އިގިރޭސި ޕްރެމިއާ ލީގުގައި މިރޭ ރަށުން ބޭރުގައި ބްރައިޓަން 4-2 ން ބަލިކޮށް ލީގު ތާވަލުގެ ކުރީގައި އާސެނަލް އިން 7 ޕޮއިންޓްގެ ލީޑެއް ނަގައިފިއެވެ.

މިރޭގެ މެޗު ފަށައިގެން ދެވަނަ މިނެޓްގައި އާސެނަލް އިން ވަނީ ލީޑްނަގާފައެވެ. މި ލަނޑު އެޓީމަށް ކާމިޔާބުކޮށްދިނީ މިސީޒަނުގައި މޮޅުކުޅުމެއް ދައްކަމުން އަންނަ އިގިރޭސި ޒުވާން ފޯވާޑް ބުކަޔޯ ސަކާ އެވެ. މިއީ 2013 ގެ ފަހުން އަވޭ މެޗެއްގައި އާސެނަލް އިން މެޗުގެ މީހާ ކުރީކޮޅު ގޯލެއް ކާމިޔާބުކުރި ފުރަތަމަ މެޗެވެ.

ބްރައިޓަން އިން ގިނަވަގުތު ބޯޅަ ގެންގުޅެ މެޗު ޑޮމިނޭކުރި ނަމަވެސް ފުރަތަމަ ހާފު ނިމުމުގެ ކުރިން އާސެނަލް އިން އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކުރި އެވެ. މިލަނޑު އެޓީމަށް ކާމިޔާބުކޮށްދިނީ އެޓީމުގެ ޒުވާން ކެޕްޓަން މާޓިން އޮޑެގާޑް އެވެ. މިއާއެކު ފުރަތަމަ ހާފު ނިމިގެ ދިޔައީ 2-0 ން އާސެނަލް ކުރީގައި އޮވެގެންނެވެ.

Advertisement

ދެވަނަ ހާފުގެ ކުޅުން ފެށިގެން ބްރައިޓަން ކުޅުންތެރިންނަށް ހަމަޖެހިނުލެވެނީސް އާސެނަލް އިން އެ ޓީމުގެ ތިން ވަނަ ލަނޑު ކާމިޔާބުކުރިއެވެ. ދެ ވަނަ ހާފުގެ 47 ވަނަ މިނެޓްގައި އެޓީމަށް މި ލަނޑު ކާމިޔާބުކޮށްދިނީ އެޑީ އެންކެޓިއާ އެވެ. އާސެނަލް 3-0 ގެ ލީޑެއްގައި އޮތް ނަމަވެސް ދެވަނަ ހާފުގައި ވެސް ގިނަވަގުތު ބޯޅަ ގެންގުޅެ ގިނަ ފުރުސަތުތަކެއް ތަނަވަސް ކުރީ ބްރައިޓަން އިންނެވެ.

އިގިރޭސި ޒުވާން ފޯވާޑް ބުކަޔޯ ސަކާ އާސެނަލްގެ ފުރަތަމަ ލަނޑު ކާމިޔާބުކޮށް ދެނީ

މިމެޗުގައި ބްރައިޓަން އިން ކާމިޔާބު ކުރި ފުރަތަމަ ލަނޑު ދެވަނަ ހާފުގެ 65 ވަނަ މިނެޓްގައި ކާމިޔާބުކޮށްދިނީ ޖަޕާނުގެ މިޑްފީލްޑަރ ކައޯރު މިޓޯމާ އެވެ. މި ލަނޑާއި އެކު ބްރައިޓަން އިން މެޗުގެ ތެރެއަށް އެބުރި އައި ނަމަވެސް އަނެއްކާ ފެނިގެން ދިޔައީ އާސެނަލްގެ ލަނޑެކެވެ.

ދެވަނަ ހާފުގެ 71 ވަނަ މިނެޓްގައި ކެޕްޓަން މާޓިން އޮޑެގާޑް ތަނަވަސްކޮށްދިން ފުރުސަތެއްގައި މި ލަނޑު އެޓީމަށް ކާމިޔާބުކޮށްދިނީ ބުރެޒިލްގެ ޒުވާން ފޯވާޑް ގެބްރިއަލް މާޓިނެލީ އެވެ. 

އާސެނަލް 4-1 ގެ ނަތީއްްޖާއަކުން މޮޅުވާން ދަނިކޮށް ބްރައިޓަން އަށް މެޗުގެ ނަތީއްޖާގެ ފަރަގު ކުޑަކޮށްދިނީ ފަހު ހާފުގެ 77 ވަނަ މިނެޓުގައި އަޔަލޭންޑްގެ ފޯވާޑް އީވާން ފާގަސަން އެވެ. އަދި މެޗުގެ 89 ވަނަ މިނެޓްގައި ބްރައިޓަންގެ ޖަޕާން މިޑްފީލްޑަރ ކައޯރު މިޓޯމާ އިތުރު ލަނޑެއް ކާމިޔާބުކުރިއެވެ. ނަމަވެސް ވީއޭއާރުން ބެލުމަށް ފަހު ރެފްރީ ނިންމީ އެއީ އޮފްސައިޑް ގޯލެއްކަމަށެވެ. މިއާއެކު މެޗުގެ ކުޅުން ނިމިގެން ދިޔައީ 4-2 ން އާސެނަލް މޮލުވެގެން ނެވެ.

މިރޭގެ މެޗުން ލިބުނު ތިން ޕޮއިންޓާއި އެކު 16 މެޗުން އެޓީމަށް ވަނީ 43 ޕޮއިންޓް ލިބިފައެވެ. އަދި ދެވަނާގައި ވާ މެންޗެސްޓާރ ސިޓީއަށް 16 މެޗުން ލިބިފައި ވަނި 36 ޕޮއިންޓެވެ. މިއާއެކު 2022 ވަނަ އަހަރާއި އެޓީމުން އަލްވަދާއުކީ ޕްރެމިއާ ލީގު ތާވަލުގެ ކުރީގައި 7 ޕޮއިންޓްގެ ލީޑަކާއެކުގައެވެ.