އިގިރޭސި ޕްރެމިއާ ލީގުގައި މިރޭ އަމިއްލަ ދަނޑުގައި 3-1 ލިވަޕޫލް ބަލިކޮށް، ބްރެންޓްފޯޑުން 2023 ވަނަ އަހަރުގެ ފެށުން ރަގަޅުކޮއްފިއެވެ. އަދި މިއީ ފާއިތުވި 85 އަހަރު ތެރޭގައި ލިގު މެޗެއްގައި ލިވަޕޫލް އަތުން އެޓީމު މޮލުވި ފުރަތަމަ ފަހަރެވެ.

ބްރެންޓްފޯޑް އާއި ލިވަޕޫލް ވާދަކުރި މެޗުގެ ތެރެއިން

ލަންޑަންގެ ބްރެންޓްފޯޑް ކޮމިއުނިޓީ ސްޓޭޑިއަމްގައި ކުޅެވުނު މި މެޗުގެ ފުރަތަމަ ހާފުގެ 19 ވަނަ މިނެޓުގައި ބްރެންޓްފޯޑުން ވަނީ ލަނޑެއް ކާމިޔާބުކޮށް މެޗުގެ ލީޑު ނަގާފައެވެ. މި ލަނޑަކީ ލިވަޕޫލްގެ ފުރާންސް ޑިފެންޑަރ އިބްރާހިމާ ކޯނާޓޭ އަތުން ބައިކޮޅަށް ވަން ގޯލެކެވެ. އަދި މިހާފުގެ 40 ވަނަ މިނެޓްގައި ބްރެންޓްފޯޑުގެ އިގިރޭސި ޑިފެންޑަރ ބެން މީ އެޓީމަށް އިތުރު ލަނޑެއް ކާމިޔާބުކޮށްދިނެވެ. ނަމަވެސް ވީއޭއާރުން ބެލުމަށް ފަހު ރެފްރީ ނިންމީ އެއީ އޮފްސައިޑް ގޯލެއް ކަމަށެވެ.

ނަމަވެސް ފުރަތަމަ ހާފު ނިމުމުގެ ކުރިން އެޓީމުގެ ޔޯން ވިސާ ވަނީ ލަނޑެއް ކާމިޔާބުކޮށް މެޗުގެ ނަތީއްޖާ 2-0 އަށް ބަދަލުކޮއްދީފައެވެ. މިއީ ޑެންމާކްގެ މިޑްފީލްޑަރ މަތިއަސް ޖެންސެން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ގޯލެކެވެ. މި ލަނޑާއެކު ފުރަތަމަ ހާފުގެ ކުޅުން ނުމުނީ 2-0 ން ބްރެންޓްފޯޑު ކުރީގައި އޮވެގެންނެވެ.

ތިން ބަދަލާއެކު ލިވަޕޫލުން ދެވަނަ ހާފުގެ ކުޅުން ފެށިއިރު، މި ހާފުގެ 3 ވަނަ މިނެޓްގައި ލިވަޕޫލުގެ އުރުގުއާއީ ފޯވާޑް ޑާވިން ނުނޭޒް އެޓީމަށް ލަނޑެއް ކާމިޔާބުކޮށްދިނެވެ. ނަމަވެސް ވީއޭއާރުން ބެލުމަށް ފަހު ރެފްރީ ނިންމީ އެއީ އޮފްސައިޑު ގޯލެއް ކަމަށެވެ. ނަމަވެސް އޭގެ ދެ މިނެޓު ފަހުން އެޓީމުގެ އިގިރޭސި މިޑްފީލްޑަރ އެލެކްސް އޮކްސްލޭޑް-ޗެމްބަލެއިން ވަނީ ލަނޑެއް ކާމިޔާބުކޮށް މެޗުގެ ނަތިއްޖާ 2-1 އަށް ބަދަލުކޮށްދީފައެވެ. މިއީ އިގިރޭސި ޑިފެންޑަރ ޓްރެންޓް އެލެގްޒެންޑާ-އާނޯލްޑް ތަނަވަސްކޮށްދިން ފުރުސަތެއްގައި ޗެމްބަލެއިން ކާމިޔާބުކޮށްދިން ގޯލެކެވެ.

ލިވަޕޫލުން ގިނަވަގުތު ބޯޅަ ގެންގުޅެ ގިނަ ހަމަލާތަކެއް އުފެއްދި މި މެޗުގެ ދެވަނަ ހާފުގައި ބްރެންޓްފޯޑުން އުފެއްދި ހަމައެކަނި ހަމަލާގައި އެޓީމުން ވަނީ ތިން ވަނަ ލަނޑެއް ކާމިޔާބުކޮށް މި މެޗުން ތިން ޕޮއިންޓް ޔަގީންކޮށްފައެވެ. މި ލަނޑު ފަހު ހާފުގެ 84 ވަނަ މިނެޓްގައި ކާމިޔާބުކޮށްދިނީ އެޓީމުގެ ކެމަރޫން ފޯވާޑް ބްރަޔަން އެމްބިއުމްއޯ އެވެ. 

މިރޭގެ މެޗުން ލިބުނު ތިން ޕޮއިންޓާއި އެކު ބްރެންޓްފޯޑުން ވަނީ ކުޅުނު 18 މެޗުން 26 ޕޮއިންޓް ހަމަކޮށް ލީގުގެ ހަތް ވަނައަށް ޖެހިލާފައެވެ. މި މެޗުން ބަލިވި ލިވަޕޫލަށް 17 މެޗުން ލިބުނު 28 ޕޮއިންޓާ އެކު ލިގު ތާވަލުގައި އެޓީމު އޮތީ 6 ވަނާގައެވެ.