އިގިރޭސި އެފްއޭ ކަޕްގައި ރޭ އަމިއްލަ ދަނޑުގައި 3-1 ން އެވަޓަން ބަލިކޮށް މެންޗެސްޓަރ ޔުނައިޓެޑް މުބާރާތުގެ ހަތަރު ވަނަ ބުރުން ފުރުސަތު ހޯދައިފިއެވެ. މެންޗެސްޓަރ ޔުުނައިޓެޑް އެންމެ ފަހުން ކުޅުނު 17 މެޗުގެ ތެރެއިން އެޓީމު ބަލިވެފައި ވަނީ އެންމެ މެޗަކުންނެވެ. އަދި ރޭގެ މެޗަކީ އޯލްޑް ޓްރެފޯޑްގައި އެޓީމު ޖެހިޖެހިގެން މޮޅުވި 8 ވަނަ މެޗެވެ.

ރޭގެ މެޗުގައި ފުރަތަމަ ލަނޑުޖަހައި ލީޑުހޯދީ މެންޗެސްޓަރ އިންނެވެ. ފުރަތަމަ ހާފުގެ ހަތަރު ވަނަ މިނެޓުގައި މިލަނޑު އެޓީމަށް ކާމިޔާބުކޮށްދިނީ ބްރެޒިލްގެ ފޯވާޑް އެންޓަނީ އެވެ. މިއީ އެޓީމުގެ އިގިރޭސި ފޯވާޑް މާކަސް ރަޝްފޯޑް ތަނަވަސްކޮށްދިން ފުރުސަތެއްގައި އޭނާ ކާމިޔާބުކުރި ލަނޑެކެވެ. މެންޗެސްޓަރ އިން ލީޑުނެގިތާ 10 މިނެޓު ފަހުން އެވަޓަން އިން މެޗުގެ ނަތީއްޖާ ހަމަހަމަ ކުރިއެވެ. މި ލަނޑެ އެޓީމަށް ކާމިޔާބުކޮށް ދިނީ އިގިރޭސި ޑިފެންޑަރ ކޮނޯރ ކޯޑީ އެވެ.

އިގިރޭސި ޑިފެންޑަރ ކޮނޯރ ކޯޑީ

ފުރަތަމަ ހާފުގައި ގިނަވަގުތު ބޯޅަގެންގުޅެ ގިނަ ފުރުސަތުތަކެއް ތަނަވަސްކުރީ މެންޗެސްޓަރ ޔުނައިޓެޑުން ނެވެ. ނަމަވެސް ފުރަތަމަ ހާފުގެ ކުޅުން ނިމުނީ ދެޓީމުން ކުރެ ޓީމަކަށް އިތުރު ލަނޑެއް ކާމިޔާބުނުކުރެވި 1-1 ން ދެޓީމު އެއްވަރުވެފައި އޮވެގެންނެވެ.

ދެވަނަ ހާފު ފެށިގެން މާގިނައިރުތަކެއް ނުވެ މެންޗެސްޓަރ ޔުނައިޓެޑުން ދެވަނަ ފަހަރަށް މެޗުގެ ލީޑު ނެގިއެވެ. މި ލަނޑަކީ މެޗުގެ 52 ވަނަ މިނެޓުގައި އެވަޓަންގެ ޑިފެންޑަރ ކޮނޯރ ކޯޑީ އަތުން ބައިކޮޅަށް ވަންގޯލެކެވެ. ދެވަނަ ހާފުގެ 74 ވަނަ މިނެޓުގައި އެވަޓަންގެ އިގިރޭސި ފޯވާޑް ޑޮމިނިކް ކަލްވާޓް-ލެވިން ލަނޑެއް ކާމިޔާބުކޮށް ދެވަނަ ފަހަރަށް އެޓީމަށް މެޗުގެ ނަތީއްޖާ ހަމަހަމަކޮށްދިނެވެ. ނަމަވެސް ވީއޭއާރުން ބެލުމަށް ފަހު ރެފްރީ ނިންމީ އެއި އޮފްސައި ގޯލެއްކަމަށެވެ.

މިރޭގެ މެޗުގައި މެންޗެސްޓަރ ޔުނައިޓެޑުން ކާމިޔާބުކުރި ތިންވަނަ ލަނޑަކީ މެޗުގެ އިތުރު ވަގުތުގެ އެންމެ ފަހު މިނެޓުގައި އެޓީމަށް ލިބުނު ޕެނަލްޓީއަކުން ރަޝްފޯޑް ކާމިޔާބުކޮށްދިން ގޯލެކެވެ. މި ލަނޑާއި އެކު މެޗުގެ ކުޅުން ނިމުނީ 3-1 ން މެންޗެސްޓަރ ޔުނައިޓެޑު މޮޅުވެގެންނެވެ.