ސިޔާސީ ޕާޓީއަށް ވަންނަން އެދޭ ފޯމުގައި ފިންގަރ ޕްރިންޓް ޖަހަން ލާޒިމްކޮށް ޤާނޫނަށް ގެނައި ބަދަލާއިއެކު، އިލެކްޝަންސް ކޮމިޝަނަށް ހުށަހެޅި ފޯމުތަކުގެ ތެރެއިން ފިންގަރ ޕްރިންޓް ނެތީގެން ބާތިލް ކުރަންޖެހުނު ފޯމުތަކުގެ އަދަދާއި އެ ފޯމުތައް ހުށަހެޅު ޕާޓީތައް އިއުލާން ކޮށްފިއެވެ. 

އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބު ކުރެއްވި ޓުވީޓެއްގައި އޭނާ ވަނީ، ސިޔާސީ ޕާޓީތަކަށް މީހުން ރެޖިސްޓާ ކުރުމުގެ ގަވާއިދު އިސްލާހުކުރި ފަހުން ފިންގަރ ޕްރިންޓް ނެތީގެން އީސީގެ ދަފްތަރުން އުނި ކުރަންޖެހުނު ފޯމުތަކުގެ ތަފްސީލް ހާމަކޮށްދެއްވާފައެވެ. 

އެގޮތުން، އެންމެ ގިނައިން އީސީގެ ދަފްތަރުން އުނި ކޮށްފައިވަނީ ވެރިކަން ކުރާ މައި ޕާޓީ، އެމްޑީޕީން ކަން ހަބީބު ހާމަކުރެއްވި އަދަދު ތަކުން ހާމަވެއެވެ. 

Advertisement

• ޑީއާރުޕީން 10،016

• އެމްޑީޕީން 21،013

• ޢަދާލަތުން 2،425

• ޖޭޕީން 2،641

ސިޔާސީ ޕާޓީތަކަށް ވަންނަން އެދި ޕާޓީތަކުން ހުށަހަޅާ ފޯމްގެ ސައްހަކަން އިތުރަށް ކަށަވަރު ކުރުމަށް ފޯމްގައިވާ ފޯން ނަމްބަަރަށް އެސްއެމްއެސް ކުރުމާ އީސީގެ ވެބްސައިޓްގައި ފޯމްގެ މައުލޫމާތު ހިމަނައި ޝަކުވާ ހުށަހެޅުމަށް 7 ދުވަސް ދޭ ގޮތަށްވެސް މިހާރު ވަނީ ހަދާފައެވެ. 

އެއާއެކު، ޕާޓީތަކުން ލިބޭ މެމްބަރޝިޕް ފޯމްގެ އަދަދު ބޮޑުތަނުން ކުޑަވެފައިވާކަންވެސް އީސީން ވަނީ ހާމަކޮށްފަ އެވެ.