ސައުދީ އަރަބިއާގެ ވެރިރަށް ރިޔާޒަށް ނިސްބަތްވާ އަލް ނަސްރު އެފްސީ އަކީ 1955 ވަނަ އަހަރު އުފެދުނު ކުލަބެކެވެ. ސައުދީ ޕްރޯ ލީގުގެ ދެ ވަނާގައި މިވަގުތު އޮތް އަލް ނަސްރު އެފްސީ އަކީ އެގައުމުގެ ފުޓްބޯޅަ ތާރީޚްގައި އެންމެ ކާމިޔާބުކު އެއް ކުލަބެވެ. 

ޑޮމެސްޓިކް ލެވެލްގައި އެ ކްލަބުން ވަނީ ނުވަ ޕްރިމިއާ ލީގާއި ހަ ކިންގްސް ކަޕް، ތިން ކްރައުން ޕްރިންސް ކަޕް، ތިން ފެޑެރޭޝަން ކަޕްގެ އިތުރުން ސައުދީ ސުޕަ ކަޕް ދެ ފަހަރަށް ކާމިޔާބުކޮށްފަ އެވެ. ބައިނަލްއަގުވާމީ ފެންވަރުގައި އެޓީމުން ވަނީ ދެ ޖީސީސީ ޗެމްޕިއަންސް ލީގު ކާމިޔާބުކޮށް، 1998 ވަނަ އަހަރު އޭޝިއަން ކަޕް ވިނަރސް ކަޕާއި އޭޝިއަން ސުޕަ ކަޕާއި އެކު އޭޝިއާގެ އެންމެ ޝަރަފުވެރި ދެ މުބާރާތް ކާމިޔާބުކޮށްފައެވެ.

މިރްސޫލް ޕާކް

އެކުލަބުގެ ހޯމް މެޗުތައް ކުޅެ މިރްސޫލް ޕާކް އަކީ 25000 މީހުންގެ ޖާގައިގެ ސްޓޭޑިއަމް އެކެވެ. ހޯމް ޖަޒީގެ ކުލައަކީ ނުލާއި ރީނދުލެވެ. އަވޭ ޖަޒީގެ ކުލައަކީ ނުލާއި ކަޅުކުލައެވެ. 

އަލް ނަސްރު އެފްސީގެ ސްކޮޑްގައި ހިމެނޭ ޤައުމުން ބޭރު ކުޅުންތެރިންގެ ތެރޭގައި ބުރެޒިލް، ސްޕެއިން، ކެމަރޫން، އައިވަރީކޯސްޓް އަދި ކޮލަމްބިއާ އަށް ނިސްބަތްވާ ކުޅުންތެރިން ހިމެނެއެވެ. މީގެ ތެރޭގައި އެންމެ ފާހަގަކޮށްލެވޭ ކުޅުންތެރިންނަކީ އިގިރޭސި ކުލަބް އާސަނަލް އަދި އިޓަލީގެ ނަޕޯލީއަށް ކުޅުނު ކޮލަމްބިއާގެ ތަޖުރިބާކަރު ގޯލްކީއްޕަރު ޑޭވިޑް އޮސްޕިނާ، ބްރެޒިލްގެ ޤައުމީ ޓީމާއި ޖަރުމަންގެ ބަޔާން މިއުނިކްގެ ކުރީގެ ތަރި ލުއިޒް ގުސްޓާވޯ، ސްޕެއިންގެ ވިލަރެއާލްގެ ކުރީގެ ޑިފެންޑަރ ޔަލްވާރޯ ގޮންޒާލޭޒް ގެ އިތުރުން ނިމިދިޔަ ވޯލްޑް ކަޕް ފުޓްބޯޅަ މުބާރާތުގައި ވިދާލި ކެމަރޫންގެ ވިންސެންޓް އަބޫބަކަރް ފާހަގަކޮށްލެވެއެވެ.

އަލް ނަސްރުގެ ކުޅުންތެރިން ސަޕޯޓަރުންނާއި އެކު 

ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ހަތް އަހަރު ދުވަހުގެ އެއްބަސްވުމެއްގައި އަލް ނަސްރު އެފްސީ އާއި އެކު ސޮއި ކުރީ 30 ޑިސެންބަރ 2022 ދުވަހު އެވެ. މި ތާރީޚީ އެއްބަސްވުމަކީ މިހާތަނަށް ކުޅިވަރު ކުޅުންތެރިއަކަށް އެންމެ ބޮޑު އާމްދަނީއެއް ލިބޭ އެއްބަސްވުމެވެ. އަދި މި އެއްބަސްވުމުގައި ވަާގޮތުން ހަތް އަހަރު ދުވަހު ތެރޭގައި ކްރިސްޓިއާނޯ ރޮނާލްޑޯއަށް 1.2 ބިލިއަން ޕައުންޑްގެ އާމްދަނީއެއް ލިބޭނެއެވެ.

އަލް ނަސްރު އެފްސީގައި ރޮނާލްޑޯއަށް އަހަރަކު 173 މިލިއަން ޕައުންޑް، މަހަކު 14.4 މިލިއަން ޕައުންޑް، ހަފްތާއަކު 3.33 މިލިއަން ޕައުންޑް، ދުވާލަކު 476000 ހަތަރު ލައްކަ ހައްދިހަ ހަ ހާސް ޕައުންޑް، ގަޑިއިރަކަށް 19982 ނަވާރަ ހާސް ނުވަސަތޭކަ އަށްޑިހަ ދެ ޕައުންޑް އަދި ސިކުންތަކު 5.5 ޕައުންޑް ލިބެއެވެ.