އިޓާލިއަން ލީގުގައި މިރޭ ރަށުން ބޭރުގައި ވާދަވެރި އޭސީ މިލާން 2-0 ން މޮޅުވާންދަނިކޮށް ފަހުވަގުތު ކާމިޔާބުކުރި ދެ ލަނޑާއި އެކު ރޯމާ އިން މިލާން މޮޅުވިޔަނުދީ ހިފަހައްޓައިފިއެވެ.

ދެޓީމުގެ ފަރާތުންވެސް ވާދަވެރި ކުޅުމެއް ފެނިގެންދިޔަ ފުރަތަމަ ހާފުގައި ގިނަވަގުތު ބޯޅަ ގެންގުޅެ ގިނަ ހަމަލާތަކެއް އުފެއްދީ އޭސީ މިލާނުން ނެވެ. މިގޮތުން ފުރަތަމަ ހާފުގެ 30 ވަނަ މިނެޓުގައި އިޓަލީގެ މިޑްފީލްޑަރ ސެންޑްރޯ ޓޮނާލީ ކޯނަރަކުން ގޯލުކުރިމައްޗަށް ހުރަސްކުރި ބޯޅަ، ބޮލުން ގޯލުގެ ތެރެއަށް ފޮނުވާލައިގެން ފުރާންސްގެ ޑިފެންޑަރ ޕިއޭ ކަލޫލޫ ވަނީ އެޓީމަށް މެޗުގެ ލީޑު ހޯދައިދީފައެވެ.

ޓެމީ އަބްރަހަމް އިތުރު ވަގުތުގައި ރޯމާއަށް ނަތީއްޖާ ހަމަހަަމަކޮށްދިނުމަށް ފަހު

ފުރަތަމަ ހާފުގައި ރޯމާއަށް މިލާންގެ ގޯލާ އަމާޒުކޮށް އެންމެ ހަމަލާއެއްވެސް ފޮނުވާލެވިފައި ނުވާއިރު ދެވަނަ ހާފުގައި އެޓީމުން ކުޅުން ރަގަޅުކޮށް ރަގަޅު ފުރުސަތުތަކެއް ތަނަވަސްކުރިއެވެ. ނަމަވެސް ގޯލެއް ކާމިޔާބު ނުކުރެވި އުޅެނިކޮށް މިލާނުން އިތުރު ލަނޑެއް ކާމިޔާބުކޮށް މެޗުގެ ނަތީއްޖާ 2-0 އަށް ބަދަލުކޮއްލިއެވެ. މި ލަނޑު އެޓީމަށް ކާމިޔާބުކޮށްދިނީ އިޓަލީގެ މިޑްފީލްޑަރ ޓޮމްމާސޯ ޕޮބެގާ އެވެ. މިއީ ޕޯޗުގަލްގެ ފޯވާޑް ރަފައެލް ލިއޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކުރި ލަނޑެކެވެ.

އޭސީ މިލާން ކުޅުންތެރިން ލަނޑުޖެހުމަށް ފަހު އުފާފާޅުކުރަނީ

2-0 ގެ ލީޑެއްގައި އޮވެ މިލާން މޮޅުވާން ދަނިކޮށް ރޯމާއަށް އުންމީދު އާވީ އެޓީމުގެ އިޓަލީގެ މިޑްފީލްޑަރ ލޮރެންޒޯ ޕެލެގްރިނީ ކޯނަރަކުން ގޯލުކުރިމައްޗަށް ހުރަސްކޮށްދިން ބޯޅައެއް އެޓީމުގެ ބުރެޒިލް ޑިފެންޑަރ ރޮޖާ އިބާނޭޒް ބޮލުން ގޯލުގެތެރެއަށް ފޮނުވާލައިގެން ކާމިޔާބުކޮށްދިން ލަނޑާއި އެކުގައެވެ. މި ލަނޑާއި އެކު ރޯމާގެ ކުޅުންތެރިން ކުރިއަށްޖެހި ނަތީއްޖާ އެއްވަރުކުރެވޭތޯ ކުރަމުން އައި މަސައްކަތް ކާމިޔާބުވީ މެޗުގެ އިތުރު ވަގުތުގައެވެ. މި ލަނޑު އެޓީމަށް ކާމިޔާބުކޮށްދިނީ އިގިރޭސި ފޯވާޑް ޓެމީ އަބްރަހަމް އެވެ.

މިރޭގެ މެޗުން މޮޅުވެ ތާވަލުގެ ދެވަނައަށް އެރުމުގެ ފުރުސަތު މިލާނުން ނަގާލިއިރު ލީގުގެ އެއްވަނާގައި 17 މެޗުން 44 ޕޮއިންޓައި އެކު އޮތީ ނަޕޯލީއެވެ. ދެވަނާގައި ޖުވެންޓަސް އޮތްއިރު 17 މެޗުން އެޓީމަށް ލިބިފައި ވަނި 37 ޕޮއިންޓެވެ. ތިންވަނާގައި އޭސީ މިލާން އޮތީ ޖުވެންޓަސް އާއި އެއްވަރަށް ޕޮއިންޓް ލިބި ލަނޑުގެ ތަފާތުންނެވެ. މިރޭގެ މެޗުން ލިބުނު އެއް ޕޮއިންޓާއި އެކު 17 މެޗުން 31 ޕޮއިންޓާއި އެކު ރޯމާ އޮތީ ލީގު ތާވަލުގެ ފަސް ވަނާގައެވެ.