25 ރުފިޔާ ވަގަށް ނެގި މީހާ 3 މަހަށް ޖަލަށް!
މީރާގެ މައި އޮފީސް ފަޅައިލާ އެތަނުން 25 ރުފިޔާ ވަގަށް ނެގި މީހާ 3 މަހަށް ޖަލަށް ލުމަށް ކްރިމިނަލް ކޯޓުން ހުކުން ކޮށްފި އެވެ.
މި މައްސަލާގައި ދައުވާ އުފުލާފައިވަނީ އައްޑޫ މީހެއްގެ މައްޗަށެވެ. އޭނާ މައްޗަށް ދައުލަތުން އުފުލި ދެ ދައުވާއަކީ ހުއްދަ ނޫންތަނަކަށް ވަނުމާއި މުދަލަށް ގެއްލުން ދިނުމުގެ ކުށުގެ ދައުވާއެވެ.
އޭނާގެ މައްޗަށް ތުހުމަތުކޮށްފައިވަނީ އޯގަސްޓު މަހުގެ 9 ވަނަ ދުވަހުގައި މީރާ އޮފީހުގެ ކުޑަ ދޮރެއް ހަލާކުކޮށްލައިގެން އެ އޮފީހަށް ވަދެ ވައްކަންކުރި ކަމަށެވެ.
މި ތުހުމަތަށް އިއުތިރާފުވެ އޭނާ ބުނެފައިވަނީ އެއީ މަސްތުގެ ހާލަތުގައި ހުރެ ކުރެވުނު ކަމެއް ކަމަށެވެ.
އިބްތިދާއީ އަޑުއެހުމުގައި ކުށަށް އިއުތިރާފުވުމާ ގުޅިގެން އޭނާގެ މައްޗަށް ހުކުމްކުރުމަށް ބޭއްވި އަވަސްނިޔާ އަޑުއެހުމުގައި އޭނާގެ މައްޗަށް ދެ ދައުވާއަށް ޖުމްލަ 4 މަހާއި ފަނަރަ ދުވަހުގެ ޖަލު ހުކުމެއް އިއްވާފައިވެއެވެ.
ނަމަވެސް އޭނާ ތަންފީޒުކުރަންޖެހޭނެ މުއްދަތު ކަނޑައަޅާފައިވަނީ ޖަލުގައި ބަންދުގައި އޭނާ ހޭދަކުރި މުއްދަތު އުނިކުރުމަށްފަހުއެވެ. އެގޮތުން އޭނާ ތަންފީޒުކުރަންޖެހެނީ 3 މަހާއި 18 ދުވަސްކަމަށް ހުކުމުގައި ކަނޑައަޅާފައިވެއެވެ.
Advertisement
This content is created and paid for by advertisers and does not involve Voice Journalists