އިގިރޭސި ޕްރެމިއާ ލިގުގައި މިރޭ މެންޗެސްޓަރ ސިޓީ އާއި އެވަޓަން ވާދަކުރި މެޗު 1-1 ން އެއްވަރުވެ ލީގުގެ އެއްވަނާގައި އޮތް އާސެނަލް އާއި ދެމެދު އޮތް ފަރަގު ދެ ޕޮއިންޓަށް ކުޑަކުރަން ލިބުނު ފުރުސަތު މެންޗެސްޓަރ ސިޓީ އިން ނަގާލައިފިއެވެ.

މި ދެޓީމު އެންމެ ފަހުން ވާދަކުރި ފަސް މެޗުންވެސް ސީޓީ މޮޅުވެފައި އޮތުމުން މިރޭގެ މެޗަކީވެސް ސިޓީއަށް ފަސޭހައިން މޮލުވެވޭނެ މެޗެއްކަމުގައި ކުރިން އޮތީ ބެލެވިފައެވެ. 

ސީޓީގެ ދަނޑުގައި މިރޭ ކުޅެވުނު މެޗުގެ ފުރަތަމަ ހާފުގައި ގިނަވަގުތު ބޯޅަގެންގުޅެ މެޗު ޑޮމިނޭޓްކުރީ ސިޓީއިން ނެވެ. ނަމަވެސް މިހާފުގައި އެވަޓަންގެ ގޯލާ އަމާޒުކޮށް ސިޓީއަށް ފޮނުވާލެވުނީ އެންމެ ހަމަލާއެކެވެ. ފުރަތަމަ ހާފުގެ 24 ވަނަ މިނެޓްގައި ރިޔާދު މަހްރޭޒް ތަނަވަސްކޮށްދިން ފުރުސަތެއްގައި އެރްލިންގް ހާލަންޑް ސިޓީއަށް ލީޑު ހޯދައިދިން އިރު މިއީ އެންމެ ފަހުން ސިޓީއަށް ކުޅެދިން ހަތަރު މެޗުގައި ހާލަންޑް ކާމިޔާބުކުރި ފަސް ވަނަ ގޯލެވެ. އަދި ޕްރެމިއާ ލީގުގައި މިސީޒަންގައި އޭނާ ކާމިޔާބުކުރި 21 ވަނަ ގޯލެވެ.

އިގިރޭސި ފޯވާޑް ޑެމަރައި ގްރޭ

ފުރަތަމަ ހާފުގައި އެވަޓަންއަށް ސިޓީގެ ގޯލާއަމާޒުކޮށް އެންމެ ހަމަލާއެއްވެސް އުފެއްދިފައި ނުވާއިރު ދެ ވަނަ ހާފުގައި ވެސް ގިނަވަގުތު ބޯޅަ ގެންގުޅެ މެޗު ޑޮމިނޭޓްކުރަމުންދިޔައީ ސިޓީ އިން ނެވެ. ނަމަވެސް މި ހާފުގައި ދޭތެރެ ދޭތެރެއިން ސިޓީގެ ގޯލަށް ނުރާކާކުރެވޭތޯ އެވަޓަން އިން ދިޔައީ މަސައްކަތް ކުރަމުންނެވެ. މި ގޮތުން އެޓީމުން އުފެއްދި ހަމަލާއެއްގައި ދެވަނަ ހާފުގެ 64 ވަނަ މިނެޓުގައި އެޓީމަށް މެޗުގެ ނަތީއްޖާ ހަމަހަމަކޮށްދިނީ އިގިރޭސި ފޯވާޑް ޑެމަރައި ގްރޭ އެވެ. މިއީ އެޓީމުގެ ސެނަގާލް މިޑްފީލްޑަރ އިދްރީސާ ގުއޭ ތަނަވަސްކޮށްދިން ފުރުސަތެއްގައި ގްރޭ ކާމިޔާބުކުރި ގޯލެކެވެ.

އެވަޓަން އިން ނަތީއްޖާ އެއްވަރު ކުރުމުން މެޗުގެ ފަހުބައިގައި އިތުރު ލަނޑެއްޖެހޭތޯ މެންޗެސްޓަރ ސިޓީއިން ވަރަށް މަސައްކަތްކުރިއެވެ. ނަމަވެސް ނުވަދިހަ މިނެޓްގެ ކުޅުންހަމަވެ އިތުރަށް ދެއްކި 11 މިނެޓްގެ ކުޅުން ނިމުނުއިތުވެސް އެވަޓަން އިން ވަނީ ސިޓީއަށް އިތުރު ލަނޑެއް ކާމިޔާބުކުރެވުނު ނުދީ އެޓީމު ހިފަހައްޓާފައެވެ.

މިރޭގެ މެޗުން ލިބުނު އެއް ޕޮއިންޓާއި އެކު 16 މެޗުން ސިޓީއަށް ލިބިފައި ވަނީ 36 ޕޮއިންޓެވެ. އެއް ވަނާގައި އޮތް އާސެނަލް އަަށް 15 މެޗުން 40 ޕޮއިންޓް ލިބިފައިވާއިރު މިރޭ ބްރައިޓަން އާއި ވާދަކުރާ މެޗުން މޮޅުވެ 8 ޕޮއިންޓްގެ ލީޑެއް، ލީގު ތާވަލުގެ ކުރީގައި ނެގުމުގެ ފުރުސަތު އެޓީމަށް އެބައޮތެވެ.