ސައުދީ ޕްރޮފެޝަނަލް ލީގުގައި މިރޭ އަލްނަސްރު އާއި އަލް ޚަލީޖް ވާދަކުރި މެޗު 1-0 ން ކާމިޔާބުކޮށް ލީގު ތާވަލުގެ އެއް ވަނައަށް އަލްނަސްރު ޖެހިލައިފިއެވެ.

މިރޭގެ މެޗަކީ 2022 ޑިސެންބަރ 30 ވަނަ ދުވަހު ދުނިޔޭގެ އެންމެ މުސާރަ ބޮޑު ކުޅުންތެރިއާގެ ގޮތުގައި ކްރިސްޓިއާނޯ ރޮނާލްޑޯ އަލްނަސްރު އެފްސީ އަށް ސޮއި ކުރި ފަހުން އެޓިމު ކުލުނު ފުރަތަމަ މެޗެވެ. މިރޭގެ މެޗުގައި ފެނިގެން ދިޔަ ހަމައެކަނި ލަނޑު ފުރަތަމަ ހާފުގެ 5 ވަނަ މިނެޓްގައި އެޓީމަށް ކާމިޔާބުކޮށް ދިނީ ކެމަރޫންގެ ތަޖުރިބާކާރު ފޯވާޑް ވިންސެންޓް އަބޫބަކަރް އެވެ.

އަލްނަސްރު އާއި އަލް ޚަލީޖް ވާދަކުރި މެޗުގެ ތެރެއިން

މިއީ ޢަބްދުއްރަޙްމާން ޣަރީބު ތަނަވަސްކޮށްދިން ފުރުސަތެއްގައި އަބޫބަކަރް ކާމިޔާބުކުރި ގޯލެކެވެ. މެޗުގެ ފުރަތަމަ ހާފުގައި ގިނަވަގުތު ބޯޅަ ގެންގުޅެ މެޗު ޑޮމިނޭޓްކުރީ އަލްނަސްރު އެފްސީ އިންނެވެ. ނަމަވެސް މިހާފުގައި ލަނޑުޖަހާނެ ރަގަޅު ފުރުސަތުތަކެއް ލިބުނި އަލް ޚަލީޖް އަށެވެ.

މެޗުގެ ދެވަނަ ހާފުގައި އަލް ޚަލީޖުން ކުޅުން ރަގަޅުކޮށް ލަނޑެއްޖެހޭތޯ ވަރަށް މަސައްކަތްކުރި އެވެ. ނަމަވެސް މެޗުގެ ނަތީއްޖާއަށް އިތުރު ބަދަލެއްނައިސް މެޗު ނިމުނީ 1-0 އަލްނަސްރު އެފްސީ މޮލުވެގެން ނެވެ.

މިރޭގެ މެޗުން ލިބުނު ތިން ޕޮއިންޓާއި އެކު އަލް ނަސްރު އެފްސި ވަނީ ވަގުތީ ގޮތުން ލީގު ތާވަލުގެ އެއްވަނައަށް ޖެހިލާފައެވެ. އެޓީމު 11 މެޗު ކުޅެގެން 26 ޕޮއިންޓް ލިބިފައިވާއިރު ދެވަނާގައި އޮތް އަލްޝަބާބު އަށް 10 މެޗުން 25 ޕޮއިންޓް ލިބިފައިވެއެވެ. އަދި ތިން ވަނަގައި އޮތް އަލް އިއްތިހާދު އެފްސީ އަށް 10 މެޗުން ލިބިފައި ވަނީ 24 ޕޮއިންޓެވެ.