އިގިރޭސި ޕްރެމިއާ ލީގުގައި މިރޭ ރަށުން ބޭރުގައި، ލީގުގެ 18 ވަނާގައި އޮތް ނޮޓިންހަމް ފޯރެސްޓާއި ޗެލްސީ ވާދަކުރި މެޗު 1-1 ން އެއްވަރުވެގެން ނިމިއްޖެއެވެ.

މިރޭގެ މެޗުގެ ފުރަތަމަ ހާފުގެ 16 ވަނަ މިނެޓްގައި ޗެލްސީ އިން ވަނީ ލަނޑެއް ކާމިޔާބުކޮށް މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ މި ސީޒަނުގައި މެންޗެސްޓަރ ސިޓީއިން އެޓީމާއި ގުޅުނު އިގިރޭސި ފޯވާޑް ރަހީމް ސްޓާލިން އެވެ. ފުރަތަމަ ހާފުގައި ގިނަވަގުތު ބޯޅަގެންގުޅެ މެޗު ޑޮމިނޭޓް ކުރީ ޗެލްސީ އިންނެވެ. ނަމަވެސް ކައުންޓާ އެޓޭކުގައި ނޮޓިންހަމް ފޯރެސްޓް އިން ވެސް ޗެލްސީގެ ގޯލަށް ނުރައްކާ ކުރެވޭތޯ މަސައްކަތްކުރިއެވެ.

ނޮޓިންހަމް ފޯރެސްޓް އާއި ޗެލްސީ ވާދަކުރި މެޗުގެ ތެރެއިން

މިރޭގެ މެޗުގެ ދެވަނަ ހާފަކީ ވަރަށް އާދަޔާ ޚިލާފު ހާފެކެވެ. މިހާފުގައި 80 ޕަސެޓް ބޯލްޕޮޒިޝަން ޗެލްސީ އިން ހިފެހެއްޓި ނަމަވެސް ފޯރެސްޓްގެ ގޯލާ އަމާޒުކޮށް މިހާފުގައި އެޓީމަށް އެންމެ ހަމަލާއެއްވެސް ފޮނުވާލެވިފައެއް ނުވެއެވެ. ނަމަވެސް ފުރަތަމަ ހާފާ ޚިލާފަށް މިހާފުގައި ފޯރެސްޓުން ވަނީ އެޓީމުގެ ކައުންޓަރ އެޓޭކުތައް ވަރުގަދަކޮށް ޗެލްސީގެ ގޯލަށް ނުރައްކާތެރި ގިނަ ހަމަލާތަކެއް ފޮނުވާލާފައެވެ. ނަތީއްޖާއެއްގެ ގޮތުން ދެވަނަ ހާފުގެ 63 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ނަތީއްޖާ ހަމަހަމަކޮށްފައެވެ.

މިލަނޑު އެޓީމަށް ކާމިޔާބުކޮށްދިނީ އައިވަރީ ކޯސްޓްގެ ޑިފެންޑަރ ސާޖް އޯރިއާ އެވެ. މިއީ އެޓީމުގެ އައިވަރީ ކޯސްޓްގެ މިޑްފީލްޑަރ ވިލީ ބޮލީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މި ލަނޑަށް ފަހު ވެސް ފޮރެސްޓަށް ވަނީ މެޗުން މޮޅުވުމަށް ރަގަޅު ފުރުސަތުތަކެއް ލިބި ބޭނުންނުހިފިފައެވެ.

މިރޭގެ މެޗުން ލިބުނު އެއް ޕޮއިންޓާއި އެކު 16 މެޗުން އެޓީމަށް ލިބިފައި ވަނީ 25 ޕޮއިންޓެވެ. ލީގު ތާވަލުގައި މި ވަގުތު އެޓީމު އޮތީ 8 ވަނާގައެވެ. މިރޭގެ މެޗުން ލިބުނު ޕޮއިންޓާއި އެކު 17 މެޗުން ފޮރެސްޓަށް ލިބިފައި ވަނީ 14 ޕޮއިންޓާއި އެކު ލީގުގެ 18 ވަނަ އެވެ.