ސައުދީ ޕްރެމިއާ ލީގުގައި އަމިއްލަ ދަނޑުގައި އަލް ތާއީ 2-0 ން ބަލިކޮށް އަލް ނަސްރު އިން ލީގުގެ އެއްވަނާގައި ހަތަރު ޕޮއިންޓްގެ ލީޑެއް ނަގައިފިއެވެ. ބުރަސްފަތި ދުވަހުގެ ރޭ ކުޅުމަށް ޝެޑިއުލް ކުރެވިފައި އޮތް މި މެޗު ރެއަށް ލަސްކުރެވުނީ ސައުދީއަށް ވަރަށް ބޮޑަށް ވިއްސާރަވެ އަލް ނަސްރުގެ ސްޓޭޑިއަމުން ކަރަންޓު ކެޑިގެންނެވެ.

ފުރަތަމަ ހާފުގެ 42 ވަނަ މިނެޓްގައި އަލް ނަސްރު ޓީމަށް ލީޑު ހޯދައި ދިނީ ބްރެޒިލްގެ ފޯވާާޑް އެންޑަސަން ޓަލިސްކާއެވެ. މިއީ ސައުދީގެ ޑިފެންޑަރ އައްސުލްޠާން އަލް ޣަންނަމް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަލް ނަސްރުގެ ފަރާތުން މޮޅު ކުޅުމެއް ފެނިގެން ދިޔަ ރޭގެ މެޗުގައި އެޓީމުގެ ދެވަނަ ލަނޑު ފަހު ހާފު ފެށިގެން ދެވަނަ މިނެޓްގައި ކާމިޔާބުކޮށް ދިނީވެސް ޓަލިސްކާ އެވެ. މި ލިނޑަކީ އަލް ނަސްރުގެ ކޮލަމްބިއާ ގޯލްކީއްޕަރު ޑޭވިޑް އޮސްޕިނާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ގޯލެކެވެ.

އަލް ނަސްރުގެ ސަޕޯޓަރުން ރޭގެ މެޗުގައި 

ރޭގެ މެޗުން ލިބުނު ތިން ޕޮއިންޓާއި އެކު އަލް ނަސްރު އަށް 12 މެޗުން 29 ޕޮއިންޓާއި އެކު ލީގު ތާވަލުގެ ކުރީގައި ހަތަރު ޕޮއިންޓްގެ ލީޑެއް ވަނީ ލިބިފައެވެ. ދެ ވަނާގައި އޮތް އަލް ޝަބާބަށް 11 މެޗުން ލިބިފައި ވަނީ 25 ޕޮއިންޓެވެ. އަދި މި މެޗުން ބަލިވި އަލް ތާއީ މިވަގުތު އޮތީ 12 މެޗުން ލިބުނު 18 ޕޮއިންޓާއި އެކު 16 ޓީމު ހިމެނޭ ލީގު ތާވަލުގެ ހަތް ވަނާގައެވެ.

ލަނޑުޖެހުމަށް ފަހު އަލް ނަސްރުގެ ކުޅުންތެރިން އުފާފާޅުކުރަނީ

ދުނިޔޭގެ އެންމެ މުސާރަ ބޮޑު ކުޅުންތެރިއާގެ ގޮތުގައި ކުރިސްޓިއާނޯ ރޮނާލްޑޯ އަލް ނަސްރަށް ބަދަލުވި ފަހުން ކުޅުނު ދެވަނަ މެޗުންވެސް އެޓީމު މޮޅުވެފައި ވާއިރު, އަލް ނަސްރު އިން އަމިއްލަ ދަނޑުގައި ރޭ އަލް ތާއީއާ ދެކޮޅަށް ކުޅުނު މެޗުގައި ރޮނާލްޑޯ ކުޅޭނެ ކަމަށް ސަޕޯޓަރުން އުއްމީދުކޮށްގެން ތިބި ނަމަވެސް ރޮނާލްޑޯ އަށް މި މެޗުގައި ނުކުޅެވުނީ މިދިޔަ އޭޕްރީލް މަހު މެންޗެސްޓާ ޔުނައިޓެޑާ އެކު ކުޅުނު އިނގިރޭސި ޕްރިމިއާ ލީގު މެޗެއްގައި އެވަޓަންގެ ސަޕޯޓަރެއްގެ ފޯނު އަތުން ޖަހައި ބިމަށް ވައްޓާލި މައްސަލައިގައި އިގިރޭސި އެފްއޭ އިން އޭނާ ދެ މެޗަށް ސަސްޕެންޑް ކޮއްފައިވާތީއެވެ.

ބުރެޒިލްގެ ފޯވާޑް އެންޑަސަން ޓަލިސްކާ ރޭގެ މެޗުގައި ދެ ލަނޑު ކާމިޔާބުކުރި

ރޮނާލްޑޯ އަށް ސަސްޕެންޝް އައީ ވޯލްޑް ކަޕް ގައި ޕޯޗުގަލްގެ ފުރަތަމަ މެޗު ފަށަން ކުޑަތަން ވެފައި ވަނިކޮށެވެ. އިނގިރޭސި އެފްއޭ އިން ވަނީ އެ މައްސަލައިގައި ރޮނާލްޑޯ ދެ މެޗަށް ސަސްޕެންޑް ކޮށް، 50،000 ޕައުންޑް (60،000 ޑޮލަރު) އިން ޖޫރިމަނާ ކޮށްފަ އެވެ. ފީފާގެ ގަވާއިދުގައި ވާގޮތުން ރޮނާލްޑޯ ކޮންމެ ގައުމެއްގެ ކްލަބަކަށް ބަދަލުވި ނަމަވެސް ސަސްޕެންޝަން ފުރިހަމަ ކުރަން ޖެހޭނެ އެވެ.

މި ސަސްޕެންޝަންގެ ސަބަބުން، ނަސްރު އިން ރޭ ކުޅުނު މެޗުގެ އިތުރުން، އަންނަ ހަފްތާ ވާދަވެރި އަލް ޝަބާބާ ކުޅޭ މެޗުގައި ވެސް ރޮނާލްޑޯ އަށް ނުކުޅެވޭނެ އެވެ. މީޑިއާތަކުން ރިޕޯޓް ކުރާ ގޮތުގައި، ރޮނާލްޑޯ ކުޅޭނެ ކަމަށް ބަލައި ރޭގެ މެޗަށް ހުރިހާ ޓިކެޓެއް ވަނީ ވިކި ހުސްވެފަ އެވެ.