އިގިރޭސި އެފްއޭ ކަޕް ފުޓްބޯޅަ މުބާރާތުގެ ތިން ވަނަ ބުރުގައި އޮކްސްފޯޑް ޔުނައިޓެޑް 3-0 ބަލިކޮށް މުބާރާތުގެ އެންމެ ކާމިޔާބު ޓީމު އާސެނަލް އިން ހަތަރު ވަނަ ބުރުގެ ޖާގައެއް ކަށަވަރުކޮށްފިއެވެ.

އެފްއޭ ކަޕް ފުޓްބޯޅަ މުބާރާތުގެ ޗެންޕިއަންކަން 14 ފަހަރަށް ހޯދާފައިވާ އާސެނަލް އިން ރޭ ރަށުން ބޭރުގައި އޮކްސްފޯޑް ޔުނައިޓެޑާއި ދެކޮޅަށް ކުޅުނު މެޗުގައި އެޓީމުގެ ފުރަތަމަ އެގާރައިގައި އާންމުކޮށް ކުޅޭ ގިނަކުޅުންތެރިން ނުކުޅެއެވެ. ރޭގެ މެޗުގެ ފުރަތަމަ ހާފުގައި ދެ ޓީމުން ކުރެ ޓީމަކަށް ރަގަޅު ހަމަލާއެއް އުފެއްދިފައި ނުވާއިރު މެޗުގައި ފެނިގެންދިޔަ ތިން ލަނޑުވެސް އާސެނަލް އިން ކާމިޔާބުކުރީ ދެވަނަ ހާފުގައެވެ.

މިސްރުގެ މިޑްފީލްޑަރ މުހައްމަދު އެލްނެނީ

ދެވަނަ ހާފުގެ 63 ވަނަ މިނެޓުގައި އާސެނަލް އަށް މެޗުގެ ލީޑު ހޯދައިދިނީ މިސްރުގެ މިޑްފީލްޑަރ މުހައްމަދު އެލްނެނީ އެވެ. މިއީ ޕޯޗުގަލްގެ ޒުވާން މިޑްފީލްޑަރ ފަބިއޯ ވިއޭރާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިންލަނޑެކެވެ. އަދި އެޓީމުގެ ފަހު ދެ ލަނޑު ކާމިޔާބުކޮށްދިނީ އިގިރޭސި ފޯވާޑް އެޑީ އެންކެޓިއާ އެވެ. 

ދެވަނަ ހާފުގެ 70 ވަނަ މިނެޓުގައި އެޑީ އަސެނަލްގެ ދެ ވަނަ ލަނޑު ކާމިޔާބުކުރީ ފަބިއޯ ވިއޭރާ ތަނަވަސްކޮށްދިން ފުރުސަތެއްގައެވެ. އަދި އޭގެ ހަމިނެޓް ފަހުން އާސެނަލްގެ ތިން ވަނަ ލަނޑު އޭނާ ކާމިޔާބުކުރީ ބުރެޒިލްގެ ފޯވާޑް ގެބްރިއަލް މާޓިނެލީގެ އެހީތެރިކަމާއެކު އެވެ.

މުބާރާތުގެ ހަތަރުވަނަ ބުރުގައި އާސެނަލް ވާދަކުރަން ޖެހޭނީ މެންޗެސްޓަރ ސިޓީ އާއެވެ. ސިޓީ ހަތަރު ވަނަ ބުރުގެ ޖާގައެއް ހޯދީ ވާދަވެރި ޗެލްސީ ފަސޭހަކަމާއެކު 4-0 ން ބަލިކުރުމަށް ފަހުގައެވެ. އިގިރޭސި ޕްރެމިއާ ލީގަށް މިވަގުތު ވާދަކުރަމުން އަންނަ މިދެޓީމު މުބާރާތުގެ ހަތަރު ވަނަ ބުރުގައި ވާދަކުރާ މެޗު ކުޅުމަށް ހަމަޖެހިފައި ވަނީ ޖެނުއަރީ މަހުގެ 28 ވަނަ ދުވަހުއެވެ.