ފްރާންސްގެ ފުޓްބޯޅަ ތާރީޚްގައި އެގައުމުގައި އުފެދުނު އެންމެ މޮޅު އެއް ފުޓްބޯޅަ ކުޅުންތެރިއާގެ އިތުރުން ކޯޗެއްގެ ގޮތުގައި ޔޫރަޕްގެ އެންމެ ވަރުގަދަ އެއް ކުލަބު ކަމުގައިވާ ރެއާލް މެޑްރިޑާއި އެކު ގިނަ ކާމިބިތަކެއް ހޯދާފައިވާ ޒައިނުއްދީން ޒިދާން އާއި ގުޅޭ ގޮތުން އެ ޤައުމުގެ ފުޓުބޯޅަ ފެޑެރެޝާންގެ ރައީސް ނޮއެލް ލީ ގްރައެޓް ދެއްކި ވާހަކަތަކާއި މެދު ފްރާންސް ޤައުމީ ޓީމުގެ ތަރި ކީލިއަން އެމްބާޕޭ ޓުވިޓާގައި ހިތްހަމަނުޖެހުން ފާޅުކޮށްފިއެވެ.

ފްރާންސް ޓީމުގެ ކޯޗުކަމުގެ މަޤާމުގައި މިވަގުތު ހުރި ޑިޑިއަރ ޑެޝޯމްޕްސްގެ އެއްބަސްވުން 2026 ވަނަ އަހަރާއި ހަމައަށް އައުކުރުމަށް ފަހު ބޭއްވި ނޫސްވެރިންގެ ބައްދަލުވުމުގައި ފުރާންސްގެ ފުޓްބޯޅަ ފެޑަރޭޝަންގެ ރައީސް ވަނީ ޒިދާން ފުރާންސްގެ ޤައުމީޓީމާއި ހަވާލުވުމާއި ބެހޭގޮތުން ދެކެވުނު ވާހަކަތައް ދޮގުކޮށްފައެވެ. ފެޑަރޭޝަންގެ ޗޮއިސް އެއް ނޫން ޒިދާން އަކީ އަދި އޭނާއާއި ޤައުމީޓީމު ހަވާލުކުރުމާއި ބެހޭގޮތުން އެއްވެސް މަޝްވަރާއެއް ކުރެވިފައި ނުވާކަމަށެވެ. 

ޒައިނުއްދީން ޒިދާން ކޯޗެއްގެ ގޮތުގައި ޔޫރަޕްގެ އެންމެ ވަރުގަދަ އެއް ކުލަބު ކަމުގައިވާ ރެއާލް މެޑްރިޑާއި އެކު ގިނަ ކާމިބިތަކެއް ހޯދާފައިވާ  

ފްރާންސް ފުޓުބޯޅަ ފެޑެރޭޝަންގެ ރައީސް ލީ ގްރައެޓް ވިދާޅުވީ، ޒިދާން ބްރެޒިލްގެ ޤައުމީ ޓީމާ ހަވާލުވިއަސް ފަރުވަލެއް ނެތްކަމަށާއި، ޒިދާން ކަންތައް ކުރާނީ ޒިދާން ބޭނުންވާ ގޮތަށް ކަމަށާއި، އެއީ އޭނާއާ ގުޅުމެއް އޮންނާނެ ކަމެއް ނޫން ކަމަށެވެ. މީގެ އިތުރުން ލީ ގްރައެޓް ވިދާޅުވީ، އޭނާ ޒިދާންއާ ބައްދަލު ނުކުރައްވާ ކަމަށާއި، ޑެޝޯމްޕްސްގެ ބަދަލު ޒިދާން ގެންނަން އެއްވެސް ވަރަކަށް ޚިޔާލު ނުގެންގުޅޭ ކަމަށެވެ.

ޒައިނުއްދީން ޒިދާން ފުރާންސް ޤައުމީ ޓީމާއެކު 98 ގެ ވޯލްޑްކަޕް ތަށި އުފުލާލަނީ

މިދިޔަ އަހަރުގެ ޑިސެމްބަރު މަހު ޤަތަރުގައި އޮތް ފީފާ ވޯލްޑް ކަޕްގެ ފައިނަލްގައި އާޖެންޓީނާ އަތުން ފްރާންސް ބަލިވުމާއެކު، ފްރާންސް ޓީމުގެ ކޯޗުކަމުގެ މަޤާމުގައި ހުރި ޑިޑިއަރ ޑެޝޯމްޕްސް މަގާމުން އިސްތިއުފާ ދޭނެކަމަށް ހުޅަނގުގެ މީޑިއާތަކުން ރިޕޯޓްކުރިއެވެ. އަދި އެމަގާމަށް ޒިދާން ގެންނަން އުޅޭކަމަށާއި ބުރެޒިލް، ޕޯޗުގަލް އަދި އެމެރިކާގެ ޤައުމީ ޓީމާއި ހާވާލުވުމަށް ލިބުނު ފުރުސަތުތަކަށް ޒިދާން ނޫނެކޭ ބުނީ އެ ސަބަބާއި ހުރެ ކަމަށް ވެސް މީޑިއާތަކުން ރިޕޯޓުކޮއްފައިވެއެވެ. 

ލީ ގްރައެޓްގެ އެ އިންޓަވިޔުއާ ގުޅިގެން ފްރާންސް ފުޓުބޯޅައިގައި ހަރަކާތްތެރިވާ ގިނަ ބަޔަކު އަންނަނީ އޭނާ އަށް ފާޑުކިޔަމުންނެވެ. އެގެތެރޭގައި އެންމެ ފާހަގަކޮއްލެވެނީ ފުރާންސް ޤައުމީ ޓީމުގެ މިހާރުގެ ތަރި ކީލިއަން އެމްބާޕޭ އެވެ. އެ ވާހަކަތަކާއި މެދު ހިތްހަމަނުޖެހުން ފާޅުކުރަމުން އެމްބާޕޭ ބުނީ "ޒިދާން އަކީ ފުރަންސް ކަމަށާއި، އެކަހަލަ ލެޖެންޑަކަށް އިހްތިރާމް ކުޑަވަފަދަ ގޮތަކަށް" ފެޑަރޭޝަންގެ ރައީސް ފަދަ މަގާމެއްގައި ހުރި މީހަކު ވާހަކަ ދެއްކުމަކީ ކޮންގެންވާނެ ކަމެއް ނޫން ކަމަށެވެ.

ޒައިނުއްދީން ޒިދާން ވަނީ ފުރާންސް ޤައުމީ ޓީމާއި އެކު 1998 ގެ ވޯލްޑް ކަޕްގެ އިތުރުން 2000 ވަނަ އަހަރު ބޭއްވުނު ޔޫރޯ ފުޓްބޯޅަ މުބާރާތް ކާމިޔާބުކޮށްފައެވެ. 98 ގެ ފައިނަލުގައި ބުރެޒިލް 3-0 ން ބަލިކޮށް ފުރާންސުން އެޤައުމުގެ ތާރީޚްގައި ފުރަތަމަ ފަހަރަށް ވޯލްޑް ކަޕް ކާމިޔާބު ކުރި އިރު އެ މެޗުގައި ޒިދާން ދެ ލަނޑު ކާމިޔާބުކޮށް ދިނެވެ. އަދި 2000 ވަނަ އަހަރުގެ ޔޫރޯ އާއި 2006 ވަނަ އަހަރުގެ ވޯލްޑް ކަޕްގެ މޮޅު ކުޅުުތެރިއަކީ ވެސް ޒިދާން އެވެ.