އިގިރޭސި ޕްރެމިއާ ލީގުގައި ރޭ އިމިއްލަ ދަނޑުގައި މެންޗެސްޓަރ ސިޓީއަތުން ބަލިވެ ޗެލްސީ ޕްރެމިއާ ލީގު ތާވަލުގެ 10 ވަނައަށް  ވެއްޓިއްޖެއެވެ. ޗެލްސީގެ ސްޓެމްފޯޑް ބްރިޖްގައި ކުޅެވުނު މެޗު ސިޓީ އިން ކާމިޔާބުކުރީ 1-0 ގެ ނަތީއްޖާއަކުންނެވެ. 

މި ދެޓީމު އެންމެ ފަހުން ކުޅުނު ހަތަރު މެޗުންގެ ތެރެއިން ތިން މެޗުން ސިޓީ މޮޅުވެފައިވާއިރު އެންމެ ނިމިފައިވަނީ އެއްވަރުވެގެންނެވެ. ޗެލްސީއަށް އެންމެ ފަހުން މެންޗެސްޓަރ ސިޓީ ބަލިކުރެވިފައި ވަނީ 2021 ވަނަ އަހަރުގެ ޗެންޕިއަންސް ލީގު ފައިނަލް މެޗުގައެވެ. އެމެޗު ޗެލްސި ކާމިޔާބުކުރީ 1-0 ގެ ނަތީއްޖާއަކުންނެވެ.

މިރޭގެ މެޗުގެ ފުރަތަމަ ހާފުގައި ދެޓީމުގެ ފަރާތުން ދާދި ހަަމަހަމަ ކުޅުމެއްފެނުނު އިރު މެޗުގެ ވަރަށް ކުރީކޮޅު ޗެލްސީގެ އިގިރޭސި ފޯވާޑް ރަހީމް ސްޓާލިން އަށް އަނިޔާވެގެން ބަދަލުކުރަންޖެހުނުއިރު ފުރަތަމަ ހާފުގެ 22 ވަނަ މިނެޓްގައި ކްރިސްޓިއަން ޕުލިސިކް އަށް އަނިޔާވުމުން ޗެލްސީއަށް އިތުރު މައްސަލަތަކެއް ދިމާވިއެވެ.

ކްރިސްޓިއަން ޕުލިސިކް އަށް އަނިޔާވުމުން ދަނޑުމަތީގައި ފަރުވާދެނީ

ފުރަތަމަ ހާފުގައި އަނިޔާވެގެން ބޭލި ދެ ކުޅުންތެރިންގެ ބަދަލުގައި ކުޅެން ނުކުތީ ޕިއޭ-އެމެރިކް އޮބަމަޔަންގް އާއި ކާނީ ޗުކްވުއެމެކާ އެވެ. ފުރަތަމަ ހާފުގެ 38 ވަނަ މިނެޓުގައި ސިޓީގެ ނޯވޭ ފޯވާޑް އެރްލިންގް ހާލަންޑްއަށް ޗެލްސީ ޕެނަލްޓީ އޭރިއާ ތެރެއިން ލިބުނު ފުރުސަތުގައި ފޮނުވާލި ހަމަލާ ގޯލާ އަމާޒުނުވެ ދަނޑިމަތިން ދިޔައީ ބޭރަށެވެ.

ޗެލްސީ އާއި މެންޗެސްޓަރ ސިޓީ ވާދަކުރި މެޗުގެ ތެރެއިން

ފުރަތަމަ ހާފުގައި ޗެލްސީ ޓީމުން އެންމެ ހުސް ފުރުސަތެއް ލިބުނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް ޗުކްވުއެމެކާ އަށެވެ. ފުރަަތަމަ ހާފުގެ 44 ވަނަ މިނެޓްގައި ސިޓީގެ ޕެނަލްޓީ އޭރިއާ ބޭރުން އޭނާ ފޮނުވާލި ބާރު ހަމަލާ އަމާޒުވީ ގޯލުގެ ވާތްފަރާތު އަރިމަތީ ދަނޑިއަށެވެ. 

ދެވަނަ ހާފުގެ 51 ވަނަ މިނެޓްގައި ސިޓީގެ ނެދަލޭންޑްސް ޑިފެންޑަަރ ނަތަން އަކޭ ޗެލްސީ ގޯލްކުރިމަށްޗަށް ހުރަސްކޮއްލި ބޯޅައެއް ގޯލް އަރިމަތީ ދަނޑީގައި ޖެހިފައި ނުކުތް ބޯޅަ ދެވަނަ ފަހަރަށް ލިބުނީ އެޓީމުގެ ޕޯޗުގަލް މިޑްފީލްޑަރ ބާނާޑޯ ސިލްވާ އަށެވެ. އޭނާ މުޅިން ހުސްކޮށްއޮވެ ފޮނުވާލި ބޯޅަ ޗެލްސީ ކުޅުންތެރިން ބުލޮކުރިއެވެ.

މެންޗެސްޓަރ ސިޓީގެ ހަމައެކަނި ލަނޑު ރިޔާދު މަހްރޭޒް ކާމިޔާބުކުރަނީ

މިހާފުގައި ޗެލްސީ އިން އެންމެ ރަގަޅު ފުރުސަތެއް ލިބުނީ ބުރެޒިލްގެ ތަޖުރިބާކާރު ޑިފެންޑަރ ސިލްވާ އަށެވެ. އޭނާ ބޮލުން ފޮނުވާލި ހަމަލާ ގޯލާއި އަމާޒުނުވެ ދިޔައިރު، މި މެޗުގައި ފެނިގެން ދިޔަ ހަމައެކަނި ލަނޑު 63 ވަނަ މިނެޓްގައި ކާމިޔާބުކޮށްދިނީ ރިޔާދު މަހްރޭޒް އެވެ. މިއީ އިގިރޭސި މިޑްފީލްޑަރ ޖެކް ގްރީލިޝް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ގޯލެކެވެ.

މިރޭގެ މެޗުން ލިބުނު ތިން ޕޮއިންޓައި އެކު މެންޗެސްޓަރ ސިޓީ އިން ވަނީ 17 މެޗުން 39 ޕޮއިންޓް ހަމަކޮށް އެއްވަނާގައި އޮތް އާސެނަލް އާއި ދެމެދު އޮތް ފަރަގު ފަސް ޕޮއިންޓަށް ކުޑަކޮއްފައެވެ. އަދި މިރޭގެ މެޗުން ބަލިވުމުން ޗެލްސީ ވަނީ ލީގު ތާވަލުގެ 10 ވަނައަށް ވެއްޓިފައެވެ. އެޓީމަށް 17 މެޗުން ލިބިފައި ވަނީ 25 ޕޮއިންޓެވެ.