ކޮޕާ ޑެލްރޭ ފުޓްބޯޅަ މުބާރާތުގައި ހަތަރު ވަނަ ޑިވިޝަންގެ ޓީމެއް ކަމަށްވާ އެފްސީ އިންޓަސިޓީ ވާދަކޮށް ވާދަވެރި ކުޅުމަކަށް ފަހު 4-3 މޮޅުވެ ބާސެލޯނާ މުބާރާތުގެ ކުއާޓާ ފައިނަލުން ޖާގަ ހޯދައިފިއެވެ.

ފުރަތަމަ އެގާރާއިގައި އާންމުކޮށް ކުޅޭ ބައެއް ކުޅުންތެރިންނާއި ނުލައި ކުލުނު ބާސެލޯނާ ޓީމަށް ރޭގެ މެޗުގައި ލީޑު ނަގައިދިނީ ފުރަތަމަ ހާފުގެ ހަަތަރު ވަނަ މިނެޓުގައި އުރުގުއާއީގެ ޒުވާން ޑިފެންޑަރ ރޮނާލްޑް އަރައުޖޯ އެވެ. މިއީ ސްޕެއިންގެ ޒުވާން މިޑްފީލްޑަރ ޕަބްލޯ ޓޯރޭ ޕަބްލޯ ޓޯރޭ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިންް ލަނޑެކެވެ. މި ލަނޑާއެކު ފުރަތަމަ ހާފުގެ ކުޅުން ނިމުނީ 1-0 ން ބާސެލޯނާ ކުރީގައި އޮވެގެންނެވެ.

  ދެވަނަ ހާފުގައި އެފްސީ އިންޓަސިޓީއަށް މެޗުގެ ނަތީއްޖާ ހަމަހަމަކޮށްދިނީ 56 ވަނަ މިނެޓުގައި ސްޕެއިންގެ ޒުވާން މިޑްފީލްޑަރ އޮރިއޯލް ސޮލްޑެވިލާއެވެ. މިއީ އެޓީމުގެ ޑިފެންޑަރ ވަދިކް މުރިޔާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. ބާސެލޯނާ އަށް މި މެޗުގައި ދެވަނަ ފަހަރަށް ކުރި ހޯދައިދިނީ އުސްމާނޭ ޑެމްބެލޭ އެވެ.

އުރުގުއާއީގެ ޒުވާން ޑިފެންޑަރ ރޮނާލްޑް އަރައުޖޯ

ދެވަނަ ހާފުގެ 66 ވަނަ މިނެޓުގައި ސްޕެއިންގެ ޒުވާން މިޑްފީލްޑަރ ގަވީ ތަނަވަސްކޮށްދިން ފުރުސަތެއްގައި ޑެމްބެލޭ ބާސެލޯނާގެ ދެވަނަ ލަނޑު ކާމިޔާބުކޮށްދިންތާ މާގިނައިރެއް ނުވެ އޮރިއޯލް ސޮލްޑެވިލާ ވަނީ ދެވަނަ ފަހަރަށް އިންޓަސިޓީއަށް މެޗުގެ ނަތީއްޖާ ހަމަހަމަކޮށްދީފައެވެ. ކްރިސްޓޯ ރޮމޭރޯ ތަނަވަސްކޮށްދިން ފުރުސަތެއްގައި ދެވަނަ ހާފުގެ 73 ވަނަ މިނެޓްގައި އޮރިއޯލް ސޮލްޑެވިލާ މި މެޗުގައި އޭނާގެ ދެވަނަ ލަނޑު ކާމިޔާބުކުރިތާ ކުޑަ އިރުކޮޅެއްފަހުން ބާސެލޯނާއިން މި މެޗުގައި ތިން ވަނަ ފަހަރަށް ލީޑުނެގިއެވެ.

ފަހު ހާފުގެ 77 ވަނަ މިނެޓްގައި ބުރެޒިލްގެ ފޯވާޑް ރާފިންހާ ކާމިޔާބުކުރި ލަނޑާއިއެކު ބާސެލޯނާ މޮޅުވާން ދަނިކޮށް ހަތަރު ވަނަ ޑިވިޝަންގެ ލީގު ތާވަލުގެ 16 ވަނާގައި މިވަގުތު އޮފް އެފްސީ އިންޓަސިޓީ އިން ވަނީ ތިން ވަނަ ފަހަރަށް މި މެޗުގައި ފަހަތުން އަރާ ނަތީއްޖާ ހަމަހަމަކޮޮށްފައެވެ. މި ލަނޑު އެޓީމަށް ކާމިޔާބުކޮށްދިނީ މިރޭގެ މެޗުގައި މޮޅުކުޅުމެއް ދެއްކި ސްޕެއިންގެ ޒުވާން މިޑްފީލްޑަރ އޮރިއޯލް ސޮލްޑެވިލާއެވެ.

މިއާއެކު އެނާ ވަނީ މިމެޗުގައި ތިން ލަނޑު ކާމިޔާބުކޮށް ހެޓްރިކް ފުރުހަމަކޮށްފައެވެ. މެޗުގެ ފުރިހަމަ ވަގުތު ހަމަވިއިރު 3-3 ން ދެޓީމު އެއްވަރުވެފައި އޮތުމުން ނަތީއްޖާ ނެރުމަށް ކުޅެވުނު 15 މިނެޓްގެ ދެހާފުގެ ތެރެއިން ފުރަތަމަ ހާފުގެ 13 ވަނަ މިނެޓްގައި މި މެޗުން ބާސެލޯނާ މޮޅުވި ލަނޑު ކާމިޔާބުކޮށްދިނީ އެޓީމުގެ ޒުވާން ފޯވާޑް އަންސޫ ފާޓީއެވެ.