިކަން ގެއްލުވާލުންކަމަށެވެ. 

އަނދުން ހުސެއިންގެ ވާހަކައިގައި ވަނީ އެމްޑީޕީގެ ފުރަތަމަ ވެރިކަމުގައި ނަޝީދު އިސްތިފާދެއްވި ގޮތާއި ގުޅިގެންވެސް ފާޑުވިދާޅުވެފައެވެ. މީގެ ކުރިން އެމްޑީީޕީގެ މެމްބަރުން އިއްތިފާގުވާ ގޮތުގައި ނަޝީދުގެ ވެރިކަން ނިމިގެން ދިޔައީ ބަޣާވާތަކުންނެވެ. އަދި ނަޝީދަށް އިސްތިއުފާދެއްވަން މަޖުބޫރުވީކަމަށް އޭރު އެމްޑީޕީއިން ދިޔައީ ބުނަމުންނެވެ. 

އެހެން ނަމަވެސް އަނދުން ހުސެއިން ވިދާޅުވީ ނަޝީދުގެ ވެރިކަން ނިމިގެން ދިޔައީ ރިއެކްޓު ކުރައްވަން އެނގިވަޑައިނުގަތުމުގެ ސަބަބުންކަމަށެވެ. އަދި ރައީސް ނަޝީދު އެދުވަހު ކުރެއްވި ފަދަ ގޮތަކަށް ރައީސް ސޯލިހު ދުވަހަކުވެސް ރިއެކްޓު ނުކުރައްވާނެކަމަށް އަނދުން ހުސެއިން ވިދާޅުވިއެވެ.