އިގިރޭސި ލީގު ކަޕްގެ ކުއާޓާ ފައިނަލުގައި ވަރުގަދަ މެންޗެސްޓަރ ސިޓީ 2-0 ން ބަލިކޮށް ސައުތުހެމްޓަން މުބާރާތުގެ ސެމީފައިނަލުން ޖާގަހޯދައިފިއެވެ.

ސައުތުހެމްޓަން ދަނޑުގައި މިރޭކުޅެވުނު ކުއާޓާ ފައިނަލް މެޗުގައި އެޓީމުގެ ފުރަތަމަ ލަނޑު ފުރަތަމަ ހާފުގެ 23 ވަނަ މިނެޓުގައި ކާމިޔާބުކޮށްދިނީ ފުރާންސްގެ ފޯވާޑް ސެކޫ މާރާ އެވެ. މިއީ އެޓީމުގެ ބުރެޒިލް ޑިފެންޑަރ ލިޔަންކޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. 

މާލީ މިޑްފީލްޑަރ މޫސާ ޑިޖެނެޕޯ ސިޓީ ކޮޅަށް ލަނޑުޖެހުމަށް ފަހު އުފާ ފާޅުކުރަނީ

މެޗުގެ ފުރަތަމަ ހާފު ނިމުމުގެ ކުރިން އެޓީމުގެ މާލީ މިޑްފީލްޑަރ މޫސާ ޑިޖެނެޕޯ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. މިއީ ފުރަތަމަ ހާފުގެ 28 ވަނަ މިނެޓުގައި އެޓީމުގެ ބެލްޖިއަމް މިޑްފީލްޑަރ ރޯމިއޯ ލަވިއާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަމަ ހާފުގެ ކުޅުން ނިމިގެން ދިޔައީ 2-0 ސައުތުހެމްޓަން ކުރީގައި އޮވެގެންނެވެ.

ދެވަނަ ހާފުގައި ބަދަލު ތަކަކާއެކު މެންޗެސްޓަރ ސިޓީ އިން ކުޅުން ރަގަޅުކޮށް ލަނޑުޖަހާނެ ގިނަ ފުރުސަތުތަކެއް ތަނަވަސްކުރި ނަމަވެސް އެޓީމަށް ސައުތުހެމްޓަންގެ ގޯލު ފޫއަޅުވާލެވޭގޮތެއް ނުވިއެވެ. މިއާއެކު މެޗު ނިމިގެން ދިޔައީ 2-0 ން ސައުތުހެމްޓަން މޮޅުވެ މުބާރާތުގެ ސެމީ ފައިނަލުން ފުރުސަތު އެޓީމަށް ލިބިގެންނެވެ.

ވުލްވްސްގެ ކުޅުންތެރިން ނޮޓިންހަމް ކޮޅަށް ލަނޑުޖެހުމަށް ފަހު އުފާ ފާޅުކުރަނީ

މިރޭ ކުޅެވުނު ކުއާޓާ ފައިނަލުގެ ފަހު މެޗުގައި ވުލްވްސް އާއި ނޮޓިންހަމް ވަދަކުރި މެޗު 1-1 ން އެއްވަރުވެ ޕެނަލްޓީ ޖަހައިގެން ސެމީގެ ފަހުޖާގަ ހޯދީ ނޮޓިންހަމް އެވެ. ސެމީފައިނަލުގައި ނޮޓިންހަމް ވާދަކުރަން ޖެހެނީ މެންޗެސްޓަރ ޔުނައިޓެޑާއި ދެކޮޅަށެވެ. އަދި ސައުތުހެމްޓަން ވާދަކުރަން ޖެހެނީ ނިއުކާސަލް ޔުނައިޓެޑައި ދެކޮޅަށެވެ. މި މުބާރާތުގެ ސެމީ ފައިނަލު ހޯމް އެންޑް އަވޭ އުސޫލުން ކުޅޭއިރު ފުރަތަމަ ލެގު ކުޅޭނީ މި މަހުގެ 25 ވަނަ ދުވަހުއެވެ. އަދި ދެވަނަ ލެގު ކުޅުމަށް ހަމަޖެހިފައި ވަނީ ފެބްރުއަރީ އެއް ވަނަ ދުވަހުއެވެ.