ކުރިއަށް އޮތް އެމްޑީޕީގެ ރިޔާސީ ޕްރައިމަރީގައި މަޖިލީހުގެ ރައީސް މުހައްމަދު ނަޝީދަށް ތާއީދު ހޯއްދެވުމަށް ހިޔާ ސަރަހައްދަށް ވަޑައިގަތުމުން އެ ސަރަހައްދުގައި ދިރިއުޅޭ ރައްޔިތުން ނަޝީދާއި ދެކޮޅަށް އަޑުއުފުލައިފި އެވެ. 

ނަޝީދު ހިޔާ ސަހަރައްދަށް ވަޑައިގެންފައިވަނީ އެމަނިކުފާނުގެ ކެމްޕޭނު ހަރަކާތެއް އެ ސަރަހައްދުގައި ބޭއްވުމަށެވެ. 

މިއަދު ހަވީރު ނަޝީދު އެ ސަރަހައްދަށް ވަޑައިގަތުމާއެކު އެ ސަރަހައްދުގައި ދިރިއުޅެއްވާ ރައްޔިތުން ވަނީ ނުރުހުން ފާޅުކޮށް އަޑުއުފުލާފައެވެ. 

Advertisement

އެގޮތުން ނަޝީދަކީ ހިޔާ ފްލެޓުތައް ކުޑައިމީސްކޮށް މީގެ ކުރިން ވަރަށް ގިނައިން ވާހަކަދައްކަވާފައިވާ ބޭފުޅެއްކަން ނަޝީދާއި ދެކޮޅަށް އަޑުއުފުލި ފަރާތްތައް ފާހަގަކޮށްފައިވެއެވެ. 

ހިޔާ ފްލެޓުތަކަކީ "ކޮތަރު ކޮށި" ތަކެއް ކަމަށާއި، އެތަނުގައި ދިރިއުޅޭ ރައްޔިތުންގެ މައްސަލަތައް ހައްލުކޮށްދިނުމުގައި އެހީތެރިކަމަށް އެދުމުން އެކަންކަމަށް ބީރު ކަންފަތެއް ދެއްވަމުން އައި ބޭފުޅެއްކަންވެސް އަޑު އުފުލި ފަރާތްތައް ފާހަގަކޮށްފައިވެއެވެ. 

ހިޔާ ފްލެޓު ސަރަހައްދުގައި ދިރިއުޅޭ ރައްޔިތުން ނަޝީދަށް ފެނިލެއްވީ ރިޔާސީ އިންތިޚާބު ބޯމަތިވުމުންކަމަށް އަޑުއުފުލި ގިނަ ބަޔަކު ވަނީ ބުނެފައެވެ. 

ނަޝީދު ހިޔާ ސަރަހައްދަށް ވަޑައިގަތުމާއެކު ރައްޔިތުން އެމަނިކުފަނާއި ދެކޮޅަށް އަޑުއުފުލަން ފެއްޓެވެމުން، މިއަދު ކުރިއަށް ގެންދިއުމަށް ހަމަޖެހިފައިވާ ހަރަކާތްވެސް ވަނީ ރާވާއިފާ ގޮތަށްވުރެ ކުރުކޮށްލާފައެވެ. 

އެ ސަހަރައްދުގައި އެމަނިކުފާނު ދެއްވަމުން ގެންދެވި ސްޕީޗުވެސް ކުރުކޮށްލައްވާފައިވާއިރު، ޑޯ ޓު ޑޯއަށްވެސް ވަޑައިގަތީ އެންމެ ފްލެޓަކަށެވެ. އެފަހުން ނަޝީދު ވަނީ އެ ސަރަހައްދު ދޫކުރައްވާ ވަޑައިގެންފައެވެ.