ތެޔޮފުޅިއެއް ވަގަށްނެގި މީހަކު 10 ހާސް ރުފިޔާއިން ޖޫރިމަނާކުރަން ކޯޓުން ހުކުމް ކޮށްފިއެވެ.

މިދިޔަ ބުރާސްފަތިދުވަހު ކްރިމިނަލް ކޯޓުން ހުކުމް ކޮށްފައިވަނީ، ހުޅުމާލޭ ދެވަނަ ފިޔަވަހީގައި އިމާރާތް ކޮށްފައިވާ ހިޔާ ޓަވަރުގެ ފިހާރައަކުން ދެފުޅި ތެޔޮ ވަގަށް ނެގި މީހަކު 10 ހާސް ރުފިޔާއިން ޖޫރިމަނާ ކުރުމަށެވެ.

އެމީހާ ވައްކަން ކޮށްފައި ވަނީ މިދިޔަ އަހަރުގެ ޖުލައި މަހުގެ ތެރޭގައެވެ.

Advertisement

އެޗް-6 ޓަވަރުގެ ގްރައުންޑް ފްލޯގައި ގާއިމު ކޮށްފައިވާ 'ޑެއިލީ ބާޒާރު' ފިހާރައިން އެމީހާ ވަގަށް ނަގާފައި ވަނީ 'ކުމާރިކާ' ބްރޭންޑުގެ ދެ ތެޔޮ ފުޅިއެވެ.

މި މައްސަލައިގައި، ވައކަން ކުރި މީހާ ވަނީ، އޭނާ ވައްކަން ކުރި ކަމަށް އެއްބަސްވެފައެވެ.

ވައްކަން ކުރިކަން ސާބިތު ވުމާއެކު އޭނާއަށް އިއްވީ ޖަލު ހުކުމެކެވެ. އެއް އަހަރާއި 20 ދުވަހަށް އޭނާ ޖަލަށް ލާން ފުރަތަމަ ހުކުމް ކުރި ނަމަވެސް، ފަހުން އެ ހުކުމް ވަނީ ޖޫރިމަނާއަށް ބަދަލު ކޮށްފައެވެ.

އެހެންކަމުން، މިދިޔަ ބުރާސްފަތި ދުވަހުން ފެށިގެން ހަ މަސް ދުވަހުގެ ތެރޭގައި އެ ފައިސާ މީރާއަށް ދެއްކުމަށް ވަނީ ހުކުމް ކޮށްފައެވެ.