އިގިރޭސި ޕްރެމިއާ ލީގުގައި ރަށުން ބޭރުގައި މިރޭ ވުލްވްސް އަތުން 1-0 ން މޮލުވެ މެންޗެސްޓަރ ޔުނައިޓެޑް ލީގުތާވަލުގެ ހަތަރު ވަނައަށް ޖެހިލައިފިއެވެ.

މިރޭގެ މެޗުގެ ފުރަތަމަ އެގާރައިގައި މެންޗެސްޓަރ ޔުނައިޓެޑްގެ ޓޮޕް ސްކޯރާ މާކަސް ރަޝްފޯޑަށް އެޓީމުގެ ކޯޗު އެރިކް ޓެން ހާގް ފުރުސަތު ދީފައި ނުވާއިރު، ބަދަލުގައި ކުޅެން ނުކުތް އާޖެންޓީނާގެ ޒުވާން ފޯވާޑް އަލެޖަންޑްރޯ ގާނާޗޯއަށް ފުރަތަމަ ހާފުގައި އެންމެ އެދެވޭ ކުލުމެއް ދެއްކިފައެއް ނުވެއެވެ.

އެރިކްސަންގެ ބަދަލުގައި ފްރެޑް ކުޅެން ނުކުންނަނީ

ފުރަތަމަ ހާފުގައި ގިނަވަގުތު ބޯޅަ ގެންގުޅެ މެޗު ޑޮމިނޭޓްކުރީ މެންޗެސްޓަރ ޔުނައިޓެޑުންނެވެ. ނަމަވެސް މިހާފުގައި ދެޓީމުން ކުރެ އެއްވެސް ޓީމަކަށް މާނުރައްކާތެރި ހަމަލާއެއް އުފެއްދިފައި ނުވާއިރު ފުރަތަމަ ހާފުގެ ކުލުން ނިމުނީ 0-0 ން ދެޓީމު އެއްވަރުވެފައި އޮވެގެންނެވެ.

މިރޭގެ މެޗުން މޮލުވެ ގަދަ ހަތަރަކަށް އެރުމުގެ ފުރުސަތު އޮތް މެންޗެސްޓާރ ޔުނައިޓެޑުން ދެވަނަ ހާފު ފެށީވެސް ބަދަލަކާއެކުގައެވެ. އަޚްލާގީ މައްސަލައަކާއި ހުރެ މިރޭގެ މެޗުގެ ފުރަތަމަ އެގާރައިން ފުރުސަތު ނުލިބުނު އިގިރޭސި ފޯވާޑް މާކަސް ރަޝްފޯޑް ދެވަނަ ހާފުގައި ކުޅެން ނުކުތީ ޒުވާން ފޯވާޑް އަލަޖެންޑްރޯ ގަނާޗޯގެ ބަދަލުގައެވެ.

މިއާއެކު މެންޗެސްޓަރގެ ހަމަލާތަށް ފުރަތަމަ ހާފަށްވުރެ ވަރުގަދަވެގެން ދިޔައެވެ. ނަތީއްޖާއެއްގެ ގޮތުން މިރޭގެ މެޗުގެ ފެނިގެންދިޔަ ހަމައެކަނި ގޯލް ފަހު ހާފުގެ 76 ވަނަ މިނެޓްގައި ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެންނުކުތް ރަޝްފޯޑްއެވެ. މިއީ ޕޯޗުގަލްގެ މިޑްފީލްޑަރ ބްރޫނޯ ފެނާންޑޭޒް ތަނަވަސްކޮށްދިން ފުރުސަތެއްގައި ރަޝްފޯޑް ކާމިޔާބުކުރި ލަނޑެކެވެ. އަދި މިއީ މިސީޒަނުގައި ލީގުގައި އޭނާ ކާމިޔާބުކުރި ހަ ވަނަ ލަނޑެވެ.

މިރޭގެ މެޗުން ލިބުނު ތިން ޕޮއިންޓާއި އެކު 16 މެޗުން 32 ޕޮއިންޓް ހޯދައި މެންޗެސްޓަރ ޔުނައިޓެޑް ވަނީ ޕްރެމިއާ ލީގުގެ ހަތަރު ވަނައަށްކުރިއަށް ޖެހިލާފައެވެ. ތިންވާނާގައި ނިއުކާސަލް އޮތީ 33 ޕޮއިންޓާއި އެކުގައެވެ. އަދި ދެވަނާގައި އޮތް މެންޗެސްޓަރ ސިޓީއަށް ލިބިފައިވަނި 35 ޕޮއިންޓެވެ. ލީގުގެ އެއް ވަނާގައި އޮތީ 40 ޕޮއިންޓާއި އެކުގައި އާސެނަލްއެވެ.