އިގިރޭސި ޕްރެމިއާ ލީގުގައި އަމިއްލަ ދަނޑުގައި އާސެނަލް، ނިއުކާސަލް ޔުނައިޓެޑާއި ވާދަކުރި މެޗު ދެޓީމުން ކުރެ ޓީމަކަށް ލަނޑެއް ކާމިޔާބު ނުކުރެވި 0-0 ން އެއްވަރުވެ މި ސީޒަނަުގައި އަމިއްލަ ދަނޑުގައި އާސެނަލް ދަމަހައްޓަމުން އައި މޮޅުވުމުގެ ސިލްސިލާ ނިމުމަކަށް އައިސްފިއެވެ.

މިރޭގެ މެޗުގެ ފުރަތަމަ 10 މިނެޓްތެރޭގައި އާސެނަލް އިން ވަނީ ނިއުކާސަލްގެ ގޯލަށް ނުރައްކާތެރި ތިން ހަމަލާއެއް ފޮނުވާލާފައެވެ. މިހާފުގައި އާސެނަލް އިން ގިނަ ވަގުތު ބޯޅަ ގެންގުޅެ މެޗު ޑޮމިނޭޓް ކުރި ނަމަވެސް، މިހާފުގައި ނިއުކާސަލް އިން ވެސް ލަނޑުޖަހާނެ ރަގަޅު ފުރުސަތުތަކެއް ތަނަވަސްކުރިއެވެ.

ރެފްރީ ނިއުކާސަލް ކުޅުންތެރިއަކަށް ރީނދޫ ކާޑް ދައްކަނީ

މިގޮތުން ފުރަތަމަ ހާފުގެ އިތުރު ވަގުތުތެރޭގައި އެޓީމަށް ލިބުނު ކޯނަރަކުން އިގިރޭސި ޑިފެންޑަރ ކީރަން ޓްރިޕިއާ ގޯލުކުރިމައްޗަށް ހުރަސްކޮށްދިން ބޯޅައެއް އެޓީމުގެ ބުރެޒިލް ފޯވާޑް ޖޯލިންޓަން ބޮލުން ފޮނުވާލުމުން ގޯލާއި އަމާޒުނުވެ ދަނޑިކައިރިން ދިޔައީ ބޭރަށެވެ. 

ދެވަނަ ހާފުގައި އާސެނަލް އިން ކުޅުން ރަގަޅުކޮށް ގިނަ ފުރުސަތުތަކެއް ތަނަވަސްކުރި ނަމަވެސް އެޓީމުގެ ހަމަލާތައް ދިފާއިކުރުމުގައި ނިއުކާސަލްގެ ޑިފެންޑަރުން ވަނީ މޮޅުކުޅުމެއް ދައްކަދީފައެވެ، ޕްރެމިއާ ލީގުގައި އެންމެ ފަހުން ކުޅުނު 12 މެޗުގައި ނިއުކާސަލް ބަލިވެފައި ނުވާއިރު މިރޭގެ މެޗާއި އެކު އެންމެ ފަހުން ކުޅުނު ހަ މެޗުގައި އެޓީމުކޮޅަށް ގޯލެއްވަދެފައި ނުވެއެވެ.

މިރޭގެ ގެ މެޗާއި އެކު އާސެނަލް އިން މެޗަކުން ބަލިނުވެ 10 މެޗު ފުރުހަމަކުރި އިރު، މި މެޗުން ލިބުނު އެއް ޕޮއިންޓާއި އެކު ލީގު ތާވަލުގެ އެއްވަނާގައި އެޓީމު އޮތީ 44 ޕޮއިންޓާއި އެކުގައެވެ. އަދި މިރޭގެ މެޗުން ލިބުނު އެއް ޕޮއިންޓާއި އެކު 17 މެޗުން 35 ހަމަަަކޮށް ނިއުކާސަލް ޔުނައިޓެޑް މިވަގުތު އޮތީ ޕްރެމިއާ ލީގު ތާވަލުގެ ތިން ވަނާގައެވެ.