އިގިރޭސި އެފްއޭ ކަޕް 3 ވަނަ ބުރުގައި މިރޭ އަމިއްލަ ދަނޑުގައި ޗެލްސީ 4-0 ން ބަލިކޮށް މެންޗެސްޓަރ ސިޓީ އެޓީމު ލަދުގަންނަވާލައިފިއެވެ. މިއީ ވޭތުވެދިޔަ 72 ގަޑިއިރު ތެރޭގައި ސިޓީ އަތުން ޗެލްސީ ބަލިވި ދެވަަނަ މެޗެވެ. އަދި މިއީ ފާއިތުވެދިޔަ 25 އަހަރު ތެރޭގައި އިގިރޭސި އެފްއޭކަޕްގެ 3 ވަނަ ބުރުން އެޓީމު ކެޓި ފުރަތަމަ ފަހަރެވެ.

އިގިރޭސި ޕްރެމިއާ ލީގުގައި ދެ ދުވަސްކުރިން ޗެލްސީ އަތުން 1-0 ން ސިޓީ މޮޅުވެފައިވާއިރު މިރޭގެ މެޗަށް އެޓީމުން ނުކުރީ މުހިންމު ގިނަކުޅުންތެރިންތަކެއް ފުރަތަމަ އެގާރައިގައި ނުހިމަނައެވެ. އޭގެ ތެރޭގައި އެޓީމުގެ ޓޮޕް ސްކޯރާ ހާލަންޑްގެ އިތުރުން މެދުތެރޭގައި އެންމެ މުހިންމު ދައުރެއް އަދާކުރަމުން އަންނަ ބެލްޖިއަމްގެ މިޑްފީލްޑަރ ކެވިން ޑި ބްރޭނާ ފާހަގަކޮށްލެވެއެވެ.

އިގިރޭސި މިޑްފީލްޑަރ ފިލް ފޯޑެން 

ސިޓީގެ ފަރާތުން މޮޅުކުޅުމެއް ފެނިގެންދިޔަ ފުރަތަމަ ހާފުގައި އެޓީމުގެ ފުރަތަމަ ލަނޑު 24 ވަނަ މިނެޓްގައި އެޓީމަށް ލިބުނު ހިލޭ ޖެހުމަކުން ކާމިޔާބުކޮށްދިނީ އަލްޖީރިއާގެ ފޯވާޑް ރިޔާދު މަހްރޭޒް އެވެ. ސިޓީގެ ދެވަނަ ލަނޑަކީ ޗެލްސީގެ ޕެނަލްޓީ އޭރިއާ ތެރެއިން އެޓީމުގެ ކުޅުންތެރިއެއްގެ އަތުގައި ބޯޅަޖެހިގެން އެޓީމަށް ލިބުނު ޕެނަލްޓީއެއްގައި އާޖެންޓީނާގެ ޒުވާން ފޯވާޑް ޖޫލިއަން އަލްވަރޭޒް ކާމިޔާބުކޮށްދިން ލަނޑެކެވެ.

އަލްޖީރިއާގެ ފޯވާޑް ރިޔާދު މަހްރޭޒް މިރޭގެ މެޗުގައި ދެ ލަނޑު ކާމިޔާބުކުރި

ފުރަތަމަ ހާފުގައި ޗެލްސީއަށް ސިޓީގެ ގޯލާ އަމާޒުކޮށް އެންމެ ހަމަލާއެއްވެސް ފޮނުވާލެވިފައި ނުވާއިރު، ފުރަތަމަ ހާފުގެ 38 ވަނަ މިނެޓްގައި އިގިރޭސި މިޑްފީލްޑަރ ފިލް ފޯޑެން ވަނީ ސިޓީގެ ތިންވަނަ ލަނޑު ކާމިޔާބުކޮށްދީފައެވެ. މިއީ އިގިރޭސި ޑިފެންޑަރ ކައިލް ވޯކާ ތަނަވަސްކޮށްދިން ފުރުސަތެއްގައި އޭނާ ކާމިޔާބު ކުރި ލަނޑެކެވެ. މިއާއެކު ފުރަތަމަ ހާފުގެ ކުޅުން ނިމިގެންދިޔައީ 3-0 ން މެންޗެސްޓަރ ސިޓީ ކުރީގައި އޮވެގެންނެވެ.

ދެވަނަ ހާފު ޗެލްސީ އިން ފެށީ ދެ ބަދަލަކާއެކުއެވެ. އަދި މިހާފުގައި އެޓީމުން ކުޅުން ރަގަޅުކޮށް ސިޓީގެ ފަހަތަށް ބާރުބޮޑުކުރި ނަމަވެސް އެޓީމަށް ލަނޑެއް ކާމިޔާބެއް ނުކުރެވުނެވެ. އަދި މި މެޗުގައި ސިޓީއިން ކާމިޔާބުކުރި ހަތަރުވަނަ ލަނޑު ދެވަނަ ހާފުގެ 85 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ އަލްޖީރިއާގެ ފޯވާޑް ރިޔާދު މަހްރޭޒް އެވެ. 

މިރޭގެ މެޗުން މޮޅުވެ އެފްއޭ ކަޕްގެ ހަތަރުވަނަ ބުރުން ފުރުސަތު ހޯދި މެންޗެންޓަރ ސިޓީ ހަތަރުވަނަ ބުރުގައި ވާދަކުރަން ޖެހޭނީ މާދަމާރޭ އާސެނަލް އާއި އޮކްސްފޯޑް ޔުނައިޓެޑް ވާދަކުރާ މެޗުން މޮޅުވާ ޓީމަކާ ދެކޮޅަށެވެ.