އެހެން ސުކޫލް ތަކުގެ ދަރިވަރުންނަށް ވެސް ލިބެމުންދާ ޚިދުމަތްތައް ޢަރަބިއްޔާގެ ދަރިވަރުންނަށް ހޯދައިދިނުމަށް އެދި، އެ ދަރިވަރުންގެ ހައްގުގައި ވަކާލާތުކުރާ ޢަރަބިއްޔާ ސުކޫލުގެ ގިނަ ބެލެނިވެރިން މޫނު ބުރުގާ އަޅައިގެން ތިބޭތީ، ދައުލަތުންނާއި އަދި އެހެނިހެން ފަރާތްތަކުން އިހާނަތިކޮށް މުޢާމަލާތް ކޮށް ފުރައްސާރަ ކުރާ ކަމަށް ތުހުމަތު ކޮށްފި އެވެ.
ޢަރަބިއްޔާ ސުކޫލުގެ ދަރިވަރުންގެ ހައްގުގައި އެ ސުކޫލުގެ ބެލެނިވެރިން ނެރުނު ބަޔާނެއްގައި ވަނީ ސުކޫލު ލެބޯޓަރީ އަކާއި، އެދެވޭ ލައިބްރަރީ އެއް ނެތުމުގެ އިތުރުން، އިތުރު ހަރަކާތްތަކާއި ކުޅިވަރުތައް ކުޅެވޭނެ ޖާގަ ނެތުމުން އެކަމުގެ ކަންބޮޑުވުން ފާޅުކޮށްފަ އެވެ.
އަދި އެފަދަ މައްސަލަތަކުގައި ޢަރަބިއްޔާ ސުކޫލުގެ ފަރާތުން ވަކާލާތުކުރާ އެ ސުކޫލުގެ ބޯޑު މެންބަރުންނާއި، ޕީޓީއޭގެ މެންބަރުންނާއި އަދި ބެލެނިވެރިންނަށް ދައުލަތާއި އެހެނިހެން ފަރާތްތަކުން އިހާނަތިކޮށް މުޢާމަލާތް ކޮށް ފުރައްސާރަ ކުރާ ކަމަށް ތުހުމަތު ކޮށް، އެ ސުކޫލުގެ ބެލެނިވެރިން ވަނީ އެކަމާއި ހިތާމަފާޅުކޮށްފައެވެ.
އެގޮތުން ކުރިމަތިވާ ތަފާތުކުރުންތަކާއި ފުރައްސާރައިގެ ގޮތުގައި ބެލެނިވެރިން ފާހަގަކޮށްފައިވާ ކަންތައްތަކުގެ ތެރޭގައި؛
• އަރަބިއްޔާގެ ގިނަ އަންހެން ބެލެނިވެރިންނަކީ މޫނުބުރުގާ އަޅައިގެން ތިބޭ ބެލެނިވެރިން ކަމަށް ވާތީ އަރަބިއްޔާގެ މައްސަލާގައި ބާއްވާ ބައްދަލުވުން ތަކުގައި އެ ބެލެނިވެރިން ބައިވެރި ކުރަން ދެކޮޅު ހެދުން
• މޫނު ނިވާކޮށްގެން ތިބޭ އަންހެން ކަނބަލުން ކަންކަމުގައި ވާހަކަ ދެއްކުމަކީ ނުވަތަ އެކަބަލުންގެ އަޑުއުފުލައި ކަމާބެހޭ ފަރާތްތަކަށް އެކަނބަލުންގެ އަޑު އިއްވުމަކީ ކޮންފަދައަކުންތޯ ސުވާލު އުފައްދައި، އެ މޭރުމުން ޖަލްސާ ތަކުގައި ފުރައްސާރަ ކުރުން
• އަރަބިއްޔާގެ ބެލެނިވެރިންނަކީ ނިރުބަވެރި ބައެއް ކަމަށްބުނެ ބައެއް ރަށްޓެހިން ގުޅާ ކަމަށާ، ބެލެނިވެރިންގެ ތެރޭގައި މަސައްކަތް ކުރާނަމަ، ސެކިއުރިޓީން ނަގަން ޖެހޭނެކަމަށް ވިދާޅުވެ ޖަލްސާ ތަކުގައި ވާހަކަދެއްކުން
• ޢަރަބިއްޔާގެ 11 އަދި 12 އިގެ ދަރިވަރުން ތިބެނީ ތުނބުޅި ބަހައްޓާފައި ކަމަށާ، އަދި އެހެން ތިބެފައި ދެން ދާނީ ސީރިޔާ އަށް ކަމަށްބުނެ ޖަލްސާ ތަކުގައި ދޮގު ތުހުމަތުތައް ކުރުން
• އަރަބިއްޔާގެ މައްސަލާގައި ސުކޫލު ބޯޑުގެ މެންބަރުންނާއި, ޕީޓީއޭ އާއި ބެލެނިވެރިން ވަކާލާތުކުރަމުންދާތީ ޕީޓީއޭއާއި ސުކޫލް ބޯޑު އުވާލެވިދާނެ ކަމުގެ އިންޒާރު ރަސްމީ ޖަލްސާ ތަކުގައި ދިނުން. އަދި ކުދިންގެ ހާޟިރުގައި ރަސްމީ އާއްމު ޖަލްސާ އެއްގައި ބެލެނިވެރިންނަށް ކުޑައިމީސްކޮށް ވާހަކަދެއްކުން
ދަރިވަރުންނާއި ބެލެނިވެރިންގެ މެދުގައި ތަފާތުކޮށް މިފަދަ ގޮތްގޮތަށް ޢަމަލު ކުރަމުން ދިޔުމަކީ ވަރަށް ނާތަހުޒީބު އަދި ބޭއިންސާފު ޢަމަލެއްކަމަށާ، އަދި އެފަދަ ފަރާތްތަކުގެ ވިސްނުމަކީ އިންސާނިއްޔަތާއިވެސް ޚިލާފް ވިސްނުމެއް ކަމުގައި ބެލެނިވެރިން ބުނެފައިވެއެވެ.
Advertisement
This content is created and paid for by advertisers and does not involve Voice Journalists
