މީހުން ކިޔާ ފާޑުކިޔުންތަކާމެދު ކަންބޮޑުވެ، އެކަމަށް ރައްދުދީ ހަދަން ބޭނުމެއްނޫން ކަމަށާއި. އަލް ނަސްރަށް ބަދަލުވީ އެޓީމާ އެކު ގިނަ ލަނޑުތަކެއް ކާމިޔާބުކޮށް އިތުރު ތަށި ތަކެއް ހޯދުމަށް ކަމަށް ކްރިސްޓިއާނޯ ރޮނާލްޑޯ ބުނެފިއެވެ.

އަލް ނަސްރުގެ ކުޅުންތެރިއެއްގެ ގޮތުގައި ރަސްމީކޮށް ކްރިސްޓިއާނޯ ރޮނާލްޑޯ ދައްކާލުމުގެ ގޮތުން މިރޭ ބޭއްވި ކުލަގަދަ ރަސްމިއްޔާތުގެ ކުރިން ނުސްވެރިންނާއި ވާހަކަ ދަށްކަމުން ރޮނާލްޑޯ ބުނީ ޔޫރަޕްގެ ފުޓްބޯޅަ ދޫކޮށް ސައުދީއަށް ބަދަލުވީ ހުށަހެޅުންތަކެއް ނުލިބިގެން ނޫންކަމަށާއި ޔޫރަޕްގައި ފުޓްބޯޅަ ކުޅެގެން ކުޅުންތެރިއަކަށް ހާސިލްކުރެވޭނެ ހުރިހާ ކާމިޔާބީއެއް ހާސިލްކުރެވިފައިވާ ކަމަށެވެ.

ރޮނާލްޑޯ ނޫސްވެރިންނާއި ވާހަކަ ދައްކަނީ

މީޑިއާގައި ރޮނާލްޑޯގެ މި ނިންމުމާއި ގުޅިގެން ފާޑުކިޔާ ފަރާތްތަކުގެ ވާހަކަތަކަށް ރައްދުދެމުން ރޮނާލްޑޯ ބުނީ، މިއީ އޭނާއަށް މިކަމާ ގުޅޭގޮތުން ވާހަކަދެއްކޭނެ ވަގުތެއް ކަމަށް ގަބޫލުކުރާ ކަމަށާއި، އޭނާގެ ސޮއި ހޯދުމަށް ފާއިތުވީ ދުވަސްތަކުގެ ތެރޭގައި ގިނަ ކުލަބުތަކަކުން މަސައްކަތް ކުރިކަމަށެވެ. އެގޮތުން ޕޯޗުގަލް، ބްރެޒިލް، އަދި އޮސްޓްރޭލިއާގެ އިތުރުން އެމެރިކާގެ ބައެއް ކުލަބުތަކުން ވެސް އޭނާއާ މަޝްވަރާކޮށް، އެ ކުލަބުތަކަށް އޭނާ ގެންދަން މަސައްކަތްކޮށްފައިވާކަމަށް ރޮނާލްޑޯ ބުންޏެވެ.

އެހެންނަމަވެސް އޭނާ އެއްބަސްވުމަކަށް އައީ ވެސް އަދި ރަސްމީކޮސް މިފަދަ މަޝްވަރާތައް ކުރީ ވެސް ހަމައެކަނި އަލް ނަސްރާއެކު ކަމަށް ރޮނާލްޑޯ ބުނެފައިވެއެވެ. ރޮނާލްޑޯ އިތުރަށް ބުނީ، އަލް ނަސްރަށް އޭނާ ބަދަލުވާން ނިންމި ނިންމުމަކީ އޭނާގެ ފުޓުބޯޅަ ކެރިއަރުގެ ނިމުންކަމަށް ބައެއް ފަރާތްތަކުން ވާހަކަ ފެތުރި ނަމަވެސް ، އެހެން އެ ބުނަނީ ފުޓުބޯޅަ ރަނގަޅަސް ނޭނގޭ މީހުން ކަމަށެވެ. އަދި ސައުދީ ލީގަކީ ވާދަވެރިކަން ބޮޑު ލީގެއް ކަމަށާއި، މިއީ އޭނާގެ ކެރިއަރުގެ މުޅިން އާފެށުމެއްކަމަށް ރޮނާލްޑޯ ބުނެފައިވެއެވެ.

ރޮނާލްޑޯ އަލް ނަސްރު ޓީމުގެ ފަރިތަކުރުންތަކުގައި ބައިވެރިވަނީ

ސައުދީ ލީގާއި ބެހޭގޮތުން އިތުރަށް ވާހަކަ ދައްކަމުން ރޮނާލްޑޯ ބުނީ ދުނިޔޭގެ ފުޓްބޯޅަ މިހާރު ވަނީ ވަރަށް ބޮޑަށް ކުރިއަރާފައި ކަމަށައި ހާއްސަކޮށް އޭޝިއާގެ ފުޓްބޯޅަ ވަރަށް ފެންވަރު ރަގަޅުވެއްޖެކަމަށެވެ. އަދި މިސާލެއްގެ ގޮތުން ނިމިދިޔަ ވޯލްޑް ކަޕްގައި ސައުދީ ޓީމުން މުބާރާތުގެ ޗެންޕިއަން އާޖެންޓީނާ ބަލިކުރުން ފަހަގަކޮށް އޭޝިއާގެ ޓީމުތަކުން ދައްކަމުން އަންނަ ކުޅުމަށް ރޮނާލްޑޯ ވަނީ ތައުރީފުކޮއްފައެވެ.

ރޮނާލްޑޯ ބުނީ އޭނާއަކީ ހާއްސަ ކުޅުންތެރިއެއް ކަމަށާއި މި ސަބަބާއި ހުރެ އޭނާ އާއި އަލް ނަސްރާއި ދެމެދު ވެވުނު އެއްބަސްވުމަކީ ވެސް ޚާއްސަ އެއްބަސްވުމެއްކަމަށެވެ.

ދުނިޔޭގެ ތާރީޚުގައި ވެސް އެންމެ ބޮޑު މުސާރައެއް ލިބޭ ކުޅުންތެރިއާގެ ގޮތުގައި ރޮނާލްޑޯ ސައުދީގެ އަލް ނަސްރަށް ބަދަލުވީ ގާތްގަޑަކަށް އަހަރަކު 200 މިލިއަން ޔޫރޯ ލިބޭ އެއްބަސްވުމެއްގެ ދަށުންނެވެ. މި އެއްބަސްވުމުގެ ދަށުން އޭނާ އެ ކުލަބުގައި ކުޅުންތެރިއެއްގެ ގޮތުގައި ދެ އަހަރާއި ބައިގެ މުއްދަތަކަށް މަޑުކުރާނެއެވެ. އަދި އެއައްފަހު ސައުދީ ފުޓްބޯޅަ ޕްރޮމޯޓްކުރުމަށް އެމްބެސެޑާއެއްގެ ގޮތުގައި އިތުރު ހަތަރު އަހަރާއި ބައި މަސައްކަތްކުރުމަށް މި އެއްބަސްވުމުގެ ދަށުން ހަމަޖެހިފައި ވެއެވެ.

އުމުރުން 37 އަހަރުގެ ރޮނާލްޑޯ އަލް ނަސްރަށް ބަދަލުވީ، ކުލަބެއް ނެތި މަހެއްހާ ދުވަސް ހުރުމަށްފަހުއެވެ. 2021 ވަނަ އަހަރުގެ ހޫނު މޫސުމުގެ ޓްރާންސްފާ ވިންޑޯގައި އިޓަލީގެ ޖުވެންޓަސް ދޫކޮށް ރޮނާލްޑޯ މެންޗަސްޓާ ޔުނައިޓެޑަށް ބަދަލުވިއިރު، މިދިޔަ ނުވެމްބަރު މަހު އެކުލަބުން ވަނީ އޭނާއާއެކު ހަދާފައިވާ އެއްބަސްވުމުގައި ބާކީ ހަތް މަސް ދުވަސް އޮއްވައި އެ އެއްބަސްވުން ބާތިލުކޮށްފައެވެ.

ޔުނައިޓެޑުން މި އެއްބަސްވުން ބާތިލުކުރީ ޓީމުގެ ކޯޗާއި މެނޭޖްމަންޓާ މެދު ރޮނާލްޑޯގެ ހުރި ކަންބޮޑުވުންތަކާއި ޝަކުވާތައް ހާމަކޮށް އިގިރޭސި މަޝްހޫރު ނޫސްވެރިއެއްކަމަށްވާ ޕިއަރސް މޯގަން އަށް އޭނާ ދިން އިންޓަވިއުއަކާ ގުޅިގެންނެވެ.